Reportajen Silvino Freitas
Dosente Departamentu Komunikasaun Sosiál UNTL, rekomenda ba Konsellu Imprensa(KI) no Sekretáriu Estadu Komunikasaun Sosiál (SEKOMS), atu esforsu makaas serbisu hamutuk ho Ministériu Edukasaun nune inklui Dixiplina Media-Dijitalizasaun iha kurríkulu edukasaun nian.
“Hau nafatin rekomenda atu ita investe lai iha media konvensionál sira ne’e, tanba ita nia literasia ne’e sei menus, nuné ita investe iha ne’e lai” dehan Profesora Dulce Martins iha nia intervensaun iha ámbitu Dili Dialogue Forum iha salaun Delta-Nova, 02/11.
Akademista ne’e hatutan atu matéria dijitalizasaun tenke hahú investe iha kurríkulu, atu oinsá bele hanorin maneira hakerek tanba daudaun ne’e ita sei iha problema hakerek.
“Ami iha universidade ami nota katak, maioria estudante ne’ebé mai ne’e atu hakerek de’it paper ou kompozisaun ida mos difisil, tanba ne’e presiza investe atu oinsa mak bele hakerek no lee, lee para hodi produz” Akademista ne’e preokupa.
Haree ba media dijitalizasaun ne’ebé mak ohin loron hahu avansa makaas, ema hotu hahú hakerek ona iha dijitál, ema hotu bele hare iha Timor laran tomak inklui mundu no ida ne’e mos reprezenta ita nia reputasaun.
Nune Tuir Dulce importante mak investe literatura ne’e hahú husi baze, liu-liu iha eskola ensinu báziku primeiru, segundu no terseiru siklu inklui mos ensinu-sekundária.
Nia rekomenda media dijitalizasaun ne’e tenke sai ona dixiplina ida iha eskola, tanba ohin loron labarik barak mak kaer ona telefone, atu nune bele sensibiliza ita nia sosiedade, oinsá bele uza media dijitál, tanba media dijitál mos iha nia dezvantajen boot hodi hamosu krime organizadu.
“Hau nia rekomendasaun ba Konsellu-Imprensa no SEKOMS, atu serbisu makaas ho Ministériu Edukasaun hodi tau iha kurríkulu hanesan dixiplina ida, tanba ne’e importante ba ita nia joven sira no buat barak mak sei akontese husi internet” nia konklui.
