Home Analisa Uza Tabaku Kauza Mate Tanba Moras no Dezvantazem Ba Ekonomia

Uza Tabaku Kauza Mate Tanba Moras no Dezvantazem Ba Ekonomia

1296
0
Jaimito Siqueira Gusmão, Estudante Ativu Ho Semester VI Iha Departamentu Polítika Públika –UNTL. [Foto: Dokumentu privadu | 01.12.2020]

Hakerek nain Jaimito Siqueira Gusmã

Introdusaun

Timor-Leste hanesan Estadu ida joven maibé prosesu dezenvolvimentu hahú la’o, maske progresu lubuk ida Timor-Leste ultrápasa dau-daun, Maibé iha sorin seluk mós Timor-Leste iha dezAFIU ba futuru Timor nian ida ne’ebé saudavel tuir vizaun PEDN 2020, “Ema hotu Saudevael Iha Timor Ida Ne’ebé Saudavel”, tamba kauza ema barak liu-liu juventude sira, ativu uza tabaku, maske epidemia tabaku fó perigu ba ema nia vida.

Lós dunik katak, Timor-Leste, hanesan Estadu foun no restaura nia independensia iha era milenial, ne’ebé Timor-Leste lokaliza iha Rejiaun Súdeste Asiatiku, nune’e Timor – Leste mós sai hanesan nasaun konsumidor iha ASEAN, liu-liu konsumu tabaku (Fuma, Sonke no mama ou Smoke and smokless tobacco) ho pursentu 71%. Ita hotu hatene tabaku hanesan produtu kímiku ida ne’ebé fó perigu liu ba ema nia saúde no ekonomia familia ho nasaun, tabaku nia suar konteín liu 7.000 substansias kímiku, iha ne’ebé besik 70 koñesidu hanesan kauza kankru (Karsinogens).  Nune’e mós  referensia balun husi artikel  ho titlu “[ARTIGO] Tabaco Nicotina e Câncer”  tabaku konteín 60 substasia kímiku ne’e fó perigu ba ema nia vida liu husi moras kankru, husi 60 substansia ne’e, simplikafika tiha parte tolu perigu liu kauza lais liu ba hamosu moras kankru; 1) Hidrocarbonetos aromáticos policíclicos, 2) Aminas aromáticas 3) Nitrosaminas.

Maibé produsaun tabaku folin iha mundu Kada tinan halo industria tabaku sira  gastus osan liu husi Biliaun Ualu ba leten ba marketing, no mundu  mós lakon Ema miliaun walu nia moris tamba kauza husi tabaku relasiona ho fuma tabaku tuir relatoiu husi OMS. Tabaku produtu kauza mate iha mundu ne’ebé jeralmente bele prevene, tabaku mós sai hanesan produtu ne’ebé ho substansia aditivu tebes. Tabaku uza iha forma oioin,  hanesan fuma no sonke no mama (smoke and smokless tobacco), afeita kuaze orgaun sira iha ema-nia isin lolon.

Tabaku Kauza Moras

Tabaku mak fator risku prinsipál ba moras sira nebé la hada’et (Moras não kontasioza). Moras ne’ebé kauza tamba uzza tabakumak hanesan, Ataka Fuan ka Moras Kardiovaskular Stroke, Asma, Kanker Servical, Kanker Rins, Kanker Pancreas, Kanker Stomach, Kanker Pulmaun, Moras Pulmaun Kroniku, Kankru Iha Kakorok, Impaktu Ba Reprodutivu mane no feto, Sindroma Bebe Mate, Derepenti, moras hirak ne’e la akontese de’it ba ema ne’ebé mak fuma ativu, Espoxisaun ba fumador pasivu mós hetan impaktu moras seriu no mate ba Ema adultu no labarik. Alen-de ne’e uza tabaku mós risku ba ema hirak nebé afeta moras da’et hanesan HIV-SIDA, Tuberculose (TBC) no Malaria. Ema hirak nebé hetan risku ka afeta moras hirak ne’e sei vulneravel liu-tan wainhira uza tabaku ka kona sigaru suar.

