Home Notisia Lian EhD no Joven Sira Ba Atual Prezidente Horta Hodi Responde Povu...

Lian EhD no Joven Sira Ba Atual Prezidente Horta Hodi Responde Povu nia Preokupasaun

167
0

Reportajen Santina Lucia da Costa

Komunidade sira, joven inklui Ema ho Defisiénsia (EhD), hato’o sira nia esperansa ba atuál Prezidente Republika, Dr. Jose Ramos Horta, tenki tau matan ba ema ho defisiénsia (EhD), kria kampu serbisu ba joven sira, tau matan mós ba feto faluk, oan ki’ak, ferik-katuas sira, no hadia Estrada, Eletrisidade hodi nune’e povu bele senti dezenvolvimentu Timor-Leste nian.

Timor-Leste restaura ona nia independénsia ba dala 20, sei iha serbisu lubuk ida ne’ebe estadu ne’e presiza responde, atu bele hasai povu husi mukit. Oinsa mak joven sira bele asesu serbisu, oinsá mak komunidade sira iha area rural bele asesu bee moos, eletrisidade no edukasaun ne’ebe ho kualidade, ida ne’e sai preokupasaun boot ne’ebe presiza responde, no halo tuir promesas sira ne’ebe halo iha kampaña polítika.

Iha ámbitu selebra loron Restaurasaun Independensia Timor-Leste ba dala-20, iha Palasiu Prezidensia Nicolau Lobato, Bairu-Pite, Jornalista Neon Metin hakbesik-an ba komunidade sira oinsa sira nia esperansa ba Atúal Prezidente Republika, Dr. Ramos Horta.

Tuir maluk Defisiente ain, Martinho da Costa Freitas, idade 30 husi Munisipiu Baucau, agora Hela iha Delta III, hateten, maske kondisaun defisiente, maibé hanesan sidadaun ida moris iha rai ne’e, kontenti Komemora loron restaurasaun Independensia Timor-Leste ba dala-20. Hakarak hatene kle’an liu tan ba nasaun Timor-Leste nia Istória.

“Nu’udar sidadaun ida bedah kondisaun maibé hau kontenti tebes tanba iha komemora loron restaurasaun independensia ba dala-20 ne’ebe monu iha 20 Maiu ida ne’e, ho  Dr. Jose Ramos Horta mós bele simu tomada de posse iha loron 19 Maiu kalan, hau hakarak asisti tanba nu’udas sidadaun ida no hakarak hatene kle’an liu tan nasaun nia istoria.” Dehan, Difisiente Ain, Martinho da Costa Freitas ba Neon Metin hafoin Komemorasaun Loron Restaurasaun Independensia TL iha Palasiu Prezidensial, Nicolau Lobato, Bairu-Pite, 20/5.

Martinho da Costa Freitas, Afirma, Durante ukun tinan lima ba kotuk liu ba Portaun Palasiu Prezindensial la loké ba povu, maibé agora Prezidente Republika foun, Dr. José Ramos Horta hanoin povu entaun loke portaun ba povu, hodi nune’e bele asesu, povu kontenti.

Difisiente Ain ne’e mós husu ba Atúal Prezidente Republika, Dr. José Ramos Horta, tau matan mós ba ema ho difisiensia sira, kria kondisaun di’ak liuliu ba fatin sira hanesan, saude, eskola, kantór sira, estrada no fatin sira seluk, hodi nune’e bele  halo movimentu banhira sira tur de’it iha kadeira roda dudu rasik hodi la’o.

“Husu ba avo Ramos Horta katak, durante ami luta ba ami difisiensia nia direitu hakarak infrastrutura baziku fatin ba ami hodi asesu ho kursi roda, hanesan, saude, eskola, kantór, estrada no fatin ne’ebé de’it.” Rekomenda, Martinho da C. Freitas.

