Reportajen Silvino Freitas
Komemorasaun loron restaurasaun indepedensia governu sentral sei halo avaliasaun ba servisu governasaun lokal tuir kompetensia 19 neebe governu sentral delega ba autoridade munisipiu sira atu implementa liu liu iha area agrikultura, saúde no edukasaun atu bele hatene servisu saida mak halo ona iha baze, nunee komemorasaun ne’e halao iha palasiu prezidente aitarak-laran.
Ministru Administrasaun Estatál (MAE) Tomas Cabral dehan, preparasaun ba komemorasaun loron restaurasaun indepedensia 20 de maio sei realiza iha palasiu prezidente da republika, nunee iha nivel munisipiu autoridade sira mak sei komemora no hahu ohin iha tuku 5 sei iha abertura ba espozisaun ba governasaun lokal no prezidente da republika mak sei halo abertura ba eventu refere no eventu ne’e sei lao too 20 de maio.
“Atu ita bele hatene durante tinan ida ho balun liu ona ne’e munisipiu sira halo saida, governu sentral delega kompetensia ne’e sira tuir hodi fo asitensia teknika ka lae” dehan MAE Tomas Cabral iha resintu MNEK Praias dos Coqueiros Dili,(15/05).
Nia dehan tan, serimonia ba komemorasaun loron restaurasaun indepedensia ne’e sei halao ho simples tanba governu fokus ba komemorasaun loron proklamasaun indepedensia ne’ebe sei halo ba tinan 50, nunee iha komemorasaun loron restaurasaun indepedensia ne’e sei iha mos kompetisaun dansa no muzika kultural husi munisipiu sira ne’ebe estadia iha nasional no kempetisaun ho kategoria diak sei kompete ho kompetitor husi rai liu hodi komemora tinan 50 loron proklamasaun indepedénsia tinan ne’e.
“Sira ne’ebe ho kategoria diak sei kompete ho ema mai husi liur iha palasiu governu atu komemora 50 anos iha neeba” dehan MAE Tomas Cabral.
Nia konklui, alokasaun orsamentu ba komemorasaun ne’e ho globalidade ba loron nasional sira iha tinan nee mak 20 de maio, 30 de agostu, 28 de novembru no 31 de dezembro, nunee iha komemorasaun loron restaurasaun indepedensia sei halo avaliasaun ba governasaun lokal ne’ebe governu sentral atribui kompetensia servisu 19 ba sira liu liu iha area edukasaun, saude no agrikultura.