Prevalensia Uza Tabaku iha Timor-Leste

Mai ita hare hamutuk dadus sira husi fumador ativu no fuma pasivu iha Timor-Leste, Peskiza Ministeiru saude tinan 2016[1], hatudu taxa adultu ema ho idade 15-49 fuma sei ainji 53.7%, maske reduz duni husi 70% iha tinan 2009. Iha peskiza DHS 2016[2], hatudu prevalensia fuma sigaru ne’e husi 70% tun ba 53,7% ema ho idade produtivu mak uza tabaku. Maibé prevalensia uza tabaku (Fuma sigaru, Mama no Sonke/Smoke and smokless tobacco) sei a’as nafatin tuir relatoriu STEP Survey 2014 husi OMS 71%.

Peskiza Global ba foinsa’é tinan 2019[3] hatudu katak labarik sira ho idade 13-15 uza tabaku aas tebes, entre adulesentes 30.9%,  husi total ne’e iha 42% ba foinsa’é mane no 21% ba foinsa’é feto. Uza tabaku sêm fuma mós kontéin kímiku no veneno karsingogenik barak.

Iha mós éstudante 67% mak sofre husi fuma sigaru pasivu iha uma no 71% mak sofre fuma sigaru pasivu iha Publik. Foinsa’é sira fasil bele asesu ba sigaru, sira bele sosa sigaru iha loja ka kios ho osan ki’ik liu $ 0.10 sentavus, mais ou menus 63% sosa sigaru husi loja, supermerkadu, vendedor ambulante no kios. Maske sira ho idade minoridade tuir dadus hatudu 49.2% mak la hetan bandu wainhira sosa sigaru. Husi dadus sira iha leten prevalensia fuma tabaku iha Timor-Leste ho númeru ne’ebé mak aas tebe-tebes no sei fó implikasaun negativa mais signifikante tebes ba Timor-Leste nia futuru. Tuir lolos situasaun sira ne’e ita iha espektativa ida katak, sei la-bele akontese númeru fuma ida aas hanesan ne’e, tamba ita baze juridiku ne’ebé regula kona-ba tabaku no Saúde nian forte tebe-tebes.

Baze Legal.

Mai ita hahú hare baze juridiku sira ne’ebé mak regula kona-ba saúde ligadu kedas ho tabaku, ita hahú husi Konstituisaun RDTL Artigu 57 0(Saude) hateten katak; (1) Estadu hatene katak ema hotu iha direitu ba saúde asistensia médika sanitaria. (2) Estadu hala’o no hari’i servisu nasional saúde úniversal ba ema hotu-hotu tuir nia kíbi’it, gratuitu/laselu hanesan lei haruka. (3) Servisu saúde nasionál tenki iha fatin barak, labele hamutuk de’it iha fatin ida, atu ema hotu-hotu bele halo parte.

Iha sorin seluk iha Dekretu lei “51 loron 21 dezembru 2011lei ba atividade publikasaun) totalmente bandu publikasaun tabaku iha televizaun no rádiu. Publikasaun Imprime no spanduk husi kompania tabaku ne’e legal, maibé tenke implementa ho limitasaun. Iha publikasaun tabaku tenki inklui atensaun saúde, medida spanduk publikasaun tuir regulamentu ne’ebé iha ona no bandu spanduk publikasaun iha área metru 100 (atus ida) husi fasilídade edukasaun ida.[4]

Iha mós nesesidade atu kombate fuma/tabajismu, Governu asina tiha ona kovensaun-kuadru organizasaun Mundial Saúde nian atu kontrola tabaku, halo posivel ba hetan ratifikasaun husi Parlamentu Nasionál (PN), liu husi rezolusaun No.13/2004, loron 29 fulan Dezembru. konsiderá ba kompremisu internasional sira ne’ebé assume iha ambitu luta kontra fuma/tabajismu no iha nesesidade atu reverte kuadru epidimilojiku iha paíz ne’e, hodi nune’e bele garante direitu ba saúde no meiu ambiente ida ne’ebé saudavel, ne’ebé konsangra ona iha konstituisaun.

