Home EduTek Neon Metin Organiza Treinamentu Direitu Dijitál no Direitu Umanus Ba Estudante Dom...

Neon Metin Organiza Treinamentu Direitu Dijitál no Direitu Umanus Ba Estudante Dom Martinho Maliana

1027
0
hasai foto hamutuk ho estudante Dom Martinho Maliana hafoin ensera treinamentu. [Foto: Adro | 28.08.2023]

Reportajen Adroaldo “Saretukau”

Media online Neon Metin realiza formasaun “Direitu Digital no Direitus Umanus” ba estudante feto na’in 20 hosi Eskola Sekundária Públiku Dom Martinho da Costa Lopes, Maliana, Munisípiu Bobonaro durante loron rua (25 no 26 Agostu). Formasaun ne’e parte hosi Editora Neon Metin, Zevonia Vieira nia Kursu Direitu Digital hosi Asossiasaun ba Komunikasaun Progressivu.

Objetivu hosi formasaun ne’e mak oinsá joven sira komprende konabá utilizasaun plataforma digital, oinsá proteje aan, nomos oinsá utiliza sosial media ho pozitivu. Formasaun ne’e ba partisipante feto sira, tanba dala barak liu feto mak sai vítima iha online hanesan asédiu seksual, bullying, trata no seluk tan, nune’e sira bele hatene proteje sira nia aan, hatene sira nia diretu hanesan sidadaun no direitu ba digital, nune’e hili Maliana tanba sente fronteira dook liu hosi vila nune’e asesu informasaun ne’e susar liu.

Enseramentu ba formasaun ne’e, Xefe Redasaun Neon Metin, Ato “Lekinawa” agradese ba Eskola Dom Martinho tanba bele fo espasu ba Neon Metin hodi hato’o koñesimentu ba estudante sira. Nia mos orgullu ho sentru juventude ne’ebé sai nafatin mata dalan ba juventude hodi apoiu no tulun nafatin sira nia dezenvolvimentu pesoal.

Xefe Redasaun Neon Metin rekoñese katak lisaun loron rua la to’o tanba matéria ne’e boot no teorítiku ne’ebé mak barak, maibé espera bele aprende buat foun no iha ona koñesimentu oi-tuan.

“Atu koñese imi nia direitu liu-liu oinsá hatene konabá lei sira atu proteje imi, bainhira imi online katak bainhira imi uza media sosial ne’e, imi nia direitu ne’e iha ita nia lei proteje, no iha loron segundu imi ba haree prátika oinsá ba proteje aan, no prátika oinsá mak uza sosial media atu publika saída mak imi hanoin di’ak ba sosiedade.” Dehan Xefe Redasaun Neon Metin iha enseramentu formasaun, Sábadu, 26/08.

Nia hatutan, ho asédiu seksual ka aktus seluk ne’ebé akontese iha online, tanba ne’e mak Neon Metin hakarak fahe informasaun hirak ne’e ho estudante sira, nune’e uza sosial media ho pozitivu. “Proteje imi nia aan kuandu imi online, hakarak promove aktividade pozitivu promove oinsá liu hosi video.”

Adjuntu Eskola Dom Martinho, Bemvindo Dos Santos hatete katak iha eskola refere instala ona internet gratuita no la bandu estudante sira lori telefone ba eskola ho objetivu atu estudante sira bele buka materia liu hosi internet, maibé eskola refere sempre sai vítima ba teknolojia liu-liu alin feto sira sempre sai vítima.

“Rona halo di’ak, imi uza sosial media atu proteje imi nia aan ne’e halo nusa, tanba saída mak imi tenki uza media sosial, imi nia objetivu uza media sosial ne’e saída, tenki aproveita halo di’ak.” Enkoraja Adjuntu Eskola Dom Martinho ba partisipante sira iha nia abertua iha Eskola Dom Martinho, Sexta-feira, 25/08.

Nia husu atu estudante sira uza internet ne’ebé governu oferese ho di’ak, atu benefísia ba sira nia aan no buka matéria eskola. Nia mos husu ba Neon Metin atu fasilita estudante sira ho di’ak oinsá uza no proteje aan iha sosial media.

“Ami hakarak fo hanoin ba ami nia oan sira bainhira sira hetan akontesementu, sai vítima ba iha media sosial, saída mak sira atu halo, saída mak sira atu proteje no dalan saída mak ses hosi dalan ne’ebé nia simu.”

Diretor Ezekutivu Sentru Formasaun Juventude Munisípiu Bobonaro, Alcino Lopes, hatete iha enseramentu katak, formasaun durante loron rua ne’e la sufisiente maibé estudante sira bele aproveita netik buat balu, tanba Neon Metin ho vontade bele fo ona formasaun Direitu Digital no Direitus Umanus ida ne’e.

“Hosi formasaun horseik ha’u tene katak ita boot sira ho nível sekundária seidauk hatene di’ak termu sira, tanba mesak aas de’it, maibé ita buka nafatin aprende, liga ho video badak ne’e inspira tebes ita boot sira, tanba iha Dom Matinho iha estudante rihun rua resin maibé ita boot sira mak hetan oportunidade tuir formasaun ne’e, sekarik iha koñesimentu oi-tuan, informasaun balu hosi Neon Metin, bele fahe tutan ba ema na’in, ema na’in rua atu nune’e informasaun habelar liutan ba kolega sira, i kontinua prátika no karik hetan difikuldade ruma bele kontaktu ho sentru juventude.” Hato’o Diretor Alcino.

Erdina Borges Fátima hato’o “agradese wa’in tebes ba Neon Metin tanba fahe ona informasaun ne’ebé ami seidauk hetan, agradese tebes tanba ami hetan informasaun konabá direitus umanus, aumenta tan ami nia hanoin konabá direitus umanus.”

Nia dehan, durante uza sosial media, dala ruma hetan ataka hosi ID Facebook balu maibé liu hosi formasaun ne’e nia bele hatene ona oinsá prevene aan.

“Hetan ataka balu, maibé horseik ho ohin hatene ona informasaun ne’e i la ta’uk atu hasoru problema ne’ebé ha’u hetan iha media sosial.”

Nia hatete nia seidauk hetan aktus asédiu seksual nomos iha online maibé bele hatene ona konabá prevensaun. “Nunka hetan abuzu sira ne’e maibé aprende ona konabá Neon Metin ninia formasaun, agradese wa’in tebes maske seidauk hetan buat sira ne’e maibé hetan uluk ona nia esplikasaun ona.”

Formandu Estefania Soares Barros, sente kontente tanba Neon Metin bele fo ona formasaun Direitu Digital no Direitus Umanus ba sira, nune’e sira iha ona koñesimentu oi-tuan konabá tema formasaun ne’e.

“Ha’u orgullu tebes tanba maun ho bin sira hosi Neon Metin fahe ona informasaun balu mai ami, ami simu ho kontente. Ami aprende hosi maun ho bin sira mak Direitus Umanus no Direitu Digital, ida ne’e benefísiu tebes mai ami.”

Durante nia uza platforma digital mos nia seidauk hasoru aktus asédiu seksual hanesan mos iha sira nia ambiente eskola.

Parte seluk, iha enseramentu, Gabinete Apoiu Tékniki Eskola Dom Martinho hato’o obrigadu tanba bele hili ona eskola Dom Martinho ba formasaun ne’e, no nia husu atu estudante ne’ebé hetan formasaun ne’e atu kontinua aplika iha vida moris nu’udar joven.

Print Friendly, PDF & Email

LEAVE A REPLY

Please enter your comment!
Please enter your name here