Reportajen Agustinha Amaral
Jornal INDEPENDENTE hetan notifikasaun husi Polísia Sientífika Investigasaun Kriminal (PCIC-Sigla Portugés), atu sai sasin kona-ba Kazu Violasaun Segredu Justisa señor Longinhos Monteiro nian ne’ebé publika iha loron 10 fulan fevereiru 2023.
Diretor Jornal Independente, Jóse Sarito Amaral hatete, nia hetan karta notifikasaun ne’e horseik ho nia estatu mak atu sai sasin ba krime violasaun segredu justisa husi PCIC ne’e rasik. Nune’e ohin nia mai kumpri karta notifikasaun, kona ba prosesu inisial to’o mai iha PCIC ne’e liga ba publikasaun jornal Independente nian iha loron 10 fulan fevereiru 2023 ba kazu señor Longinhos Monteiro nian.
“Ekipa entidade sira ne’ebé halo buska ba rezidensia señor Longinhos nian ne’e, akontese iha loron 9 fulan fevereiru 2023 no ami publika iha loron 10 fulan fevereiru 2023, depois liu tia semana rua prosesu inisial ne’e mai husi Xefe Gabinete Prezidente Repúblika nia asinadu ba iha Ministériu Públiku pasa mai iha Tribunal Díli, depois mak Tribunal notifika ami hodi husu atu kompleta informasaun ne’ebe liga ba gazu buska iha rezidensial Señor Longinhos nian”, dehan Diretor Jóse Sarito Amaral iha Edifisiu PCIC, 30/11.
Nia dehan, sira responde ho karta ne’e hanesan publikasaun ne’ebé sira halo, nune’e Ministériu Públiku delega fali mai tribunal entaun xefe redasaun deklara informasaun ba kazu ne’e felismente sira mai ho publikasaun ne’ebé la ses husi buat ne’ebé sira publika.
Iha fatin hanesan, Xefe Advokasia no Legal iha AJTL, Constancio Vieira hatutan, hafoin husu sasin katak PCIC bolu Xefe Redasaun bazeia ema nia keixa ba jornal diáriu Independente nia notísia, tanba tuir lei komunikasaun sosial katak ema ruma sente jornalista nia produtu la iha balansu ka sala tenke bazeia ba lei no ema ne’ebé sente vítima ba notísia refere tenke hakerek karta ba Xefe Redasaun atu bele halo ratifikasaun direitu ba resposta banhira notísia ne’e la balansu.
“Ho ida ne’e Assosiasaun Jornalista Timor Lorosa’e (AJTL), kontra banhira ema ne’ebé kriminaliza produtu jornalístiku, ita mos konsiente dala ruma ema barak seidauk konsiente konaba lei komunikasaun sosial ne’e, tanba ne’e sai servisu ida ba Assosiasaun sira hamutuk hodi konsola ho Konsellu Imprensa atu bele asina akordu ida ho entidade sira hanesan Ministériu Públiku no Polísia atu ema ne’ebé hato’o keixa produtu jornalístiku, sira labele prosesa tuir Ministériu Públiku bazeia ba kódigu penal maibé uza ita nia lei komunikasaun sosial nian,” nia informa.
Nia hatutan, bazeia ba notifikasaun ne’ebé AJTL asesu, nia mai hanesan sasin tanba dehan violasaun ba segredu justisa ne’ebe previstu iha artigu 291 kódigu penal, ema la komprende nia ta’uk maibé ema ne’ebé komprende nia la ta’uk maibé ida ne’e parte ida hata’uk jornalista, nune’e husu ba jornalista sira keta ta’uk tanba iha lei komunikasaun sosial ne’ebé garante jornalista sira nia direitu no dever.