Home Notisia Loron Proklamasaun Ba Dala 48, Horta: Emansipa-an Husi Limitasaun no Inovasaun Teknolojiku

Loron Proklamasaun Ba Dala 48, Horta: Emansipa-an Husi Limitasaun no Inovasaun Teknolojiku

974
0
Prezidente Repúblika José Ramos-Horta Halo hela nia Diskursu iha Aniversáriu ba Loron Proklamasaun Independénsia Repúblika Demokratiku Timor-Leste ba dala 48, Iha Palásiu Prezidensiál Bairo-Pite Dili, (Foto-Media PR | 28.11.2023]

Reportajen David da Costa

Iha Aniversariu Proklamasaun Indepedensia da Repúblika Demokrática Timor-Leste (RDTL) nian, ba dala 48.º, Prezidente Republika (PR) José Ramos-Horta, dehan iha momentu ida ne’e la’os fó hanoin deit istória, Maibé mós haree ba futuru ho responsabilidade atu kria dalan foun ba independénsia iha área hotu-hotu.

“Ita komemora ohin loron, aniversáriu 48.º ba Proklamasaun Unilateral ba Repúblika Demokrática Timor-Leste nian. Liu kuaze meiu sékulu, oan sira husi rai ida ne’e, ne’ebé impulsionadu ho hakarak ba autodeterminasaun no independénsia, hasa’e sira nia lian hamutuk, proklama soberania nasaun nian. Ohin, ita la’ós fó-hanoin de’it momentu istóriku ida ne’e, maibé mos haree ba futuru ho responsabilidade atu kria dalan foun ba independénsia iha área hotu-hotu,” hateten, Prezidente Republika José Ramos-Horta, bainhira halo nia disursu iha palásiu Prezidensiál Bairo-Pite, tersa 28/11.

Iha agrikultura, Timor-Leste konvokadu atu emansipa-an husi limitasaun, dedika-an ba prátika sustentável no inovasaun teknolójiku. Rai ne’ebé Timor kuda la’ós deit rai-isin, maibé Timor nia fundasaun ba seguransa alimentar no prosperidade ekonómika. Hanesan mos, Timor nia tasi no ai-laran ezije gestaun saudável no ekilibradu, atu prezerva rikeza natural ne’ebé Timor erda.

Esforsu atu hetan independénsia iha indústria no iha enerjia, importante tebes. Timor tenki aproveita enerjia verde no renovável, la’ós deit hanesan kompromisu ambientál ida, maibé mos hanesan estratéjia ba emponderamentu enerjétiku. Rekursu petróleu no minarál Ne’ebé Timor-Leste iha, dádiva husi rai laran, tenki esplora no transforma ho modu sustentável, hodi garante benefísiu ne’ebé duradouru ba povu Timor-Leste.

“Bee, essénsia ba moris, tenki jere ho sabedoria. Ita nia independénsia seiduak kompleta, se ita la bele fo garantia ba aksesu justu no sustentável ba bee ba ema hotu-hotu. Ne’e desafiu ida Ne’ebé ita envolve-an ho determinasaun, rekoñese katak jestaun efisiente ba rekursu ida ne’e mak pré-rekijitu ida ba ita nia dezenvolvimentu,” dehan Ramos.

Aleinde ida Ne’ebé, wainhira Timor avansa tuir diresaun ba adezaun Asosiasaun Nasoens Sudeste Aziátiku (ASEAN) no Organizasaun Mundiál Komérsiu (OMK), Timor-Leste iha fronteira foun ba independénsia – integrasaun rejionál. Timor tenki pozisiona-an atu sai membru ativu iha komunidade global, kompartilla no absorve koñesimentu, partisipa iha parceiru estratéjiku no konstrui ponte sira ne’ebé liga Timor-Leste ho mundu.

“Maibé, essénsia loloos husi proklamasaun foun independénsia mak iha juventude – forsa vital ne’ebé sei hametin futuru ita nian. Ita herdeiru husi legadu ne’ebé konstrui husi juventude sira iha tempu uluk, no agora, iha mundu ne’ebé dinamiku no komplikadu, responsabilidade lideransa iha jerasaun foun sira nia liman. Imi mak arkitetu ba loron oin mai, ne’ebé sai matadalan husi konhesimentu tékniku no siénsia ne’ebé sei forma tranzisaun enerjétiku, sei loke odamatan ba kooperasaun ekonómiku sustentável no sei explora oportunidade sira ne’ebé boot ne’ebé aprezenta iha ita nia oin,” nia esplika.

Nia dehan tan, Dezempregu no inseguransa alimentar, ne’ebé agrava iha períodu pandemia COVID-19 nian, impoin hanesan obstákulu signifikativu. Impaktu globál husi pandemia ne’e afeta la’os saúde públika de’it, maibé mós estabilidade ekonómiku. Aleinde ida ne’e, funu iha Ukraina no presaun inflasionáriu ne’ebé sai kausa ba ida ne’e kontribui ba volatilidade presu no distribuisaun ba bens esensiál sira, halo Timor-Leste nia luta kontra pobreza sai komplikadu liu tan.

“Ita tenki adota abordajen abrangente no inkluzivu. Investimentu iha edukasaun mak investimentu iha futuru. Ita tenki garante katak labarik hotu-hotu iha asesu ba edukasaun ne’ebé ho qualidade, kapasita sira atu hasoru dezafiu sekulu XXI no kontribui ba dezenvolvimentu sustentável. Subnutrisaun inan ho oan mak barreira ne’ebé signifikativa ba progresu. Ita presija implementa polítika no programa ne’ebé garante seguransa alimentár, hodi insentiva prátika agríkola sustentável no promove asesu ba ai-han nutritivu,” Tenik nia.

Kria oportunidade empregu, liuliu ba juventude sira, ne’e fundamental atu garante tranzisaun jerasionál ne’ebé la’o di’ak no haforsa baze dezenvolvimentu. Apoiu ba empreendedorismu, promosaun setór estratégiku no dezenvolvimentu kapasidade sira mak xave ba prosesu hirak ne’e.

“Atu Kumpri Objetivu Dezenvolvimentu Sustentável (ODS) mak jornada ida ne’ebé refleta ita nia kompromisu la’ós deit ho ita nia povo rasik, maibé ho komunidade global. Ita determinadu los atu aborda kestaun krusial sira, hanesan erradikasaun pobreza, promosaun ba igualdade jéneru, garante asesu ba edukasaun no saúde ne’ebé ho kualidade, no konstrusaun ba sidadi no polo dezenvolvimentu sustentável,” nia dehan.

Nune’e mós atu kumpri ho esperansa no obrigasaun husi ASEAN, Timor-Leste presiza reforsa infraestrutura. Konstrusaun ba instalasaun sira ne’ebé bele simu dignitáriu, delegasaun no espesialista sira mak esensiál. Melloria ida ne’e la’ós de’it hadi’a kapasidade ba servisu no hospitalidade, maibé mós iha implikasaun positivu ba setór servisu sira, inklui hotél, restaurante, transporte no komunikasaun.

Konstrusaun ba Timor-Leste ne’ebé integradu iha komunidade internasionál presiza investimentu iha infraestrutura digitál, telecomunikasaun efisiente no servisu transporte modernu. Konetividade la’ós de’it asuntu konveniénsia, maibé mós nesesidade ba partisipasaun ativa iha organizasaun internasionál.

Print Friendly, PDF & Email

LEAVE A REPLY

Please enter your comment!
Please enter your name here