Reportajen Agustinha Amaral
Sekretáriu Estadu Eletrisidade Água no Saneamentu (SEEAS), Santos Noronha realiza sorumutu entre ekipa liña ministerial hodi ko’alia kona ba normalizasaun mota sira ne’ebé iha Dili laran bainhira tempu udan fo impaktu ba komunidade sira, hodi hamosu inundasaun.
Sekretáriu Estadu ne’e hatete, objetivu husi enkontru ida ne’e atu ko’alia serbisu hamutuk entre liña ministerial sira nomos PNTL no autoridade munísipiu Dili hodi antisipadamente antisipa hela karik udan monu rai bele minimiza tiha inundasaun ne’ebé bai-bain sempre akontese kada tinan, dehan Sekretáriu Estada ba jornalista sira iha salaun EDTL.EP, Tersa-feira, 03/10.
“Tanba ne’e mak ekipa de serbisu para normaliza mota sira no ita nia dreinazen sira, valeta sira husi lixu husi sedimentu sira oi-oin, rai henek sira ita antisipa hotu para soe ba fatin seluk,” tenik nia.
Sekretáriu ne’e hatutan, “ita iha Dili laran hamutuk mota lima ne’ebé ita identifika kuandu udan boot sempre fo ameasa ba komunidade sira, mota sira ne’e mak mota Komoro, mota Lahane ba Kuluhun, mota Bidau Santana, mota Benemauk, mota Bekusi, mota detallu lima ho nia dreinajen ho valeta sira ne’e barak la halimar “
Nia haktuir, tuir observasaun ne’ebé sira haree kuaze nakonu ho sedimentu ho lixu sira, tanba ne’e prezisa ita nia intervensaun lalais nune’e bele normaliza mota sira ne’ebé laiha moru, nia dehan ida ne’e Ministru Obras Públiku nia toma konta maibé serbisu ekipa ne’e haree ba iha normalizasaun sedimentasaun ne’ebé maka agora da-dauk iha ho lixu sira.
“Tanba bai-bain mosu ne’e sedimentasaun sira ne’ebé maka agora da-dauk nakonu ho lixu, rai henek, tahu, buat sira ne hotu, maibé inundasaun tanba ne’e ita prezisa normaliza uluk sedimentu sira ne’e,” nia informa.
Kona ba orsamentu, governante ne’e hanoin Ministru sira ne’ebé maka agora da-dauk tama iha ekipa, sira ida-idak ho nia kbiit rasik, hatene katak iha Sekretáriu Estadu balun orsamentu to’o agora seidauk iha maibé ho kbiit maka ita iha,ita nafatin kontribui,IGE mai ho nia kbiit kontribui, mina mos sira nian, ekipamentu mos sira nian, BTL mos hanesan, ida-idak tau forsa hamutuk nune’e ita bele rezolve problema sira ne’e.
Marka prezensa iha enkontru ne’e mak reprezentante husi Sekretáriu Estadu Teras i Propriedades, Protesaun Sivil, Sekretáriu Estadu Toponomia, PNTL, autoridade munisípiu Dili, sira ne’e hotu ita prezisa hodi serbisu iha ekipa ida nia laran.
