Reportajen Umbelina dos Reis
Relasiona ho selebrasaun loron Internasional Feto, Gabinete Vice-Reitora Asuntu Estudantil, Universidade Nasional Timor Lorosa’e (UNTL), liu hosi Unidade Asuntu Relasiona ho Kestaun Polítika no Kestaun Jéneru, organiza CAFÉ-Género liu hosi meza redonda iha Kuartel Jeral F-FDTL Fatuhada, Dili.
Iha komemorasaun ne’e, Vice-Reitora Asuntu Estudantil, UNTL, Lizia Tomás Coreia, hatete, ohin loron 8 Marsu hanesan loron feto Internasional, feto Timor oan hotu partisipa loron importante ne’e hodi hatene ein termus de liderasa, polítika, siénsia, teknolojia, iha komemorasaun loron feto ne’e.
Nia dehan tinan ne’e sira foti tópiku ligadu ho área dijitalizasaun, hasa’e feto nia koñesimentu ba inovasaun teknolojia, seguransa hodi koñese kle’an liu tan servisu ne’ebé liga ba área dijitalizasaun.
Tanba ne’e UNTL konvoka hamutuk ho universidade privada sira, feto potensiál no professional sira hodi partilla esperiénsia no koñesimentu ba estudante sira liu-liu feto foinsa’e sira, hodi banati tuir nafatin inan feton sira ne’e luta ba igualdade jéneru.
Aproveita ho selebrasaun loron feto ne’e Vise-Reitora ne’e mos hato’o katak UNTL mos iha programa konjunta ida ho UN Women hodi halo atividade “Kampus Seguru” ho nia objetivu atu fo seguransa ba estudante hotu-hotu ne’ebé estuda iha UNTL liu-liu feto sira bele sente konfortável no kria kondisaun oinsá bele fo akompañamentu wainhira iha tempu estuda.
“Esforsu hotu ne’ebé ami Universidade Nasionál halo ne’e, ita mos iha unidade ne’ebé gabinete ba Pró-reitor no akonsellamentu hosi parte UN Women fasilita ona fatin ne’ebé mak fo akonsellamentu ba estudante feto sira wainhira sira hetan problema ruma” dehan Vice-Reitora Lizia iha Kuartel Jeral F-FDTL, Fatuhada, Kuarta-feira, 08/02.
Nia informa katak, sira mos iha ona kanal ida hodi fo oportunidade ba estudante sira, atu entende di’ak wainhira sira hetan problema ruma ou sente la konfortável estuda iha ambiente universitáriu.
“Liu hosi etapa no kanalizasaun sira ne’e hanesan akompañamentu, hodi nune’e estudante sira bele hasoru profesor sira, wainhira professora sira bele fo apoiu. Komunikasaun ne’ebé besik no mos liu hosi sira nia kolega ida ne’e sai hanesan pontu ne’ebé hosi Universidade Nasional Timor Lorosa’e iha hodi fo nafatin kanalizasaun ba sira, nune’e oinsá bele buka solusaun wainhira sira enfrenta problema ruma iha ambiente estuda nian iha UNTL.” Nia konklui.
