Reportajen David da Costa Gusmao, Celisto dos Santos Oqui
Relasiona ho kazu abuzu sexual ne’ebé hasoru RD, husi ordenasaun, Society of the Divine Word (SVD) komete, aban loron 21 Dezembru oras tuku 9:00 otl, iha Tribunál Distritál Oe-cusse (TDO) sei halo leitura ba desizaun ikus ba kazu Topu Honis, no sei nakloke ba públiku sira atu bele partisipa.
Ofisiál Justisa Tribunál Distritál Oe-cusse (OJTDO), Julio Nunes dehan ba Neon Metin katak, aban ne’e proseu ikus ba iha leitura kazu Topu Honis, ne’ebé obrigatoriu arguidu tenke marka prezensa iha Tribunal, konaba vitima sira, depende ba sira, sira hakarak mai laiha buat ida, maibe la mai mós laiha buat ida.
“Mais arguidu mak tenke marka prezensa iha Tribunál, no daudaun ne’e arguida iha ona Oe-cusse, ne’ebe aban lee leitura ne’e iha oras tuku 9:00 dadeer. Depois loke ba públiku, ita boot sira bele asiste no ema hotu bele asiste,” Dehan Ofisiál Justisa Julio ba Neon Metin iha Tribunál Distritál Oe-cusse, Segunda 20/12.
Kazu Topu Honis mak nudar kazu pedofilia ne’ebe mosu dahuluk iha Timor-Leste, involve hosi eis padre RD hosi kongregasaun Society of the Divine Word (SVD), no RD hetan konfirmasaun komete kazu abuzu sexual, violénsia doméstika no pornografia labarik.
