Reportajen David da Costa
Relasiona ho informasaun ne’ebé lansa iha media sosial katak, mina Gasolina atu hotu, tanba ne’e iha Pertamina Mira Mar Fuel, motorista sira kontinua ba forma, to’o dudu malu nune’e bele ense mina ba kareta ho motor sira, no balun lori jerigen mamuk hodi ense mina
Ho situasaun ne’ebe akontese, motorista Bendita Freitas hateten Timor-Leste ne’e nasaun kiik hela, mas nusa maka bele hasoru hela problema hela deit ba mina laiha, ema nasaun boot sira la hasoru problema hanesan. Tanba ne’e, governu foun mai, tenke haree be kestaun sira ne’e hodi resolve.
“Ha’u mai ense mina, mina hela kotak ida deit atu hotu ona. Ha’u sente triste tebes mai forma hanesan ne’e, ha’u nia kondisaun isin rua tan, fila husi servisu fatin sedu, para mai antrian hodi ense mini, tanba tauk kalan mak mai antrian fali,” dehan Motorista Bendita ba jornalista Neon Metin Iha estasaun mina Mira Mar Fuel Fatuhada, Sexta 9/06.
Nune’e, mós Motorista Bendita, iha esperansa ba governu foun mai, bele hadi’a tiha problema sira hanesan ne’e, atu nune’e povu sira labele kontinua hasoru hela problema sira hanesan ne’e.
Iha fatin hanesan Motorista Eligario Pinto, hateten, Timor ukun-an ona tinan 20 liu ona, maibé Timor-Leste kontinua hasoru hela problema sira hanesan ne’e, ida ne’e problema boot ba Timor, no bele impede atividade sira barak no progresu dezenvolvimentu Timor nian.
“Ha’u nia mina besik maran ona ne’e maka ha’u mai ense, iha ne’e mas antri loos. Hau sente triste loos Timor ukun-an ona tinan 20 mas hasoru hela deit problema hanesan nene’e ladiak. Mina importante ba transporte publiku sira no privadu sira, tanba iha Dili ne’e maioria uza transporte hodi faselita ami nia servisu lorloron, mina laiha ami labele hala’o ami nia atividade, tanba ne’e parte relevante sira prezisa haree problema ne’e,” dehan Eligario.
Nune’e motorista Eligario Iha esperansa boot ba iha governu foun mai katak bele hadia problema sira hanesan ne’e, tanba Mina sai fator importante ba transporte publiku sira, liuliu kareta no motor sira, tanba iha dili ne’e maioria uza tansporte hodi halo sira nia servisu lorolorn nian.
Enkuantu Tuir objervasaun Jornalista iha tereinu nota katak, iha pertamina Mira Mar Fuel ne’e motorista sira iha dader tuku 8:00 ba leten ne’e tan hahú antria hodi hense mina ba motor ho kareta iha loraik tuku 16:30 motorista sira kontinua forma atu hense mina ba iha motor no kareta sira. Nune’e mós komunidade no motorista balun lori masa mamuk hodi hense mina.
Entertantu iha pertamina Mira Mar Fuel ne’e, kareta ho motor sira kontinua forma ne’ebe naruk, no hamosu tráfiku iha dalan boot, tanba barak mak ense mina, no fo impaktu ba movimentu iha estrada boot. Iha fatin refere hetan seguransa husi Polisia, hodi evita akontese violénsia ruma.
Iha sosial media hatudu katak, iha estasaun mina balun hamosu tuku malu entre joven sira, tanba kauza husi hadau malu fatin hodi ense mina.