Governu dekreta mós iha alina b) husi No 1 artigu 1150 no alina e) husi artigu 116 Konstituisaun RDTL nian, atu sai hanesan Lei, maka tuir mai: Dekretu Lei No 14/2016, 8 Junhu (Rejimi Kontrola Tabaku).[6] Katak perigu sira kauza husi tabaku atinji tiha ona nivel global, ho proporsaun alarmante, liu-liu iha foinsa’é no joven sira nia lét, no sai ona problema sósiu ekonomiku grave ida no problema grave ba saéde públika, liu-liu iha paíz sira ne’ebé mak foin dezenvolve aan dau-daun. Konsumu tabaku iha Timor-Leste no Nasaun balu maka aas liu iha mundu, ne’ebé reflete direitamente iha kuadru epidemiolojiku iha paíz ne’e, iha ne’ebé moras sira la hada’et (kontasioza), ne’ebé maka nia fator risku prinsipal maka konsumu tabaku, konstitui liu 70% husi total moras la hada’et no sei aumenta. Maske ho baze juridiku sira iha leten ne’ebé regula seriu liu kona-ba epidimia tabaku, maibe kauza ba fuma ho numeru aas tebes iha Timor.

Saida mak kauza prevalensia uza Tabaku iha Timor a’as?

Tuir hakerek na’in nia prespetiva, kauza sira mak hanesan tuir mai:

  • Presu tabaku iha Timor ki’ik, no taxa tabaku mós ki’ik ho nune’e fasil kompainia sira halo importa tabaku mai Timor ho kuantidade nebé boot. Ho nune’e fasil ba ema atu hetan tabaku tamba sira kbi’it kapasidade de kompra ne’e liu hela.
  • Uza tabaku nu’udar pratika la saudavel nebé ema Timor oan uza iha tenpu naruk sein intervensaun no koñesementu. Nu’une ema barak aditivu no kontinua fuma to’o ohin loron.
  • Lei No.8/2008 “Lei Tributaria” fó hela espasu ba kompania sira atu importa tabaku ho kuantidade bo’ot mai Timor, tanba tuir lei ne’e kualker produtu importasaun inklui produtu tabaku, wainhira importa mai tenki selu taxa 5% no exice tax ba estadu, husi ne’e hakerek nota katak taxa ba tabaku nia presia halo diferente ho produtu sira seluk nian. Maibe situasaun realidade indika katak Estadu preokupa liu taxa duke nia Povu nia saúde, iha sorin seluk mós Governu tenta finji la hatene ou lahatene dunik, katak reseitas nebé mak tama husi produtu tabaku ba kofre estadu ki’ik liu kompara ho despezas nebé kada tinan Governu gastu ba halo tratamentu ba moras la hada’et ne’ebé nia kauza mai husi fuma tabaku.
  • Jestaun fatin ba vendedor tabaku mós ladauk akontese, tanba realidade hatudu ema fa’an tabaku besik liu edifisiu públik sira, ezemplu hanesan eskola halo estudante sira fasil liu atu hola tabaku. Dadus hatudu iha leten númeru fuma husi estudante sira mós a’as.
  • Ita iha rezimi kontrolu tabaku Lei No.14/2016, maibé iha pratika hatudu katak juridisaun husi lei ne’e ladauk iha, no atu hateten katak ita iha lei kontrolu tabaku ne’ebé mak forte maibé iha implemensaun mak seidauk masimu. Maske iha espasu ba Policia Nasional Timor-Leste mak atu ezeku lei ida ne’e, maibé faktus barak hatudu PNTL mak barak hahú uluk fuma.
  • Atensaun Familia ba oan sira seidauk maximu, tamba faktus real barak hatudu Oan ho idade minoridade ba sosa tabaku le hetan bandu husi inan no aman, pior liutan mak inan aman haruka sira ba sosa sira nia tabaku.
  • Kauza seluk mak iha públik sempre mosu diverjensia boot entre ema fuma dor no laos fumador, ema ida-idak mai aprejenta sira nia versaun. Ema fumador sira nia versaun, fuma mos mate, la fuma mos mate, ema sosa tabaku osan ami nia osan laos uza ita boot sira nia osan, ami fuma tabaku kontribui ba rendimentu ekonomia familia, ami fuma tabaku hatama rendimentu ba estadu, ami la fuma tabaku ami sei la bele estuda ou servisu. Husi versaun fumador sira nian iha ona indikador hatudu katak ita sidadaun barak la seriu atu kumpri lei  tabaku no lei sira seluk ne’ebé temin iha leten.

