Reportajen Santina Lucia da Costa
Iha Prezidente Republika Dr. Francisco Guterres Lu Olo iha nia intervensaun hateten, Múzika sai forsa bo’ot atu espresa ideias kontra injustisa. Liuhusi múzika timoroan sira espresa sira-nia rezisténsia, iha ai-laran, vila no diaspora.
Prezidente Republika, Dr. Franisco Guterres Lu Olo, relata, ba tinan ida-ne’e foku de’it ba modalidade múzika rezisténsia ho hanoin atu promove talentu no afirma valores rezisténsia hanesan nasionalismu no patriotismu ne’ebé refleta iha liafuan ka letra múzika ida nian. Ita-nia esperiénsia iha luta naruk ba libertasaun nasional hatudu katak múzika nuudar arma prinsipál ida iha luta hasoru okupasaun Indonézia.
“Múzika sai forsa bo’ot atu espresa ideias kontra injustisa. Liuhusi múzika timoroan sira espresa sira-nia rezisténsia, iha ai-laran, vila no diaspora. Liu husi múzika timoroan espresa sira-nian sentimentu opresaun, tristeza, maibé mos sira-nian korajen atu luta nafatin ho esperansa atu manan.” hateten, Prezidente Republika Dr. Francisco Guterres Lu Olo ne’ebé partisipa Kompetisaun Festivál arte no kultura iha Palasiu Prezidensial Nicolau Lobato, Bairu-Pite, 30/12.
Xefe Estadu, hatutan, iha Kompetisaun kanta múzika rezisténsia nian ita hahú motiva joven sira atu reflete sentidu husi múzika ida-idak hodi sunu no inspira foinsa’e sira nian espíritu patriotismu no nasionalismu iha era priense ukun rasik-an.
“Ohin ita halibur malu iha fatin ida ne’e hodi asiste faze ikus liu ba Kompetisaun Nasionál Arte no Kultura, Kompetisaun Múzika rezisténsia. Preparasaun ba programa ida-ne’e hahú husi Audisaun too Grande Finál durante fulan ida liu. Partisipante sira neebé maioria joventude ho antuziasmu bo’ot hodi partisipa iha kompetisaun ida-ne’e. Juventude hamutuk nain 121 mak rejista ho idade hahú husi tinan 15 too tinan 30. Husi totál númeru partisipantes ne’e ikus mai iha faze final hamutuk Kontestante nain-13 no hamutuk nain-7 mak sai vensedór.” informa, Lu Olo.
Lu Olo, dehan, Múzika Rezisténsia ne’ebé kanta husi joven sira fahe ba múzika obrigatóriu ho títulu 30 Agusto no múzika eskollida hamutuk 9 husi kompozitór oioin ne’ebé hili iha kada faze. Aprezentasaun múzika rezisténsia hanesan mós dalan ida hodi kontinua hatutan valór sira neebé ita-nia erói funu-nain sira husik hela mai ita.
Nia realsa tan katak, Valór sira ne’ebé orienta sira-nia hahalok durante tempu luta naruk too ita hetan ita-nia independénsia, hanesan espíritu sakrifísiu, dedikasaun, barani, determinasaun, onestidade, domin ba Pátria no Povu no mós espíritu solidariedade ba malu. Valór sira nee mak tenke kontinua nafatin dada dalan ba ita, liuliu ba joven sira, iha prosesu ba dezenvolvimentu nasionál.
