Reportajen Agustinha Amaral
Festeza loron internasional ba Juventude, UNFPA (The United Nations Population Fund), Ministériu Juventude, Desportu, Arte e Cultural (MJDAC) hamutuk ho juventude husi sentru formasaun sira, hala’o marxa saudável ho nia tema “Hakbit joven sira ho abilidade verde ba dezenvolvimentu iha mundu ne’ebe sustentável.”
Diretor Jeral Ministériu Juventude, Desportu, Arte e Cultural (MJDAC), David Tomas de Deus hateten katak aktividade ba selebrasaun loron internasional juventude ne’e hala’o iha Dili inklui Suai.
“Tinan ida ne’e ita servisu hamutuk ho parseiru sira henesan UNFPA ita organiza hodi komemora ba loron mundial ida ne’e. Ita halo iha Dili no Suai ho nia tema abilidade juventude iha verde iha dezenvolvimentu sustentável ba mundu, bazeia ba tema ida ne’e ita hamutuk elabora ho aktividade lubuk ida iha ambitu ida ne’e”, Dehan Diretor Jeral, David ba Jornalista sira, iha kampu Futebool Lecidere, Kinta-feira, 10/08.
Nia saleinta katak aktividade sira ne’ebe mak realiza hodi festeza loron mundial juventude mak semináriu iha Suai, marxa saudável, konsertu múzika, doasaun ran no diskursu úbliku ba joven sira. Nia dehan, ho aktividade hirak ne’e bele hasa’e koñesimentu, abilidade ne’ebe mak di’ak para bele kontribui ba dezenvolvimentu sustentável.
Iha fatin hanesan representante United Nations Population Fund, Pressia Arifin haktuir katak UNFPA servisu hamutuk ho governu ho parseiru hotu hodi apoiu juventude sira iha reaárea negósiu hodi kapasita juventude sira.
“UNPFA hanesan ajénsia ONU ida ne’ebe mak servisu hanesan juventude nian, ami sente importante la’os empodera joven sira de’it maibe ein termus husi área sira hanesan negósiu nian oinsá iha abilidade nomos iha área sira seluk mos importante no mos atu investe iha area sira hanesan abilidade verde nian depois joven sira bele iha kapasidade” Nia dehan.
Nia informa katak Timor-Leste maior joven barak ho nune’e inisiativa festeza loron internasional ne’e hodi fo hanoin ba governu no parseiru sira hodi bele halo investimentu ba juventude sira.
“Dadus ne’ebe mak ita iha, juventude ne’e iha 289.992 ou 21% husi populasaun joven husi idade 15-24, ne’e hatudu katak maioria populasaun Timor ne’e joven, depois husi númeru ida ne’e 36.377 sira la hatene lee no hakerek. UNPFA iha hanoin atu ita selebra loron ne’e hodi fo hanoin ba ita governu no parseiru sira hotu hodi investe iha área juventude nian” Informa nia.
Alende ne’e mos Sekretáriu Ezekutivu CNJTL, Mateus Lemos Soares, afirma katak hanesan mahon ba organizasaun juventude sira hotu ne’ebe mak simu konfiasa husi governu liu husi Ministériu MJDAC hamutuk ho parseiru ne’ebe estabelese komisaun organizadora hodi organiza aktividade hotu iha munisípiu Dili sente onradu tebes. “Ami sente onra tebes ba hola parte hanesan organizasaun juventude atu enkoraja foinsa sira hodi hola parte iha loron ne’e.”