Ho kauza sira hanesan ne’e mak prevalensia númeru fumador iha Timor aas no kada tinan sempre fo todan gastus familia, hatodan despezas estadu nune’e mós ema lakon sira nia produtividade.  Ho nune’e mai ita hare hamutuk impaktu negativu husi kauza fuma tabaku.

Taxa Mortalidade husi Moras La Hadaet iha Timor-Leste

Husi hahalok la saudavel no prevalensia aas iha leten, nu’udar nia konsekuensia taxa mortalidade baixa no tratamentu ba moras la hada’et sa’e aas ba bei-beik.

  • Dadus husi CHC-Hospital Nasional [7]hatudu tratamentu no baixa ba moras la hada’et iha tinan ida liu ba 30.000. husi númeru ne’e Ema liu 1.000 mak mate, ema barak mak disifisiente tamba sofre moras Stroke, Hipertensaun no Atakasaun Fuan.
  • Tuir dadus Monitorizasaun ba moras la hada’et husi Organizasaun Mundial Saude (OMS) [8]iha tinan 2016-2019 hatudu taxa mortalidade ba moras la hada’et total 3.300/ (45%), 20% husi dadus Mortalidade mak mate premature ka tamba mate sedu tamba moras la hada’et.
  • Iha parte seluk se ita hare iha Sensus 2015 [9] Ema ho idade 60 ba leten total 5% de’it, ne’e hatudu, katak prevalensia mate sedu ka mate prematura ne’e nia numeru aas tebes. (Ema barak la bele moris liu husi 60 ba leten)
  • Demografia Survey Saude 2016 mós hatudu ita nia Life Expectancy (Espektativa Moris)[10] 66 anos mai kraik. Ne’e hatudu katak iha esperansa da vida ne’e tun liu, kompara ho Nasaun sira seluk hanesan Japaun sira nia indes eperansa da vida ne’e hahu husi 80 anos ba leten.
  • Desvantagen Ekonomia ba Nasaun no Familia

Uza tabaku la’os fó impaktu negativu ba Saude, maibe fó mós impaktu negativu ba ekonomia nasaun no familia nian, no alende lakon produtividade no nasaun mós barak hodi halo tratamentu ba Saude.

