Reportajen Agustinha Amaral
Ministériu Obras Públika, lidera reuniaun inter-ministerial hodi ko’alia konabá asuntu bee-moos, ligadu ho asuntu bee-moos, governante ne’e sei fo orientasaun ba Sekretáriu Estadu Eletrisidade, Água e Saneamentu atu forma ekipa ida para hodi haree oinsá bee ne’e bele reorganiza ho didi’ak hodi nune’e bele fornese to’o ba ema hotu-hotu nia uma.
“Kona-ba bee moos ne’e ita la’os la iha bee, ita iha bee barak, maibé bee seidauk organiza ho didi’ak no bee barak maka soe de’it, tamba ne’e ita presija forma ekipa integradu ida para bele haree hotu servisu sira ne’e ligadu ho bee-mos,” dehan Ministru Obras Públika, Samuel Marçal, tersa-feira, 26/09.
Governante ne’e hatete, problema bee-moos ne’ebé dadaun ne’e enfrenta, la’os iha MOP nian de’it, maibé problema ne’e interligadu ho ministériu relevante sira seluk, ne’ebé marka prezensa iha reuniaun ida ne’e, tanba ne’e presija iha koordenasaun servisu hodi rezolve problema bee-moos iha teritóriu Timor laran.
Kona-ba fundus, Ministru Obras Públika afirma, tau ona osan iha kada ministériu, dadaun ne’e presija de’it servisu ekipa, fundus ba bee-moos ne’e Governu investe ona iha Bee Timor-Leste (BTL.E.P), liu hosi Programa Nasionál Dezenvolvimentu Suku (PNDS).
Governante ne’e akresenta, problema bee-moos iha Timor laran tomak inklui Dili barak mak saidauk asesu bee-moos, hanesan fatores ida kontribui ba moras oi-oin.
“Ne’e mak iha nunu governo ita hakarak entre ministerial ida halo kordenasaun lidera husi Ministru Obras Públika, BTL nu’udar iha ministru nia okos para halo kodernasaun di’ak para ita halo jestaun, halo konstrusaun para oferese bee kualidade di’ak ba ita nia inan-aman sira.”
Nune’e ita servisu ba rai no povu ida ne’e tenki halo kordenasaun di’ak entaun presiza kuida di’ak bee matan tanba bee importante ba ema no balada, tenik nia.
“Espera líder komunitáriu kolabora hamutuk ho inan-aman sira nune’e iha konsiénsia hodi kuida bee, nune’e bainhira uma kain ida-idak hetan ona bee-moos entaun kuida rekursu tanba bee ne’e important nune’e labele estraga torneira no kanu sira.” Nia fo hanoin.
Ministériu no entididade sira ne’e partisipa iha reuniaun ne’e maka hanesan, Ministériu Saúde, Ministériu Edukasaun, Ministériu Agrikultura, Pekuária, Peska i Florestas, Ministériu Ensinu sluperior, Siensia i Kultura, Ministériu do Petróleu e Rekursus Minerais, Ministériu Planeamento i Investimentu Estratéjiku, Ministériu da Administrasaun Estatal, Komandante PNTL Munisipiu de Dili, Prezidente Autoridade Munisipiu Dili, Prezidente BTL,E.P. no Sekretáriu Estado Eletrisidade, Água e Saneamentu, hodi hare konaba problema Bee-moos iha Timor-Leste.