Reportajen Zevonia Vieira
Konsellu Imprensa Timor-Leste realiza The Dili Dialogu Forum 2023, ho tema “Promove no hafrosa liberdade imprensa iha Sudeste Aziátiku, nu’uda empurrador ba tipu direitu umanus hotu”.
Iha eventu ne’ebe iha relasaun ho asuntu direitu umanus, maibe Neon Metin observa katak forum dialogu ne’ebe organiza iha salaun Lalini Larigutu Comisaun Nasional Eleisaun, la asesivel no difikulta ba maluk ho defisiénsia sira atu sae ba eskada ne’ebe aas.
Ba Neon Metin Jestora Radio Komunidade Defisiensia, Ermenciana Alves hato’o sentimentu katak, Konsellu Imprensa organiza eventu importante ba jornalista sira atu partisipa, inklui radio defisiénsia, maibe fatin ne’e rasik la asesivel ba ami.
“Ita hare fatin ne’e la asesibilidade susar ba ami, ami ne’ebe sei bele lao deit susar ona, satan ne’ebe ba kolega defisiénsia sira ne’ebe uza kadera roda no ai tongka. Hau sente hanesan oin halai atu monu tun husi eskada tanba eskada aas demais”, Ermenciana hato’o ba Neon Metin iha salaun CNE, 01/09.
Nune’e nia rekomenda ba Konsellu Imprensa presiza tau atensaun sériu ba fatin sira, bainhira atu halo eventu importante sira tanba agora dadauk media no jornalista defisiénsia sira mos iha, nune’e bele fasilita ho diak no asesivel.
“KI presiza hare asuntu ne’e ho diak, presiza hare fatin sira ne’ebe asesivel sira, nune bele fasilita ami hodi partisipa iha programa sira. KI presiza iha sensivel ba asuntu ema ho defisiénsia, signifika infraestrutura sira presiza asesivel”, Ermencia rekomenda.
Iha parte sorin Neon Metin halo konfirmasaun ho Diretór Ezekutivu KI, Antonio Dias, hodi hare kestaun ne’e, ba Neon Metin Diretor Antonio Dias rekoñese katak salaun ne’e la asesivel no ho haraik an husu deskulpa.
“Realidade ita tenke komprende no husu deskulpa ba sira, maibe ida nee kestaun ida atu fanun ema hotu hanesan governu no sosiedade hotu, tanba ida ne’e parte husi kestaun direitu umanus, hahú tau atensaun ona para kuandu halo planu dezenvolvimentu, presiza integradu hodi promove dezenvolvimentu inkluzivu, fatin barak ne’ebe halo seremonia ne’e, sedauk asesivel. Ami tenke rekoñese katak situasaun mak nee, ami tenke ho haraik an husu deskulpa ba sira, ida nee parte husi advokasia, no estadu tenke tau atensaun ba kestaun ida nee tanba importante”. Tenik Antonio ba Neon Metin.
The Dili Dialogu Forum ne’e rasik halo diskusaun ne’ebe foka ba papél media ba asuntu direitu umanus, no oradór sira prinsipal sira mak hanesan Provedor Direitu Umanus no Justisa, Virgilio da Silva Guterres,CEO STL Cooperation. Salvador J.X Soares no mos oradór internasionál sira hanesan Reprezentante Dewan Pers Indonesia, Asep Setiawan, Responsavel International for Journalists (AFJ), Jim Nolan no Reprezentante UNESCO.
Entretantu hetan partisipasaun másimu husi governu, Polisia Nasional Timor-Leste, unersidade no jornalista sira, ne’ebe realiza iha salaun Larigutu, loron 01/09.
