Reportajen Santina Lucia da Costa
Relasiona ho governu hasai Arte Moris husi sira nia fatin iha Comoro, Responsavel Teatru Timor-Leste (TERTIL) Lena Caminha hatoo sentimentu triste bainhira hasai sira husi Arte Moris, no husu governu tenke buka dalan hodi hetan solusaun diak, nune’e labele hamate kreatividade ne’ebe joven sira halo durante ne’e.
Lena Caminha hato’o kestaun ne’e iha ambitu, diskusaun naklole kona-ba rai, ekonomi no Orsamentu Jeral Estadu (OJE) 2022, ne’ebé realiza husi Asosiasaun Jornalista Timor-Lorosa’e (AJTL) hamutuk ho Rede Koligasaun Agrikultura.
Responsavel TERTIL haktuir fatin ne’eba, hahú utiliza iha 2003 to’o agora, bainhira tama iha ne’eba, iha 2005, hela iha ne’eba kria obra barak no mós prodúz atividade barak hanesan artista no joven barak ne’ebé aprende arte barak iha fatin ne’eba.
“Iha tinan 2019 rona informasaun kona-ba entrega fila-fali fatin ne’e ba iha Konsellu Kombatente Libertasaun Nasionál (CCLN) nian, husi hau nia parte nu’udar feto, hau triste tebes, derrepente ami rona husi media katak tenke ses husi fatin ne’eba. Hau nia kolega sira seluk mós, iha ne’eba la’os mane de’it mak aprende iha arte moris, maibé iha feto lubuk ida mós iha ne’eba, barak mak serbisu ona iha fatin balun.” dehan Lena Caminha, iha sede HASATIL, Farol, 4/12.
Lena dehan ema ne’ebé mak hakarak aprende arte sira iha hotu ne’eba, hanesan Munisípiu sira, bainhira halo atividade arte nian iha Dili, sira sempre ba fatin mahon ne’e, triste tebes tenke ses husi fatin ne’e.
Nia akresenta informasaun ne’ebé maka fó sai husi media komentariu barak dehan, Arte Moris la koopera ho governu, nhakarak koopera maibé husi primeiru kedas Sekretáriu Estadu Teras no Propriedade (SETP) bainhira hatudu fatin armazein, Arte Moris ba survey duni, maibé fatin ne’e la dignu.
Nia hateten husi ita nia hamutuk, suporta husi parte sosiedade sivil sira, oinsa buka dalan atu rezolve situasaun agora, atu nune’e bele hetan solusaun ne’ebé mak di’ak, hodi nune’e labele hamate fila-fali kriatividade ne’ebé mak joven sira iha atu kontinua ba iha futuru.
