Reportajen Agustinha Amaral
Diretór Ezekutivu Centro Nacional Chega (CNC!), Hugo Maria Fernandes ho Ministra Edukasaun (ME), Dulce de Jesus Soares asina nota entendimentu ba kooperasaun servisu tinan 3 iha área edukasaun, fortalesimentu institusional no dezenvolvimentu polítika edukasaun nian. Nota entendimentu ne’e mos atu kontinua suporta atividade sira durante ne’e la’o ona liu-liu formasaun ba profesor sira, kompetisaun sertame, estabelesimentu biblioteka Chega! iha eskola.
Diretor Centro Chega dehan, ensinu báziku nia matéria husi Chega integradu, tinan ida ne’e Centro Chega kontinua fo apoiu ba iha Ministériu Edukasaun hodi integra konteúdu relatóriu Chega no relatóriu CDA nian iha terseiru siklu no eskola sekundáriu, klaru ema hanoin livru hotu-hotu tenki tama maibé ne’e esforsu ida ne’ebé komplikadu oi-tuan i sientífiku, tanba ne’e husi parte CNC nian prontu atu kontribui matéria saída de’it ba Ministériu Edukasaun oinsá selesiona ona matéria sira ne’e haree ba nível eskolaridade ne’ebé tama iha terseiru siklu, ida ne’ebé tama iha sikundáriu depois de kontinuasaun.
“Ida ne’e ami hein nota intendimentu, esforsu ne’ebé Centro Chega halo hamutuk ho Ministériu Edukasaun, dala ruma iha tinan ida ou tinan rua nia laran ita nia kuríkulu terseiru siklu ho sikundaáriu bele iha fatin ona. Ne’e atu garante husi relatóriu rua, ne’e ita hetan kuríkulu ensinu maibé hanesan atividade sira seluk siénsia kontinua halo hanesan apoiu ne’ebé mak maka’as ba Ministériu Edukasaun ba professora/professor sira.” Dehan Direitor Hugo ba jornalista sira iha salaun CNC, tersa-feira, 03/10.
Iha oportunidade ne’e, Diretór Ezekutivu CNC! entrega livru tolu ba Ministra Edukasaun hanesan, The Santa Cruz Massacre 1991, Thirty Years on Understanding Timor-Leste, The National Liberation Struggle of Timor-Leste. Livru hirak ne’e produz husi Timor-Leste Studies Association (TLSA) ho kooperasaun Centro Chega.
Iha fatin hanesan Ministra Edukasaun, Dulce de Jesus Soares agradese Centro Chega ba kooperasaun hodi tulun Ministériu Edukasaun iha aspetu edukasaun ba konteúdu matéria istória Timor-Leste. Nia dehan, Diretor Chega, konsidera Ministériu Edukasaun nu’udar parseiru importante tanba ne’e Centro Chega iha komitmentu kontinua servisu hamutuk.
“Nota entendimentu ne’e hanesan kontinusaun nota entendimentu ne’ebé halo ona iha 2018, mezmu ke edukasaun servisu tiha ona ho Centro Chega iha momentu ida halo revizaun ba kuríkulu primeiru no terseiru siklu inklui ona matéria istória produz iha Chega kuríkulu iha kintu no sestu anu.”
Serimónia ne’e partisipa husi parseiru sira no realiza iha Salaun Konferénsia Centro Chega, Balide, Dili.
