Reportajen David da Costa
Prezidente Uniaun Emiradu Árabe (UEA), Mohammed Bin Zayed Al Nahyan, konvida Primeiru-Ministru (PM) Kay Rala Xanana Gusmão atu partisipa iha Conference Of the Parties (COP28) ne’ebé sei ko’alia kona-bá asuntu mudansa klimátika iha mundu.
United Nations Climate Change Conference (UNFCCC) ne’ebé hanaran COP28 sai nu’udár konferénsia mundiál ba mudansa klimátika ne’ebé hala’o kada tinan atu bele halibur matenek nain sira no ukun-na’in sira hotu-hotu iha mundu hodi konsolida ideia kona-ba mudansa klimátika sira iha mundu.
Konferénsia Internasionál COP 28 kona-ba Mudansa Klimátika ne’e, sei hala’o iha Uniaun Emiradu Árabe (UEA), no sei hahú iha dia 30 de Novembro to’o 12 de Dezembro tinan 2023.
“Vizita ida ohin nia objetivu primeiru atu hato’o komprimentos husi Prezidente Uniaun Emiradu Arabe no Vise-Prezidente UEA bá Kay Rala Xanana Gusmão ne’ebé assume kargu hanesan Primeiru-Ministru. No Iha tempo ne’e mós hato’o konvite ba PM hodi ba partisipa iha serimonia ida naran COP 28 ne’e kona ba enkontro boot ba mudansa klimatika ne’ebé sei hala’o iha UEA,” dehan Prezidente Uniaun Emiradu Árabe (UEA), Mohammed Bin Zayed Al Nahyan, ba jornalista sira hafoin remtaremata enkontru ho PM kay Rala Xanana Gusmão iha Palásiu Governu, Tersa 3/10.
Nia haktuir, atu dehan de’it katak seidauk iha resposta husi Primeiru-Ministru, Kay Rala Xanana Gusmão kona-bá nia partisipasaun iha konferénsia internasionál COP28 ne’e seidauk iha serteza tanba Xefe Governu sei okupadu hela ho servisu nasaun nian, maibé primeiru ministru hato’o obrigadu bá Estadu UEA ne’ebé fó ona konvite. Maske PM seidauk iha resposta maibé Presidente Republika José Ramos-Horta konfirmadu ona atu ba partesipa iha konferénsia internasionál COP 28 ne’e.
Alende ne’e mós ohin Prezidente Uniaun Emiradu Árabe (UEA), Mohammed Bin Zayed Al Nahyan ho Primeiru Ministru Kay Rala Xanana Gusmão mós ko’alia kona-ba vizita do estadu Presidente Republika José Ramos-Horta ninia, ne’ebé atu ba vizita iha UEA iha dia 13 de Outobro hodi partisipa iha World Climate Action. Nune’e mós ko’alia oinsá mak haree ba kooperasaun area prioridade saida mak Timor-Leste estadu UEA bele explora atu hametin relasaun bilateral no mós kooperasaun entre rai rua ne’e nian iha futuru.
“Ita hein katak ho vizita Prezidente Repúblika Timor-Leste nian bele iha kooperasaun foun no buka-hatene área sira ne’ebé iha interese komún entre nasaun rua, iha seitór oioin no ami diskute ona kona-bá seguransa ai-han, agrikultura, edukasaun, infraestrutura mina-rai no gás. Espera katak ita bele haree saida mak bele implementa konkretamente depois de vizita Presidente Republika ninia iha UEA,” nia esplika.
