Home Notisia FONGTIL Kontra Subsidiu Ba MPN, Valentino: Presiza Investe Iha Setor Saude Fasilidade...

FONGTIL Kontra Subsidiu Ba MPN, Valentino: Presiza Investe Iha Setor Saude Fasilidade 50% La Asesivel

1385
0
FONGTIL halo konferensia imprensa hodi protesta subsidiu ba membru PN sira ne'ebe halao iha edifisiu Yayasan HAK [Foto: Zevonia | 28.11.2023]

Reportajen Zevonia Vieira

Forum ONG Timor-Leste (FONGTIL) husu ba membru Parlamentu Nasional (PN) atu tau atensaun ba kondisaun no situasaun povu  sira iha baze liu-liu ba problema saude, edukasaun, agrikultura no infraestrutura baziku.

FONGTIL deklara b problema sosial ne’ebe sei mosu, tanba relasiona ho subsidiu transporte no saude ne’ebe membru parlamentu sira aprovoa ona liu husi Projetu Lei Nu.4/VI ne’ebe altera on aba Lei nu.5/2004, 5 Maiu.

Hatan ba Neon Metin konaba setor produtivu sira hanesan agrikultura, ambulansia ne’ebe la sufsiente no problema saude ne’ebe sei enfrenta, Diretor Ezekutivu FONTIL, Valentino Xisto da Costa ‘Koko’ hatan katak agrikultura iha kada tinan, orsamentu ne’ebe aloka ba setor agrikultura la liu 3%, maibe situasaun atual iha terenu kuaze skema irigasaun ne’ebe konstrui la funsiona hanesan iha Maliana no fatin seluk, tanba laiha osan ba mantensaun laiha.

“Situasuan ida ne’e mak ami husu tempu ona atu investe makaas ba setor sira ne’ebe ita konsidera produtivu, tanba ita dezenvolve produsaun rai laran, mak ita sei bele apoiu politika konaba deversifikasaun ekonomia iha ita nia rain”, dehan Diretor FONGTIL, 28/11.

Diretor FONGTIL hatutan tempu to’o ona fo porsaun osan naton ba setor produtivu, edukasaun, saude, infraestrutura baziku nune’e ba oin populasaun sira bele hetan atendimentu publiku ne’ebe diak.

Konaba dadus konkritu liga ho setor saude, edukasaun no agrikultura Valentino hatan katak iha parte saude iha 50% fasilidade ne’ebe konstrui la asesivel, nune’e la premiti ba maluk defisiensia sira bele hetan tratamentu saude, fasilidade infraestrutura saude 75% ne’ebe labele fo oportunidade ba ema hotu no labele hetan tratamentu diak tanba situasuan la dun kondis ba sira nia nesesidade, tuir auditorial sosial ne’ebe halo husi FONGTIL.

Relasiona ho programa merenda escolar iha Covalima jestaun la dun lao ho diak, tanba afeta ba labarik sira nia isin, tanba ai-han ne’ebe oferese la nutritivu.

Iha fatin hanesan Diretor Luta Hamutuk, Jose da Costa hatutan konaba asuntu saude nian, katak kuaze kada postu saude iha ambulansia ida deit, signigika postu saude iha teritorio laran tomak, iha ambulansia ida ho kondutor ida. Nune nia husu tanba sa la aumenta ambulansia hodi bele atende no tula pasiente sira ne’ebe hela iha area rural.

Nune nia husu ba deputadu/a sira atu halo fiskalizasaun, nune’e bele hatene loloos kondisaun iha sentru saude sira, hodi fo hanoin ba governu sira atu dezenvolve liutan setor saude.

Nia konklui katak funsaun husi Parlamentu Nasional hodi bele hare situasaun ida ne’e, nune bele tau osan iha setor saude, no laos tau fali subsidiu ba sira nia an.

“Simu ona kareta diak, tur iha AC laran, salario mesak boot deit no subsidiu tan, hau hanoin deputadu sira ne’e moe laiha, se sira sente katak sira ne’e vulneravel”, Jose deklara iha Yayasan Hak, 28/11.

Iha semana kotuk Parlamentu Nasional aprovoa ona Projetu Lei Nu.4/VI (1 alterasaun) ba Lei nu.5/2004, 4 Maiu ne’ebe estabelese Estatutu Deputadu/a sira hodi atribui subsidiu ba saude no subsidiu ba Transporte, ho votus afavor 50, kontra nain 1, no abstensaun nain 6. Nune’e kada fulan membru parlamentu sira, sei simu subsidiu saude ho montante $600.00 no osan transporte $1.600.00

Print Friendly, PDF & Email

LEAVE A REPLY

Please enter your comment!
Please enter your name here