Home Notisia Prezidente Republika Ohin Haruka Pedidu Ba PN Hodi Extende EE Ba Dala-10

Prezidente Republika Ohin Haruka Pedidu Ba PN Hodi Extende EE Ba Dala-10

441
0
Asesor Politika Palaciu Prezidensial, Gregorio de Sousa. [Foto: Santina Lucia da Costa | 26.01.2021]

Reportazen Santina Lucia da Costa

Prezidente Republika, Dr. Francisco Guterres Lu-Olo halo enkontru ho membru Konsellu Superior Defeza no Seguransa (KSDS) no Konsellu Estadu (KE), hodi disidi fó apoiu tomak atu extende tan Estadu Emerjensia (EE) ba dala-10.

Hafoin enkontru entre KSDS no KE ba Jornalista sira Asesor Politika Palaciu Prezidensial, Gregorio de Sousa informa katak Prezidente Republika halo enkontru hodi nune’e renova estadu emerjensia no sei husu autorizasaun husi Parlamentu Nasional. Se Parlamentu Nasional aprova pedidu ne’e, Prezidente Republika sei deklara EE liuhusi dekretu Prezidensial.

“Iha semana kotuk Prezidente Republika simu karta ida husi Governu, para atu renova Estadu Emerjensia ba dala-10, husi Prezidensia koordena ho serbisu parlamentu nian, halo oinsa atu bele ajenda ba semana oin nian iha Parlamentu hodi aprova ka lae”, dehan Gregorio de Sousa, iha palacio prezidensial, 26/01.

Nia hatutan reuniaun Konsellu Superior Defeza no seguransa (KSDS) ho Konsellu Estadu (KE) disidi fó apoiu tomak ba Prezidente Republika, para renova Estadu Emerjensia  ba dala-10.

Gregorio de Sousa mos informa katak ohin Prezidente Republika sei haruka pedidu ba Parlamentu Nasional. Parlamentu Nasional ohin kedas halo konferensia lideres para ajenda ba aban lokraik, ba debate renovasaun Estadu Emerjensia. Se sira aprova duni, klaru ke sira haruka fali mai Prezidente Republika para promulga depois Prezidente Republika halo dekretu renovasaun Estadu Emerjensia.

Gregoriu Sousa dehan medidas ba implementasaun Estadu Emerjensia, governu  maka sei desidi depois Parlamentu Nasional aprova tiha Estadu Emerjensia, governu sei halo dekretu implementasaun, sei halo nafatin hanesan Estadu Emerjensia agora nian ka aumenta tan nia ristrisoens ka lae, ne’e kompetensia  governu  nian, tanba ita haree situasaun iha NTT agrave demais ona ne’e perigu ona.

Iha fatin hanesan Diretor Ezekutivu FONGTIL, Daniel dos Santos hateten hanesan sosiedade sivil partisipa atu fó opiniaun ruma liga ho pedidu governu extende tan Estadu Emerjensia ba dala-10.

“Ita nia opiniaun mak Ministeriu hotu tenki halo intervensaun  integradu  ba prevensaun COVID-19, mais laos de’it Ministeriu Saude, intervensaun intergradu ne’e haree husi Obras Publiku nian bele halo iha  fornese bee iha fatin publiku sira, liuliu oinsa maka ema bele fase liman ho sabaun, bee disponivel iha fatin hotu para atividade preventivas ne’e bele lao”, esplika, Diretor Ezekutivu FONGTIL.

Nia hatutan ba Ministeriu Estatal oinsa maka atu halo edukasaun konselizasaun iha komunidade, liuliu estrutura iha suku, ba evita atividade sira halibur ema barak la kumpri regras sira ne’e, “ita tenki halo intervensaun integradu ba prevensaun COVID-19”, hateten Daniel.

Print Friendly, PDF & Email

LEAVE A REPLY

Please enter your comment!
Please enter your name here