Reportajen David da Costa Gusmao
Autoridade Lokál husi Suku Haekoni, Postu Baguia, Munisípiu Baukau, husu governu liu-liu Ministériu relevante, atu loke estrada Postu Quelicai liga ba Postu Baguia nune bele fasilita movimentu populasaun nian.
Autoridade lokál Suku Haekoni, Luis de Oliveira hateten postu Baguia no Quelicaii ne’e liga ba malu, tanba ne’e husu governu atu loke estrada husi Suku Letumumo ba Suku Haekoni area postu Baguia nian, atu ema bele lao ba mai.
“Ami presiza estrada ne’e husi Suku Letemumo liga kedas ba Postu Baguia, tanba husi Suku Haekoni atu mai Quelicai lao deit, maibé ami presiza estrada liga haleu foho Matebian,” dehan Xefe Suku, hafoin partisipa iha diálogu entre Sosiedade Sivíl, no VIII Governu iha Waibitai foho Matebian, Sabadu 21/08.
Nia dehan atu komunidade iha Suku Letemumo Quelicai nian bele movimentu ba Baguia, no husi Baguia nian bele mai mós iha Quelicai.
Nia esplika postu rua ne’e besik ba malu, tanba ne’e mak husu estrada liga ba malu atu fasilita komunidade sira bele lao mai. Tanba estrada ne’ebé loke husi kota mai Waibitai, tempu udan rai monu no mota sobu, entaun husu Ministériu Obras Públik atu tau atensaun, nune’e bele asegura ba tempu naruk.
“Hau nia preokupasaun boot ida mak estrada to’o ona iha Waibitai, maibé hau laiha garante atu estrada ne’e sai forte, presiza Ministériu Obras Públik tau osan atu bele hadia rai ne’ebe monu, tanba udan rai bele tun fila-fali,” dehan Xefe Suku Haekoni
Nia dehan se lae tempu ida agora dehan katak estrada tama ona Waibitai, mais la garante mak tempu seluk nia sei bele sai problema boot, ida ne’e mak kona-ba estrada liga Quelicai kota mai to’o iha ne’e.
Iha fatin hanesan Diretór Nasionál Estradas Pontes Kontrolu Seias, Nene Lobato hateten prepara hela oinsa maka bele prepara ajenda ba 2022, mais daudaun ne’e foin mak halo ajendamentu hela, tanba iha tinan 2022 nian prepara ona 219 pakote ne’ebe hosi Prezidente Institute Jestaun Ekipamentu (IGE) submete ba Ministériu Obra Públiku (MOP) hatun ona despaxu mai diresaun nasionál ponte no kontrolu seias atu elebora hotu lista projetu neebé IGE loke iha Timor laran tomak.
“Nunee husi parte Baucau nian deside 24 pakote ho nia distánsia 110 kilómetru, inklui 124 pakote reabilitasaun ba 12 Munisípiu iha Timor laran, ami sei elabora lista sira neebé nai xefe suku sira hateten, iha Letemumu ba too Osu IGE sei dauk loke remata asesu too,” dehan nia.
Nia salienta hafoin téknika sira kompleta sira nia serbisu sira sei submete tan lista sira ne’e ba diresaun nasionál, estrada kontrola seias hodi elabora tau ba ajenda iha implementa tinan oin.
