Home Memoria Biografia: Saudoso Prof. Doutor Lucas da Costa “Rama Metan” (parte 1)

Biografia: Saudoso Prof. Doutor Lucas da Costa “Rama Metan” (parte 1)

971
0

Moris no entrega-an ba luta libertasaun nasional

SaudozuLucas da Costa, ho naran funu 4, Colimau, Lahe Mau, Asa-Bere no Rama Metan. Nia kuinesidu liu ho naran Rama Metan.

Rama Metan, oan mane ba dahuluk hosi maun-alin nain 5, mane 3 no feto 2. Oan mane 3 mak Lucas da Costa Rama Metan, Raimundo Gonçalves no Lahe-Mau. Oan feto 2 mak Sose-Mali no Bui-Rai. Rama Metan moris iha dia 11 de Janeirode 1952, iha Atsabe, Ermera.

Nia Aman Aça Bere, hosi Uma Lisan Ai-Lecono Inan Olo Leço, hosi Uma Lisan Lako Ubu. Sirarua hotu hosiAtsabe.

Iha 1974 to’o 1975, saudozu Rama Metan sai Delegadu no Presidente do Comite Regional da ASDT/FRETILIN, iha Manufahi. Saudozu hamutuk ho Timor oan nain 42, Proklama no  subscreve Inssureisaun Jeral Armada iha Aisirimou, Aileu. FALINTIL moris hosi Proklamasaun Inssureisaun Jeral Armada ida ne’e, iha dia 15 de Agostode1975. Loron 2 hafoin deklarasa insuresaun  (17deAgosto1975), saudozu rasik, hamutuk ho Nicolau Lobato, Alarico Fernandes, Abel Larisina, ho seluk-seluk tan, assalta no hadau Kompainia militar Portugues nian iha Aileu. Iha falun balun nia laran, tinan 1975, hetan fiar hosi FRETILIN hodi sai Responsavel Principal ba  Komisaun de Inquerito do Comite Centralda FRETILIN (CCF) ihaAileu.

Iha Fulan Setembru 1975, Rama Metan desloka hamutuk ho FALINTIL ba Atsabe hodi hala’o knar hanesan enfermeiru no mos hanorin kursus enfermajen ba Timoroan. Iha  Outubro de 1975, Rama Metan harii Eskola Infarmaria, primeira eskola ne’ebé Timor- Oan rasik mak harii no jere. Fulan hirak liu tiha, iha Novembro de 1975, wainhira FRETILIN forma Primeiru Governu, saudozu Nicolau Lobato, konvida Rama Metan atu sai Vise Ministrude Saúde, maibe nia rekuza. Maski nia rekuza atu sai Vice-Ministrode Saude, maibe CCF bolu nia hodi hamutuk ho Ministru Guido Valadares, dezenvolve sistema saúde iha Primeiru Governu FRETILIN ne’e.

Konfiansa Nicolau Lobato ba Rama Metan

Iha 6 de Dezembru 1975, bainhira forsa Indonesia tama iha Atsabe, saudozo Rama Metan muda ba Hatulia no Fatubesi hodi kontinua resiste. Iha fulan hanesan, loron 8 de Dezembrode 1975, Rama Metan hasoru malu ho Vise Prezidente no Primeiro-Ministro RDTL, NicolauLobato, iha Balibar, hodi husu nia fila fali ba Atsabe. IhaAtsabe, Rama Metan komanda Grupu ida hodi tiru malu hasoru forsa Indonesia nian to’o kilat musan hotu iha combate. Tuir mai nia lidera grupu ida ho naran “Antenas da Resistencia” ka “Grupu Analiza Polítika” iha Fatubesi. Rama Metan ninia knaar mak halo rezumu no halo analize politika no militar, bazeia ba notisia sira nebe Grupo ne’e halibur, hosi radiu internacionais hosi dalen Indonesia, Francês, Ingles, Espanhol no Português.