  • Gastus tratamentu saúde ba moras la hada’et iha Timor-Leste tuir relatóriu husi Assosiasaun Mediku Timor-Leste kada tinan USD 7 Milloeñs.
  • Survey ne’ebé ANCT realize iha tinan 2017-2018 [11]hatudu jeralmente fumador sira gasta $1.00 dolar kada loron-loron hodi sosa produtu tabaku. Ne’e hatudu katak gastus ne’ebé bo’ot husi invidu ne’ebé fuma no hatodan mós despezas estadu nian ba tramanetu moras la hada’et ne’ebé mak barak liu nia kauza mai husi tabaku. Ne’e hatudu katak, ezemplu ema rihun 5 deit mak fuma iha Timor loron ida bele gasta $5,000 ba tabaku ba tinan ida, wainhira ita multiplika montante ne’e ba tinan ida besik Milloeñs 2. Nu’une ita bele kalkula husi persentajen uza tabaku iha Timor hatudu gastu bo’ot liu-tan.
  • Além-de saúde, tabaku mós iha efeitu sosial, ekonomia no ambiental. Uza tabaku sai hanesan kauza bo’ot ba pobreza iha nivel individual, familia no nasional, ba ema ho rendimentu ki’ik, tabaku foti tiha sira-nia rendimentu ne’ebé hetan husi serbisu maka’as ne’ebé tuir lolos bele utiliza ou gastus ba sira nia nesesidade bázika sira hanesan ai-han, saúde no edukasaun. Ezemplu, mai ita hare hamutuk kauza senáriu ne’e: kondutór mikrolete ida ne’ebé fuma, rata-rata, sigaru ho nia presu dua dolar kada loron no kada fulan nia gastus besik $. 50.00-60.00 dolar ba sigaru, husi ne’e atu hateten katak kondutor ne’e gastus tiha 50% husi nia salariu ne’ebé mak iha ba sosa tabaku, nune’e prejudika atu kompleta nia nesesidade bázika sira seluk. [12]
  • Husi peskiza balun iha leten hatudu katak kada loron ema ida gastus 1 dolar ba sosa tabaku. Iha hare fali numeru uza tabaku iha Timor-Leste total 71% karik ita muda ba númeru total ema uza tabaku iha timor 828.741 husi nímeru ne’e kada loron sira gastus 1 dolar no tinan ida nia laran sira gastus U$$. 302.490. 465 husi ne’e karik sira gastu durante tinan lima U$$. 1.512. 452. 325, husi ne’e halo ita admira tebe-tebes katak iha gastus boot ba sosa tabaku no bokur ba kompainia, maibe fumador sira nia rendimentu naben de’it, no afeita tan moras sira kauza halo ema mate. 
  1. Foinsa’e Barak Lakon Sira Nia Produtividade Sei Prejudika Nasaun Nia Future.
  • Ho númeru fuma tabaku foinsa’é aas tebes halo Nasaun nia esperansa mihis no problema boot ba futuru Timor nian. Foinsa’é sira ne’ebé mak ho potensialidade boot ba atu kontinua lidera Nasaun ida ne’e iha futuru, maibe la koseque atinji wainhira sira ativu liu fuma tabaku duke hola parte iha prosesu aprendisajem sira hotu. Nune’e lakon sira nia produtividade, nune’e mós nasaun lakon nia jerasaun ida ne’ebé merese atu kontinua sustentabilidade rai ida ne’e, tamba jersaun ida ne’e mate tamba epidimia tabaku.  
    • Solusaun

Ho situasaun sira iha leten fó lembra ona mai ita oinsa mak atu buka solusaun ida adekuadu hodi kombate epidimia tabaku iha Timor-Leste hodi salva jerasaun foun nia saude.

No tuir hakerek na’in nia hanoin

  • Vontade Pulítika sira tenki di’ak.
  • Servisu liña Ministeriais sira tenki ativu no koerente ba asuntu tabaku tuir lei tabaku artigu 25 ne’e rekomenda atu estabelese Konselho Nasional Kontrolu Tabaku husi Primeiru Ministru.
  • Revoga lei tributaria hodi hasa’é taxa tabaku.
  • Hasa’e folin Tabaku
  • Implementasaun lei tabaku bazeia dunik ba nesesidade, no haforsa iha kontrolu.
  • Husu Intituisaun edukasaun sira atu iha regulamentu interna bandu estudante fuma.
  • Jestaun fatin vendedor tabaku sira tenki iha, no bandu atu labele fa’an tabaku arbiru iha públiku no kumpri lei tabaku.
  • Ministeiru Kordenador Asuntu Ekonomiku sebele revoga lei AIFAESA nian no fó kompetensia maximu ba aifaesa atu kontrolu tabaku.
  • Ministeiro saude, ministeiro Defeza, ministeiro edukasaun, ministeiru MAKE, no Parlamentu Nasional atu hametin liu liña servisu ho Sociedade Sivil sira ne’ebé mak durante ne’e servisu maka’as ba kombate epidimia tabaku.
    • Rekomendasaun.
  • Husu ba Ministeiro Saude kontinua Kampanha informasaun sira kona-ba tabaku tenki kobre foinsa’e sira tomak, tenki ativu no efektivu.
  • Husu Inan no Aman atu haforsa Edukasaun familia ba Oan sira no tenki garante oan sira labele fuma tabaku ou haruka ba sosa tabaku.
  • Husu ba implementador sira atu Implementasaun Lei No.14/2016 ne’e  ho seriu no tenki iha mos kontrolu maximu. 
  • Husu ba Parlamentu Nasional atu revoga Lei No.8/2008 Lei Tributaria, atu nune’e bele kria artigu espesifiku ida hodi hasa’e taxa tabaku husi 5% ba 20% ou 30%.
  • Husu mós ba Governu relevante sira hahu hanoin ona atu estabelese Komisaun Nasional Kontrolu Tabaku.
  • Husu mós Ministeiro Kordenador Asuntu Ekonomiku, atu revoga Lei organika AIFAESA nian, par abele fo kompetensia maximu ba AIFAESA atu kontrolu tabaku, tamba agora daudaun sira sei hela deit ho Despaixu Primeiro Ministro Dr. Rui M. Ararujo nian iha tinan 2016 liuba.
  • Husu mós Komandu PNTL atu orienta ita nia membru sira atu kontrolu maximu ba tabaku tuir orden sira ne’ebé deskreve ona iha Lei No.14/2016. (Rejimi Kontrolu Tabaku).
    • Konkluzaun

