Reportajen Santina Lusia da Costa
Estrada iha Munisípiu Ermera ba Postu-Administrativu grave liu hanesan Ermera, Hatulia, Letefoho no Atsabe, komunidade sira susar tebes halo movimentu, lori sira nia produtu ba fa’an iha merkadu.
Ba Neon Metin Administradór Postu-Administrativu Letefoho, Antonio Manuel Soares informa em-jeral estrada iha Munisípiu Ermera ba Postu-Administrativu 4 estrada grave liu hanesan, Ermera, Hatulia Letefoho no Atsabe, Estrada Munisípiu Ermera liga ba Postu Administrativu Letefoho, kondisaun grave bainhira tempu udan, susar tebes ba komunidade sira iha Postu Administrativu Letefoho halo movimentu
“Antes ne’e ami halo konsultasaun ho suku sira para hodi mai tau prioridade iha Postu Administrativu, hetan aprovasaun husi Asembleia postu nian tau ona prioridade ba normalizasaun estrada. Entaun iha fulan Outubru to’o agora udan maka’as rezulta estrada liga husi Munisipiu mai Letefoho kuaze aat hotu ona.” Hateten, Administradór Postu-Administrativu Letefoho, Munisipiu Ermera, Antonio Manuel Soares iha Letefoho, foin lalais ne’e.
Antonio dehan komunidade sira mós ke’e rasik estrada, ne’e iha suku 8 iha hotu kedas, Katrai Kraik, Lauana, Dukurai no Eraulu.
“Ami hato’o ona pedidu liuhusi Ministériu Administrasaun Estatál (MAE), ne’ebé barak liu mai vizita Postu administrativu, ami kanaliza tiha ona informasaun sira ne’e, tantu eskrita no verbal hato’o ona, ekipa tekniku sira komesa obrseva, oinsa mak lokaliza dada eletrisidade no mós estrada, oinsa mak tinan 2022 atu tau prioridade ba konstrusaun estrada ho dada eletrisidade.” Haktuir, Antonio.
Administradór Postu Letefoho rekomenda ba governu katak, oinsa maka valoriza populasaun no komunidade sira nia kbiit, forsa, sira uza ona sira nia forsa hodi loke estrada, saida mak governu tau tan para estrada ida ne’e garantia sira nia asesu ne’e permanente ba oin.
Iha fatin hanesan Xefe Suku Lauana, Miguel Gomes Maia akresenta relasiona ho klima ne’ebé rai udan preokupasaun mak Estrada, liuliu iha Postu-Administrativu Letefoho no Atsabe, tanba Suku Lauana mak iha klaran ne’ebé agora daudaun enfrenta hela Estrada aat.
Miguel Gomes Maia dehan estrada ne’e difikulta tebes komunidade sira lori produtu lokál mai Atsabe ba Dili, inklui Suku Katrai-Leten, Lauana, Baboe-Leten, no Leimea, sira labele asesu lori sira nia produtu lokál ba Munisipiu ka ba Nasional.
“Estrada ne’ebé liga ba hau nia Suku Lauana dalan ne’ebé ema hotu-hotu hatene katak kuru-besi-lolo, ida ne’e perigu teb-tebes agora movimentasaun transporte ba mai agora araska, dadaun ne’e ami preokupa.” Hateten, Xefe Suku Lauana.
Miguel husu ba diresaun relevante hanesan IGE bele ajuda ateru, nune’e movimentasaun liga ba Atsabe la’o di’ak, se agora mak Ministeriu Obras Publikas (MOP) no IGE la halo kazu, ba oin molok to’o Natal Estrada ne’eba labele asesu to’o Postu Atsabe ho Letefoho.
Xefe Lauana rekomenda ba MOP se bele tau matan ba Estrada ne’ebé aat ne’e hodi nune’e komunidade sira bele asesu lori sira nia produtu ba munisípiu no Sidade. governu tinan 2021 atu remata tan ona ne’e, oinsa mak tinan 2022 MOP bele iha ona hanoin para ateru estrada sira.
