Home Memoria Biografia: Saudoso Prof. Doutor Lucas da Costa “Rama Metan” (parte 2)

Biografia: Saudoso Prof. Doutor Lucas da Costa “Rama Metan” (parte 2)

568
0

Obra sira mak saudoso dezenvolve

Alein de harii RENETIL, hafoin Referendum, saudozu fila mai Timor harii Institutu Superiorde Ekonomia e Jestaun(ISEG), iha Dili, no  nia sai Reitor rasik ba ISEG. Hosi ISEG, hamutuk ho Timoroan sira seluk, tranforma ISEG no harii UNDIL, nia mak sai Reitor ba UNDIL. Iha 2000, nia harii no sai Diretor ba Centro de Gestão das Pequenas Empresasde Timor-Leste (CEGEPTIL).

Iha 1998, saudozu Rama Metan hamutuk ho ninia Companheiro sira harii Fundasaun Haburas, ne’ebe ikus mai entrega ba Demetrio Amaral de Carvalho, atual Sekretariu Estadu ba Meioambeinte mak lidera.

Saudozu Rama Metan, hamutuk ho ninia Companheiro sira, harii Partido Democrático (PD). Nia sai Primeiro Presidente do Conselho Politico Nacional (CPN). Rama Metan rasik mak prepara no elabora Manifesto Politico Partido Democrático nian Iha 2001. Nia eleitu nudar Deputadu Parlamento Nacional hosi Partido Democrático (PD), periodu 2007 – 2012.

Iha 2003, Rama Metan hamutuk ho ninia maluk Ermera oan sira, sira harii Fundação LAHER (Letefoho, Atsabe, Hatolia, Ermera, Railaco) nebe hamahon East Timor Coffee Academy (ETICA), agora sai East Timor Coffee Institute (ETCI).

Iha 2004, nia fahe malu ho UNDIL tanba problema internu balun. Nia hamutuk ho  ninia Companheiro sira seluk, sira harii Universidadeda Paz (UNPAZ) no nia sai Reitor to’o hakotu iis.

Eskola no Hanorin

Saudozo hahu iskola Primaria iha Colegio Infante Sagres Maliana. Hafoin kontinua ba Kolegio San Francisco Xavier Dare 1961-1962. Tama Seminario Nossa Senhorade Fatima, Dare, Dili, hosi 1962-1964.Nia sai ona profesor ho idade kik hanorin iha Eskola Primaria iha Atsabe, Hatolia no Bobonaro.

Iha 1968 to’o 1972, Saudozo kontinua kursu de Enfermajen Jeral iha Lahane Dili ho primeiru klasifikadu. Tanba nia saudoso nia matenek nia hetan fiar nudar Enfermeiru no sai Diretor Hospital Manufahi, iha Same, iha 1974.

Iha 1987, Rama Metan hasai ninia Lisensiatura iha Ekonomia, hosi Universidade Pendidikan Nasional(UNDIKNAS), Denpasar, Bali. Nia hasai nia kursu iha tinan 3 resin nia laran ho predikat Summa CumLaude.

Rama Metan hasai Mestrado iha Gestão Estrategica, Faculdadede Economia, hosi Universidade Airlangga (UNAIR), Surabaya, Indonezia, iha 1993. Iha 1998, saudozu konklui kursu doutoramentu iha area Micro Economia, hosi Universidade Airlangga.

Durante tempo okupasaun, hosi 1993, saudozu sai Dosente iha Universidade sira Indonezia nian, iha Surabaya hanesan Airlangga, Widya Mandala, Wijaya Kusuma, no Universitas Surabaya (UBAYA).

Domin sira mak saudoso husik hela

Saudozu Rama Metan, hosik hela faluk na’in 3, oan na’in 7,feto 1 no mane 6 ho bei-oan sira hamutuk nain 12. Faluk nain 3 ne’e mak Maria Filomena da Cruz Costa, Fatima Filomena Rosa Lay da Costa no Yahyuk Veronica Rahayu, ho oan sira mak Nani Rolanda Paula da Cruz e Costa(Manoca), Jose Nilton Gomes da Costa (Toze), Leão Maususar da Costa, Ivo Colimau Lay Costa, João Bosco Lay da Costa, Miguel Lucas Lay da Costano Liberto Geramar Maria da Costa.

Valores mak husik hela

Ohin Rama Metan hosik hela ita hotu, maibe nia hosik hela valor lubun boot ida, valor nudar edukador, nudar mestre no nudar aman nebe hakarak eduka Timor-oan sira. Nia ema ida kritiku tebes, konseptor  no estratega boot ida. Nia nudar ema kombatente ida iha nia vida tomak, tama sai kadeia, maibe la deziste hosi luta. Nia ema ida responsavel, iha disiplina maka’as, iha determinasaun, dedikasaun, no abnegasaun maka’as. Ema ida sempre tau uluk interesse comum iha oin duke interesse pessoais. Rama Metan, emai da simples no adapta-an lais ho ema hosi klase hotu-hotu. Nia ema ida ho espiritu joven hela deit, ema ida iha espirito de solidariedade no fraternidade maka’as. Ohin ita halot nia isin, maibe lahakoi ninia mehi, lakohi valores diak sira nebe nia iha. Mehi no valores sira kontinua moris no buras. Tanba ida ne’e mak bolu herói, tanba herói nunka mate no sei hela iha ema hotu nia memoria hosi jerasaun ba jerasaun.

Adeus, Adeus, Adeus Pai, Maun, Mestre no Companheiro de Luta. Ate Sempre!

LEAVE A REPLY

Please enter your comment!
Please enter your name here