Ho nune’e hatudu katak fuma tabaku la’sos dalan diak ba rezolve ekonomia Familia no nasaun nian, maibe fuma tabaku hamenus ema nia produtividade menus, halo ema nia esperansa da vida ne’e ho persentajem ne’ebé mak ki’ik liu, ikus liu fuma tabaku iha efeitu boot ba hahori moras la hada’et iha ema nia isin lolon no ikus liu ba kauza númeru mate prematura aumenta. Iha sorin seluk fuma tabaku sei la rezolve ema nia ekonomia familia tamba kada loron ema sempre gastu $1 dolar ba sosa tabaku, maske tuir relatoriu UNDP nian hatudu katak rendimentu familia nian iha Timor kada loron konsumu de’it 0.66%, $.0,05 centavos mós la to’o ne’e hatudu problema boot ba ekonomia familia la’os rezolve ekonomia familia. Nune’e fuma tabaku sei hatodan de’it mak despezas estadu nian la’os rezolve ekonomia estadu, tamba kada tinan estadu tenki gastu $. 7.000.000 (milõens) ba tratamentu saúde (moras la-hada’et), maske reseita sira ne’ebé tama husi taxa tabaku nian ba kofre estadu ki’ik liu.

  1. Referensia

Peskiza Ministeiru saude 2016

Peskiza DHS 2016

Peskiza Global ba Foinsa’e 2019

Dekreitu Lei No 51/ 21-12-2011 ( lei atividade publikasaun).

Rezolusaun Parlamentu Nasional No.13/2004.

Lei No. 14/2016 (Rejimi kontrolu tabaku)

Relatoriu CHC-Hospital Nasional

Monitorizaun ba Moras La hada’et husi OMS (2016-2019)

Fontes: Policy Brief / ANCT

Sensus 2015

Demografia Survey Ministeiro saude (Life Expectancy)

Survey ANCT 2017-2018


[1] Peskiza Ministeiru saude 2016

[2] Peskiza DHS 2016

[3] Peskiza Global ba Foinsa’e 2019

[4]Dekreitu Lei No 51/ 21-12-2011 (esbosu lei atividade publikasaun).

[5] Rezolusaun Parlamentu Nasional No.13/2004.

[6] Lei No. 14/2016 (Rejimi kontrolu tabaku)

[7] Relatoriu CHC-Hospital Nasional

[8] Monitorizaun ba Moras La hada’et husi OMS (2016-2019)

[9] Sensus 2015

[10] Demografia Survey Ministeiro saude (Life Expectancy)

[11] Survey ANCT 2017-2018

[12] Fontes: Policy Brief / ANCT

*(Jaimito Siqueira Gusmão, Estudante Ativu Ho Semester VI, iha Departamentu Polítika Públika –UNTL, Estudante Klase Intermediariu Direitus Umanus Iha AJAR-TL, Agora Voluntariu Profisional Iha Alliansa Nasional Kontrolo Tabaku. Email: jaimitogusmao18@gmail.com , ID Facebook – Jaimito S. Gusmão.No. Tlf: +670 75488529).

Print Friendly, PDF & Email

LEAVE A REPLY

Please enter your comment!
Please enter your name here