Iha inisiu 1976, liu husi radiograma, Nicolau Lobato nomeia Rama Metan ba Diretór da Cruz Vermelha de Timor-Leste. Iha meados 1976, Nicolau Lobato haruka saudozu ba Sentru-Leste. Iha Waimori, Komisáriu Polítika Sentru Leste, Vicente dos Reis SAHE, fó fiar ba Rama Metan hodi lidera peskiza fitoterapia ida hodi haloai-moruk tradisional. Ai-moruk halo husi ai-kulit, ai-abut no ai- tahan sira. Iha Waimori mos nia harii ÓSPITAL hodi halo esperimentasaun ba ai-moruk sira.Nia halo ai-moruk musan (comprimidos) no ai-moruk been, likidus, hodi halo injeksaun ka sona ema moras sira.

Iha 1977,Rama Metan mos lidera Ekipa de Cirurgião ida, hodi halo operasaun ba membro FALINTIL ida naran Marçal Monteiro, ema Ossu, nebe hetan tiru iha combate. Marçal Monteiro hetan tiru iha ninia kosteletas no borus iha hirus matan, ninia pulmaun to’o tabele sai. Ho  esperiensia ne’ebé natoon, Rama Metan, lidera operasaun ne’e, suku matak de’it, no consegue salva duni pasiente nebe kanek todan no moris to’o ohin loron.

Hetan Tiru, Kanek, Kaer no Kastigu

Iha 1978, Rama Metan, ho komisáriu Polítiku  Abel Larisina, harii kompañia ida ne’ebé lidera husi Saudozu Mau-Kalo no Abel Larisina. Rama Metan lidera  kompania 1 ho membrus na’in 11, hetan assaltu hosi forsa Indonesia  nian. Iha assaltu ne’e, Rama Metan hetan tiru iha kabas liman los, kabun no kelen, maibe nia konsege eskapa. Tanba kanek no ninia kondisaun saúde aat tebes ona, mosu ular hosi nia kanek sira, no atu susar la’o. Ho kondisaun ida nune’e, HANSIP sira hetan no kaer nia. Sira lori nia ba detein iha Barike, depois ba tutan Natarbora, no hela iha neba durante tinan 2.

Harii, Organiza, no Orienta RENETIL

Iha 20 de Junho de 1988, nia uza naran Lahe-Mau, hamutuk ho estudantes na’in 9 seluk, sira harii Resistência Nacional dos Estudantes de Timor-Leste (RENETIL), iha Denpasar, Bali, hodi organiza no mobiliza estudantes Timoroan sira hodi luta no reziste hasoru okupasaun Indonesia nian iha Timor-Leste. Nia la’os fundador de’it, maibe mos hanesan mestre no konseptor ba planos no estratejias RENETIL nian. Nia mak prepara no hakerek rasik Proclamação da Inssureição Política dos Estudante de Timor-Leste, proklamasaun ida nebe inspira hosi Proclamação da Inssureição Geral Armada iha Aileu, iha1975.

Tinan ida liu tiha (1989), Rama Metan sai Premeiru Chefe de Redasaun no Editor ba Boletin Neon Metin, primeiro Boletin Klandestina nian. Iha Boletin ne’e, nia uza naran Asa-Bere. Iha momentu hanesan sai mos Presidente do Conselho Curadorda RENETIL, orgaun ida nebe halo acompanhamento no supervizaun ba serbisu sira executivos nian (1990 to’o 1992).

Hafoin de militar Indonesia kaer saudozu La Sama, ho estudante sira seluk  iha Novembro 1991, Rama Metan sai Koordenador ba Prezidium da RENETIL, orgaun ida nebe hamosu hamutuk ho Comite Permanente do Conselho Central da RENETIL, hodi halo reoganizasaun no reestruturasaun ba RENETIL hafoin organizasaun ne’e hetan desmantelamentu, iha tinan 1992 to’o 1999.

*(sei kontinua ba parte 2)

 

LEAVE A REPLY

Please enter your comment!
Please enter your name here