Reportazen Santina Lucia da Costa
Kazu soe bebe iha tinan hirak nian laran sai issue boot ihaTimor-Leste no sai viral iha social media. Relasiona ho kazu refere, Sekretariu Estadu Juventude Desportu (SEJD) iha ona planu atu halo formasaun sidadania ba juventude sira, atu hamenus kazu soe bebe iha Timor-leste
Sekretariu Estadu Juventude Desportu (SEJD), Abrao Saldanha hateten agora dadaun iha hela formasaun edukasaun sivika no sidadania implementa husi SEJD ho Parseiru sira hanesan Cruz Vermelha Timor-Leste (CVTL) ho Aluno Parlamentu Foinsa’e Timor-Leste (APFTL) hodi implementa iha komunidade sira.
Abrao Saldanha dehan, kona-ba soe bebe agora dadaun dezenvolve modulu ida atu halo formasaun, diskusaun ho igreja Katolika hotu ona, agora atinji ona 80% modulu.
“Konaba soe bebe agora dadaun dezenvolve modulu ida atu halo formasaun, diskusaun ho igreja katolika hotu ona, agora 80% modulu ne’e, depois hotu ida ne’e sei lori modulu ne’e ba halo formasaun ba sentru juventude sira, tama iha eskola, tama iha grupu juventude sira nia leet, atu halo kampanya no sensibilizasaun ba prevensaun isin rua la hakarak ho soe bebe”, dehan Abrao Saldanha ba jornalista sira hafoin asina akordu ho UNTL iha salaun sentral UNTL, loron, 11/08.
