Reportajen Adroaldo “Saretukau”
Ho greve (mogok) ne’ebé mikrolete 10, 11, 13 no 03 halo ohin kuarta-feira (04/10) tanba folin mina sa’e, estudante ensinu sekundária no universitáriu sira mak hela hosi parte oeste hato’o, situasaun ida ne’e difikulta tebes sira nia viajen ba eskola no fila uma, nune’e sira husu governu tenki halo intervensaun lalais, nune’e bele normaliza fila-fali situasaun refere.
Estudante ensinu sekundária públiku Nobel da Paz, Cecília de Deus Araújo ne’ebé hela iha Tasi-Tolu, hato’o ohin (04/10) sira mai eskola mikrolete halai hela, maibé fila ne’e mak sira hein maibé kareta la halai entaun ida ne’e sei difikulta nia ba mai eskola, tanba dook.
“Ohin bemo iha maibé selu karun, 0.50 cent, 0.25 cent. Agora bemo laiha ami araska tanba atu la’o mos dook.”
Sé bemo la halai oinsá mai eskola? Nia hatan “ne’e eskola la mai ida. Husu ba governu para hatuun mina nia folin para bemo halai fali.”
Sorin seluk estudante Universidade Dili (UNDIL), Alina Bui-Mau dos Santos Perreira hatete, “horseik ami sa’e bemo 10, kondutor ida mak dehan hanesan ne’e, horseik estudante barak mak sa’e bemo, selu so 0.15 cent, 0.25 de’it, ne’e mak maun sira la simu.”
Sé mikrolete la halai fila-fali ba uma no mai eskola oinsá? “Sente araska oi-tuan. Ami husu ba governu atu tau matan ba ami estudante sira, tanba ami estudante sira ne’e sa’e bemo araska oi-tuan.”
Nune’e mos estudante UNTL, Departmentu Eletróniku, Francisco Felix Freitas, hela iha Komoro, ne’ebé ba eskola iha Hera, sente difikulta nia tanba hela dook, nune’e nia husu ba governu atu rezolve lalais problema ne’e.
“Bemo la halai, difikuldade ba ami estudante sira, tanba bemo agora 10 ho 03 la halai, difikulta tebes ami estudante sira iha área Komoro nian ba Tasi-Tolu, difikulta ami asesu ba bemo. Tan ne’e husu ba governu aselera lalais meius transporte ne’ebé ami enfrenta hela iha loron ida ohin (04/10).”
Fatin hanesan, Elício Lopes, Estudante UNTL, Fakuldade Agrikultura, hela iha Ai-mutin hatete, ba nia la iha dikuldade tanba nia diresaun ho bemo 06 halai hela maibé ba nia ida ne’e difikuldade ba estudante no ema sira ne’ebé hela iha diresaun refere.
“Iha diresaun ha’u nian laiha difikuldade tanba bemo halai hela, ha’u haree fali ba kolega sira seluk ne’ebé hela konabá diresaun bemo 03 ho 10 nian ha’u hanoin difikuldade ba sira tanba loro-manas, pois bemo la halai entaun hakarak ka lakohi sira tenki buka bemo ne’ebé mak jalur besik ho sira nia hela fatin.”
“Liu aban mak kuandu bemo la halai, difikuldade ona ba sira nia estudu, kada ves sira mos la iha vontade ona atu ba eskola.” Nia Preokupa.
“Ba governu atu buka meius nusa, agora da-dauk ita hatene katak problema iha mina ho folin sa’e ne’ebé difikulta bemo la halai, entaun governu bele buka solusaun para oinsá atu reduz mina nia folin ka importa lalais mina ne’e mai, atu nune’e transporte sira bele halai fali, hodi labele fo tan difikuldade ba ita povu ai-leba ne’ebé agora da-dauk la’o.”