Home Notisia Subsidiu Ba Membru PN Sira, FONGTIL Konsidera Politika Kanten no La Preokupa...

Subsidiu Ba Membru PN Sira, FONGTIL Konsidera Politika Kanten no La Preokupa Povu Kiak nia Moris

258
0
FONGTIL halo konferensia imprensa hodi protesta subsidiu ba membru PN sira ne'ebe halao iha edifisiu Yayasan HAK [Foto: Zevonia | 28.11.2023]

Reportajen Zevonia Vieira

Relasiona ho membru parlamentu sira ne’ebe simu subsidiu transporte no saude, nune’e Forum ONG Timor-Leste (FONGTIL) deklara hodi kontra subsidiu refere, tanba sira la sensivel ba situasaun povu nian ne’ebe barak sei moris ho kondisaun la diak.

Liuhusi konferensia imprensa FONGTIL konsidera katak reprezentante povu iha uma fukun la sente ho povu nia situasaun no kondisaun iha baze liga ho seitor saude, edukasaun, agrikultura no infraestrutura baziku, ne’ebe sedauk resolve, parte saude sei falta medikamentus, menus aimoruk, ambulansia la sufsiente, menus bee noos, livru menus, hahan merendar eskola la nutritivu.

Diretor Luta Hamutuk, Jose Alves da Costa hateten, subsidiu ba membru Parlamentu sira nudar kriasaun ba injustisa, tanba tuir nia objetivu husi politika subsidiu ida ne’e mak atu apoiu sidadaun sira, hodi bele ultrapasa iha situasaun ruma ne’ebe la diak, seraque deputadu nain 65 agora dadauk moris aat hela, mak sira tenke kria politika ne’e, para atu benefisia ba sira nia an, bele apoiu sira nia ekonomia, tuir Jose ninia rasionalidade ne’e laiha.

“Ne’e politika kanten nian, husi parte sosiedade sivil ezije ba Prezidente Republika, atu bele veta proposta Lei ne’e, tanba ne’e la justu no ida ne’e hanesan korupsaun legal ne’ebe halo husi ita nia orgaun soberano ida ba nia an rasik”, dehan Jose iha Yayasan Hak, 28/11/2023

FONGTIL husu ba membru Parlamentu Nasional tantu bloku governu no opozisaun sira, tenke tau preokupasaun ba povu nia moris, labele uza oportunidade povu nian ba sira nia an rasik, du que povu kiak no mukit.

FONGTIL haforsa tan katak termu subsidiu ne’e merese fo ba povu vulneravel sira, laos ba deputadu/a sira ne’ebe kada fulan simu osan boot., hetan pensaun oin-oin.

Sosiedade sivil sira husu ba Parlamentu Nasional ho fun boot, atu tau prioridade ba povu ne’ebe moris vulneravel tebes iha area rural, maibe deputadu sira uza fali povu nian sofrementu, povu nia votus konfiansa hodi aprov subsidiu oi-oin, atu fo deit previlejiu ba sira nia an.

Nune FONGTIL konsidera deputadu/a sira nia kompetensia Parlamentu Nasional tuir artigu 95 Konstituisaun RDTL, maibe sedauk tempu para aprova osan boot hodi fo benefisiu deit ba nia an, hodi haluhan tiha kompremisiu politika ne’ebe sira hato’o ba povu kiik sira iha tempu kampana eleitoral.

Iha semana kotuk Parlamentu Nasional aprovoa ona Projetu Lei Nu.4/VI (1 alterasaun) ba Lei nu.5/2004, 4 Maiu ne’ebe estabelese Estatutu Deputadu/a sira hodi atribui subsidiu ba saude no subsidiu ba Transporte, ho votus afavor 50, kontra nain 1, no abstensaun nain 6. Nune’e kada fulan membru parlamentu sira, sei simu subsidiu saude ho montante $600.00 no osan transporte $1.600.00

Print Friendly, PDF & Email

LEAVE A REPLY

Please enter your comment!
Please enter your name here