Reportajen David da Costa
Ohin ekipa Assosiasaun Dalan ba Naroman (ADBN) distribui ekipamentu pinheira rai-henek nomós material salva an nian ba komunidade pinheirus sira hamutuk na’in 15, iha Suku Manleuana ho Comoro, postu Administrativu Dom Aleixo Munisípiu Díli.
Vise Diretór Assosiasaun Dalan ba Naroman (ADBN), Jerónimo Fernandes “BerleQui” hateten, ohin ekipa ADBN distribui hela ekipamentus ba komunidade pinheira rai-henek no material sira ne’ebé salava an ba komunidade sira ne’ebé pinheirula rai-henek iha mota Manleuana no Comoro.
“Ekipamentu ne’ebé maka ami apoiu ba komunidade pinheira rai-henek sira iha mota Manleuana ho comoro maka Karosa, Rede númeru 1 no 2, aisuak besi, rompi, kapasete salva ulun, maskra, botas,” dehan Vise Diretór Assosiasaun Dalan ba Naroman (ADBN), Jerónimo Fernandes “BerleQui” ba Neon Metin liuhusi WhatsApp, Kinta 30/11.
Nune’e mós kipa ADBN enkoraja ba komunidade pinheirus sira atu nafatin kolabora ho ekipa ADBN hodi konsensializa ema hotu-hotu evita soe foer arbiru iha mota laran hodi bele asegura ambiente moos no saudável. No ekipa ADBN kontinua apela ba komunidade pinheirus sira atu labele pinhiera rai-henek besik bronzon no ponte sira hodi evita estragus fasilidade públiku.
Enkuantu ekipa ADBN sei distribui tan ekipamentu hanesan ba komunidade pinheirus sira hamutuk na’in 15 iha suku Madohi no Bebonuk nian iha semana oin mai.
“Mai Ita Haforsa Komunidade Pinheirus Sira Nian servisu Hodi Kontinua Muda Kapital Díli Nian Imajen Furak ba Mundu”, nia alerta.
Nia esplika hahú husi tinan 2022 – mai to’o tinan 2023 agora, ADBN konsege distribui ona ekipamentu pinheira rai-henek no material salva an nia ba komunidade pinheirus sira hamutuk 144.
No orsamentu ne’ebé aloka ba sosa ekipamentu sira ne’e, hetan apoiu hosi Serviços de Apóiu á Sociedade Civil e Auditoria Social (SASCAS-VPM) liuhusi subensaun públika, hamutuk $10.000,00.
Reprezentante komunidade pinheirus rai-henek, Romeo da Conceição hato’o agradese wai’n ba Governu no Assosiasaun Dalan ba Naroman (ADBN), tanba bele ajuda ona sira nia servisu lor-loron nian iha mota laran.
“Ha’u hanesan reprezenta hau nia maluk pinheiradór sira seluk hodi hato’o ami nia agradese wain ba ADBN tanba halo ona esforsu ko’alia ho Governu nune’e ohin loron ami bele hetan apoiu ekipamentu sira ne’e,” nia agradese.
Maibé sira mós sujere nafatin ba ADBN atu kontinua ko’alia ho Governu nune’e ba oin bele mós fó ajuda ba sira nia maluk sira ne’ebé seidauk hetan apoiou, tanba iha ne’e komunidadu pinheira rai-henek barak mak seidauk hetan apoiu.
