Reportajen Filomena da Conceição
Ohin, Traballadór Timor-oan 38 hamutuk ho família asina deklarasaun ho Sekretáriu Estadu Formasaun Profisional no Empregu (SEFOPE), no sei ba hala’o serbisu iha Korea, no traballador hirak ne’e sei ba serbisu iha area peskas nian.
Xefe Gabinete Sekretáriu Estadu Formasaun Profisional no Empregu, (SEFOPE), Jacinto Ribeiro Dias, hateten, estadu Timor-Leste koopera ho Korea iha objetivu ida maka oinsá atu bele lori joven sira sai husi kresimentu dezempregu ba empregu, signifika katak sai husi moras ida atu ba konsunta hodi hetan moris di’ak.
“Nonu governu agora nafatin kria kooperasaun di’ak ho nasaun sira seluk tanba, ema iha kapasidade no ita iha ema, entaun sé mak iha kapasidade kolabora ho ema atu nune’e bele hadi’a ita nia moris, tanba provizoriu iha Timor ita iha de’it ema maibé kapasidade seidauk tanba ne’e atu hetan kapasidade dalan mak kooperasaun, ho ida ne’e serbisu iha Korea signifika katak sai husi moras ida atu ba konsunta hodi sai moris, tanba ita hetan moras mak ita ba buka moris, ho nune’e kuidadu moras ne’e atu fila mai karik hetan moris di’ak,” dehan xefe Gabinete SEFOPE, Jacinto Ribeiro ba Jornalista sira iha Timor Logde Comoro, Sexta 7/07.
Traballadór sira iha ne’e la fasil atu mai tuur iha ne’e, no la mai hanesan fila liman derepente tuur iha laran, maibé Traballadóor hatene prosesu liuhusi pasiensia, haraik-an, kumpri, ezekuta, badinas no estuda sira ne’e hotu mak mai tuur iha ne’e, tanba ne’e Traballadór sira ttenke pasiensia no hatudu ninia rezultadu.
Iha fatin hanesan, Diretór, Diresaun Nasionál Exteriór Empregu (DNEE), Filomeno Soares hateten, objetivu jeral husi asina deklarasaun ne’e atu kria aseitasaun entre família traballadór ho SEFOPE, hodi sai responsabilidade ba traballadór sira ne’e molok atu hakat ba Servisu iha Korea.
“Objetivu jeral ba atividade ohin loron ne’e, simplesmente ita atu kovida deit família sira husi alin sira-nia Inan-Aman, maun mai iha ne’e para ita bele halo aseitasaun ida, signifika katak ita fahe responsabilidade ba malu, família iha responsabilidade no governu mós iha responsabilidade ba traballadór sira, portanto buat sira ne’e akontese ita antisipa atu buat ruma akontese iha loron ikus ita lalika dun ba malu,” nia Esplika.
Entretantu hahú husi Janeiru to’o fulan-Jullu, SEFOPE mobiliza ona traballadór hamutuk 300, maka ba hala’o ona servisu iha Korea do Súl, nune’e esforsu tomak ne’ebé mak iha, hahú husi VIII Governu no kontinua ho IX Governu nafatin kria progrma ne’ebé agora dadaun iha ba joven sira, ne’ebé iha abilidade atu kompete iha merkadu internasionál.
Nune’e totál traballadór Timoroan ne’ebé atu ba servbsu iha Korea do Súl hamutuk 38, iha area peskas no traballadór hirak ne’e sei araka ba Korea iha loron 9 Jullu 2023.