Reportajen Santina Lucia da Costa
Polisia Eskuadra Dom Aleixo hetan Orientasaun husi Komandate atu haruka Vendedores sira ne’ebé fa’an modo iha Estrada Publiku Elemloi, muda ba laran tanba vendedores sira okupa hotu dalan publiku halo Transporte sira liu ladi’ak hamosu engrafamentu (Macet) iha Bundaran Elemloi.
Tuir Observasaun Neon Metin katak, iha Loron Kuarta-Feira, 06 Jullu tinan ne’e, iha tuku 6:00 Lokraik ekipa Polisia Eskuadra Dom Aleixo tun direitamente ba Bundaran Elemloi hodi muda ses tiha Vendedores sira ne’ebé fa’an modo tama liu ba Estrada laran halo Transporte sira halai liu la di’ak no mosu Engrafamentu.
Antes ne’e Polisia Eskuadra Dom Aleixo fó ona orientasaun Vendedores katak, labele fa’an iha Estrada klaran, maibé Vendedores sira la rona kontinua nafatin okupa hotu Estrada publiku, Maka sei fó hatene fali Ekipa Jestaun Merkadu Munisipiu Dili sei mai foti sira nia modo.
Ba Neon Metin, Vendedores, Domingas Gusmão Soares, idade 40 hela fatin Delta IV, senti triste tanba Jestaun Merkadu Munisipiu Dili Foti hotu modo ne’ebé sira fa’an.
“Ami senti triste tanba hola modo sira karun hanesan ne’e mak polisia sira no Walikota sira duni ami hanesan ne’e ami triste, lakon osan hira mak sosa fali buat sira ne’e.” hateten Vendedores, Domingas Gusmão Soares iha Bundaran Elemloi.
Vendedores ne’e dehan Ekipa Jestaun Merkadu Munisipiu Dili, mai loron rua ona, polisia sira ne’e mai haruka muda ba kotuk, maibé Jestaun Merkadu Munisipiu Dili, sira mai ne’e foti de’it modo, sira foti hanesan ne’e senti triste, tanba sosa karun hanesan ne’e, modal mós laiha araska, labarik sira mós eskola barak.
Domingas Gusmão, Akresenta, Durante ne’e fa’an iha laran, maibé tan Vendedores sira ne’ebé fa’an iha merkadu mai fa’an hotu iha Elemloi, entaun iha laran ema la sosa, ne’e mak sira mós muda sai mai iha estrada. sira ne’ebé fa’an iha merkadu Manleu, Merkadu Comoro mai hotu fa’an iha Elemloi.
Domingas, hateten, durante ne’e moris ho ho fa’an modo mak hodi sustenta uma laran, no selu labarik sira nia eskola, maske katuas-oan serbisu, maibé la’os garantia de’it ba ida ne’e, feto no mane serbisu hotu ajuda malu haree uma laran.
“Ami fa’an hanesan ne’e hodi hetan netik osan para selu labarik sira nia eskola, han, hemu, nesesidade uma laran nian, liuhusi fa’an modo mak hodi sustenta uma laran no selu labarik sira nia eskola, maske hau nia katuas-oan serbisu, maibé hau mós fa’an netik hanesan ne’e para uza hodi han, hemu nian, labele garantia de’it ba katuas-oan, tanba labarik sira nia presija mós barak, hau nia-oan agora balun eskola iha Universidade, SMA, SD.” Tenik, Domingas.
Nia realsa tan katak, ekipa jestaun merkadu sira foti tiha modo hanesan ne’e, la ba tuir ona, tanba povu ki’ik haree tuir de’it, osan laiha mós ba deve fali kolega sira seluk nian para sosa modo bele fa’an fali.
Vendedores ne’e, Husu ba Governu kria tan merkadu nune’e povu sira bele fa’an sasan iha nia fatin. No loke mós kampu serbisu ba joven sira nune’e hanesan inan-aman labele fa’an tan ona modo.
“Fa’an modo sira ne’e, la’os ema la eskola de’it, mesak Universidade de’it Gradua hotu ona, buka serbisu la hetan mak, fa’an de’it modo, leba na’an, fa’an ikan, mak hodi sosa hahan, no nesesidade uma laran.” Dehan, nia.