Iha Fatin hanesan, Komunidade, Rita dos Santos, idade 74, hela iha Bidau Masau, ho esperansa katak, Atúal Prezidente Republika, Dr. Ramos Horta tenki tau matan ba povu Timor-Leste, tau matan ba oan ki’ak, feto faluk, ferik-katuas.

“Hau senti kontenti tanba, Avo Ramos tenki sa’e ba ukun rai Timor, haree mós povu hotu, ema ki’ak sira, ferik-katuas, ami mós terus ba rai ida ne’e. Agora tenki la’o bao in nafatin. Hau kontenti Prezidente Republika foun, Ramos Horta, loke portaun palasiu Prezidensial ba povu.” Hateten, Komunidade, Rita dos Santos.

Iha sorin seluk, Komunidade,  Agostinho Alves de Oliveira, husi Munisipiu Baucau, postu administrativu Baguia, hela iha Lurumata, ho esperansa katak, ba Prezidente Republika foun, José Ramos Horta tau matan ba povu, hanesan fulan hirak liu ba halo kampaña dehan, banhira Ramos Horta sa’e ba Prezidente Republika, hatudu dalan ba Joven sira ba buka osan iha rai liur, banhira realiza komprimisu ida ne’e povu kontenti.

“Prezidente Republika foun, José Ramos Horta, tenki implementa promesa sira ne’ebé durante koalia iha kampaña.” Akresenta, Agostinho Alves de Oliveira.

Nia  husu mós ba Atúal Prezidente Republika, Ramos Horta hadia mós Estrada iha Baguia, no dada eletrisidade ba kada aldeia, ne’e para povu kontenti no senti duni dezenvolmentu nasaun nian.

Entretantu, Estudante UNTL, foti Fakuldade Ekonomia, Departamentu Jestaun, Virgilio Josefino M.  Araujo ho esperansa katak, Hanesan juventude prefere liu ba Atúal Prezidente Republika, José Ramos Horta, maka presija kria buat ne’ebé  mak di’ak, ligasaun ho governu atu bele kria kampu serbisu hodi kontribui ba dezempregu ne’ebé mak ohin loron juventude sira hasoru.

“Hanesan estudante hau husu ba Prezidente Foun tenki ligasaun ho governu hodi loke kampu serbisu ba ami.”Esperansa, Estudante Virgilio Josefino M. Araujo.

Virgilio Josefino M.  Araujo mós husu ba maluk joventude sira tane aas no dignifika loron restaurasaun independensia Timor-Leste ba dala-20, presija kria dame no estabilidade  hodi bele garantia paz ba rai doben ida ne’e.

No Estudante UNTL, Fakuldade Ekonomia, Deprtamentu Jestaun, Vonia de Oliveira Yudi Exposto, Senti orgullu no kontenti tanba komemora loron Restaurasaun Independensia Timor-Leste ba dala-20, nu’udar joven hakarak ba oin ita nia nasaun moris nafatin hakmatek iha paz, estabilidade.

Estudante Vonia de Oliveira Yudi Exposto, ho esperansa, Hanesan joven hakarak husu ba Prezidente Republika foun, tau matan ba joven sira tanba estudante sira kada tinan gradua hela de’it ba fatin ba sira sebisu laiha.

“Hau husu ba Prezidente Republika foun, José Ramos Horta, bele karik kria kampu serbisu ba ami joven sira, nune’e bainhira ami remata ami nia estudu bele serbisu hodi hadi’a ami nia moris.” Dehan, Vonia de Oliveira.

Portantu, Estudante ne’e mós halo komparasaun entre Prezidente Republika sesante, Dr. Francisco Guteres Lú Olo nia mandatu, mak kria paz, establidade ba povu maske iha pandemia Covid-19, tanba ne’e husu ba Atúal Prezidente Republika, Dr. José Ramos Horta, kontinus nafatin kria paz, estabilidade ba povu hodi nune’e povu bele moris hakmatek.

Print Friendly, PDF & Email

LEAVE A REPLY

Please enter your comment!
Please enter your name here