Reportajen Juvinal Cabral
Relasiona ho kazu iha Fakuldade Medicina Ciencia da Saude ne’ebe maka Asosiasaun Akademika Estudantil Fakuldade Medicina Ciencia da Saude(AAE-FMCS) koalia sai, Reitór Universidade Nasionál Timor Lorosa’e (UNTL) João Soares Martins, ameasa estudante atu prosesu estudante sira bainhira laiha evidensia.
Reitór Universidade Nasionál Timor Lorosa’e (UNTL) João Soares Martins, nia rasik simu ona relatoriu husi dekana Fakuldade Medicina Ciencia da Saude, Lidia Gomes, no sei estuda relatoriu ne’e depois sei bolu estrutura fakuldade hodi haree asuntu ne’e.
“Ha’u simu tiha ona relatoriu husi dekana horseik ha’u sei estuda hela aban ka bainrua sei koalia ho estrutura fakuldade para atu haree,” dehan Reitór Universidade Nasional Timor Lorosa’e (UNTL) João Soares Martins iha FCS Caicoli 14/05.
Reitór ne’e haktuir, importante estudante sira nia dever ne’e mai atu estuda tenke aproveita tempu estuda, hanesan lider sira dehan estuda mak tenke importante problema sira ne’e tenke iha nia baze iha evidensia para provas. Maibé laiha provas mak sei prosesa fali estudante sira ne’ebe maka defama dosente sira ne’e.
“Karik iha provas ita sei iha medidas para bele foti, mais ita defama ema iha publiku ha’u hanoin ne’e laloos. Ita mos sei halo prosesu ruma ba sira ne’ebe mak halo defamasaun ema nia naran iha publiku sem iha provas dehan katak ema sira ne’e komete buat ne’ebe mak sira alega ba” explika Reitór.
Nune’e mós Reitór sei halo analiza fali ba relatoriu ne’ebe maka Dekana Fakuldade Medicina Ciencia da Saude haruka mai ne’e no mos karta husi Senadu Asosiasaun Akademika Estudantil Fakuldade Medicina Ciencia da Saude (AAE-FMCS) nian, depos haree no prosesa ba oin.
“Ami sei analiza relatoriu ne’ebe senhora dekana hato’o mai ho tan karta husi senadu ne’e ha’u despaixu mai dekana responde hela mai reitór sei estuda enkontru ho estrutura para haree se nesesita para atu halo prosesu ba oin ita ita bele haree to’o agora seidauk bele dehan buat ruma” Reitór dehan.
Portavoz Voz Estudantes, FMCS, Germano dos Santos Moreira, konsidera, Dekana Fakuldade Medicina Ciencia da Saude hatudu nia inkapasidade no sai protetor ba professor balun ne’ebe pratika kazu asediu sexual, kobransa ilegal no violadores normas UNTL nian.
“Dignisima Dekana Fakuldade Medicina e Ciencia da Saude professora Lidia Gomes hatudu nia inkapasidade no sai protetor ba professor balun ne’ebe pratika kazu asediu sexual, kobransa ilegal no violadores normas UNTL nian, ida ne’e hatudu katak dekana rasik admite atu kazu hirak ne’e akontese, maski ita nia prinsipiu,valores no regulamentu sira bandu atu labele akontese iha universidade,” dehan Porta voz Estudante Germano liuhusi Konferénsia Imprensa iha kampus UNTL Kaikoli, Dili Segunda 12/05.
Tanba ne’e, Hakarak rekomenda ba magnifiku Reitór UNTL, atu foti medidas urjenti ba kazu Fakuldade Medicina e Ciencia da Saude no xamada urjentimente ba Dekana Fakuldade Medicina Ciencia da Saude, Professora Lídia Gomes, Diretor Departamentu Parteira Professor Rafael no Diretór ESTeS Miguel Soares iha ne’ebe tenta ignora kazu ne’ebe estudante sira hasoru.
“Husu ba Magnifiku Reitor UNTL, atu urjentimente loke prosesu disiplinar hasoru Diretor ESTeS iha ne’ebe aproveita estudante sira hodi hetan lukru atu satisfaz deit nia nesesidade pesoal no ameasa estudante. No loke mos prosesu disiplinar hasoru Diretor Departamentu Parteira iha ne’ebe kansela estudante nain 3 la tun estagiu maski estudante nain 3 ne’e priense ona rekezitus estagiu nian,” Sira husu ba Reitór.
