Reportazen Adroaldo ‘Saretukau’
Grupu Maubere Mountain Coffee (MMC) iha Suku Batara, Postu Laclubar hetan ajudus umanitáriu hosi The Humming fish Foundation (THF), hodi apoiu hikas vítima afetadu hosi dezastre Siklone Seroja uma kain 200 iha Suku Batara. Ajudus hirak ne’e mak fos saku 200, mina dos 26 (3 litru) no manu-tolun dos 16 inklui produtu ijiéniku hanesan sabaun, deterjen no seluk tan.
Iha serimónia distribuisaun Xefe Suku Batara, Thomas Pinto hanesan mos Xefe ba Grupu MMF informa apoiu ida ne’e liu hosi The Humming fish Foundation ne’ebé parseria ho Kafé Maubere, fo apoiu ba komunidade afetadu hosi dezastre siklone seroja iha Suku Batara.
“Ajuda netik komunidade sira ne’ebé hetan bee tama uma nomos sira ne’ebé hetan estraga ba ai-horis no uma, maibé ida ne’e mai la husu atu halo uma, mais ami husu bele apoiu netik hahan oi-tuan para ita nia komunidade sira bele aguente netik ba semana ida ka rua”, hateten Xefe Suku Batara, Tomas iha Sede Kafé Maubare Sábadu, 15/05.
Nia hatutan katak apoiu hirak ne’e ba uma kain 200, hodi tulun netik komunidade sira iha situasaun difisil ida ne’e, tanba sira labele sai ba fatin dook hodi sosa hahan.
“Apoiu ne’ebé ami simu ba uma kain 200 hanesan fos karon ida ba kada uma kain, mina botir ida, manu tolun rak ida, sabaun ho rinso balu. Ida ne’e atu fasilita netik ida nia komunidade sira atu bele hakmatek iha sira nia uma, tanba afeta mos ho situasaun COVID-19, entaun ita nia komunidade sira labele sai ba li’ur”, hateten Thomas.
Iha parte sorin reprezentante inan-aman Suku Batara, Agustinho Soares hato’o agradese ba Xefe Suku Batara tanba ho nia esforsu bele buka apoiu emerjénsia ba komunidade sira iha momentu ida ne’e.
“Ami harohan nafatin ba ita atu isin di’ak nafatin, atu buka nafatin dalan ba ita nia nia reinu ami hotu iha tempu ida ne’e, tanba ita nia reinu sira sai ladi’ak hotu, tanba ne’e sei husu nafatin ita boot atu husu no koko nafatin ba ita nia maluk sira ne’ebé besik atu ajuda nafatin ita nia reniu sira, tanba sira sai la di’ak”, hateten Agustinho.
Reprezentante inan-aman ne’e mos husu ba família sira ne’ebé lahetan apoiu ida ne’e karik, atu labele laran triste, maibé pasensia nafatin hodi hein apoiu sira seluk ne’ebé Xefe Suku rasik sei esforsu atu buka hodi fo mos ajuda ba sira ne’ebé seidauk hetan.
Iha fatin hanesan komunidade afetadu hosi aldeia Are-ain, Suku Batara, Rosa Pinto hato’o katak ajudus ne’e maske oi-tuan maibé ida ne’e ho laran bele tulun netik sira.
“Ho apoiu ne’ebé ami simu la’os katak atu ejize dehan barak liu, maibé oi-tuan mos sente katak ne’e apoiu ida ne’ebé interese duni ba inundasaun ne’ebé akontese iha 4 abril ba Suku Batara”, dehan Rosa.
Maske sasan ne’e naton ba nia maibé nia husu nafatin apoiu seluk hodi tulun uma kain sira ne’ebé seidauk hetan, “sasan ne’e mai ba família hotu-hotu ne’ebé sofre inundasaun, ikus mai sira foti de’it ha’u nia naran hodi simu sasan ba inundasaun ne’e, maibé ha’u nia oan na’in rua ne’ebé harii ona uma kain maibé sira seidauk hetan”.
