Reportajen David Da Costa Gusmão
Governu liuhusi reuniaun Konsellu Ministru ohin aprova projetu rua kona-ba Projetu Proposta Lei Rejime Organizasaun, no prátika desportiva arte marsiál sira, no Projetu Dekretu-Lei ba kriasaun Komisaun Regulador Arte Marsiáis (KRAM) I.P. no aprova ninia estatutu.
Iha projetu proposta lei no dekretu lei ne’e, aprezenta husi Ministru Edukasaun, Juventude no Desportu (MEJD), Armindo Maia no husi Sekretáriu Estadu Juventude no Desportu (SEJD), Abrão Saldanha Nokosiku
Porta Voz Governu, Ministru Prezidénsia Konsellu Ministru Fidélis Mangalhães, hateten, Projetu Proposta Lei kona-ba Rejime Organizasaun no Prátika Desportiva Arte Marsiál ida ne’e iha Timor-Leste hakarak atu estabelese kuadru jurídiku adekuadu ida ba ensinu, aprendizajen no prátika arte marsiál, ne’ebé haree liubá prevensaun komportamentu sira ne’ebé bele fó ameasa ba orden públika, ba regulasaun ensinu no prátika arte marsiál sira nian no ba promosaun husi arte marsiál nu’udar prátika desportiva.
“Rejime foun ne’e sei inklui diretrizes no norma konstituisaun, autorizasaun no lisensiamentu organizasaun arte marsiál nian, responsabilizasaun dixiplinár no kontra-ordenasionál, kriminalizasaun finansiamentu ilísitu husi organizasaun no sistema insentivu ida ba prátika arte marsiál tuir Lei. Proposta ne’e sei haruka ba Parlamentu Nasionál hodi halo diskusaun no votasaun,” dehan Porta Voz Governu, Ministru Prezidénsia Konsellu Ministru Fidélis Mangalhães, iha Palásiu Governu, Kuarta 8/03.
Alende ne’e mós nia ko’alia katak, ohin Governu aprova mós projetu dekretu lei ba kriasaun Komisaun Reguladora Arte Marsiáis (KRAM), I.P. no aprova ninia estatutu. Ho objetivu atu hametin pozisaun Komisaun Reguladora Arte Marsiáis, diploma ne’e halo transformasaun KRAM nian ha institutu públiku ho autonomia téknika, administrativa, finanseira no patrimóniu rasik.
Nia esplika, Institutu públiku id ne’e sei iha misaun atu regula no fiskaliza ensinu, aprendizajen no prátika arte marsiál hodi haree liu ba dezenvolvimentu fíziku no mentál husi indivíduu sira, hodi kontribui ba promosaun sidadania ativa, inkluzaun sosiál no laiha violénsia.
Ho ida ne’e ba oin, Komisaun sei iha atribuisaun área importante tolu: iha área kontra-ordenasionál, hodi sai responsavel atu halo instrusaun ba prosesu kontra-ordenasaun sira nian no atu aplikasaun sira-nia sansaun, iha área dixiplinár no iha fiskalizasaun ba federasaun sira ne’ebé ho utilidade públika desportiva, tuir Lejizlasaun ne’ebé vigora hela.
“Prevee katak ezersísiu ba atribuisaun KRAM sei regulamenta tuir mai, no katak parte ida husi ninia funsaun sira, ba oin, sei ezerse husi sira nia federasaun rasik, hafoin ninia estatutu ne’e hetan rekoñesimentu,” nia afirma.
