Reportazen Adroaldo ‘Saretukau’
Grupu English Conversation Course (ECC) halo atividade komunitariu iha municipiu AIleu, suku Aisirimou hodi fahe nesesidade bazika ba uma kain vulneravel 10.
Liu hosi asaun sosial refere, Xefe Suku Aisirimou, Ilidio Mau-Felo hateten asaun ne’ebé Grupu ECC halo mak asaun solidariedade, hodi ba vizita li-liu ba ema ne’ebé vulneravel, sira ne’ebé moras hanesan stroke no seluk tan.
“Xéfe aldeia no Xefe juventude nomos joven sira, ba vizita inan-aman sira iha ida-idak nia uma, ne’ebe sira ba direitamente hodi haree kondisaun ne’ebé inan-aman sira hasoru, hodi simu direita sasan liu hosi asaun karidade ida ne’e,” Xefe suku Ilidio Informa ba Neon Metin via telefone, 29/11.
Nia hatutan membru autoridade lokal sira akompaña grupu ECC, hodi ba direita halo asaun karidade ba fatin ne’ebé sira identifika ona.
Iha fatin hanesan Prezidente Komisaun Organizadora Grupu ECC, Ervina H.da C. Guterres hateten ECC suporta uma kain 10 iha suku Aisirimou, sasan sira ne’ebe oferese mak hanesan nesesidade bazika hanesna foos, mina, masin no seluktan.
Atividade ne’ebe ECC organiza hetan apoiu orsamety hosi Banco Nacional de Comercio Timor-Leste (BNCTL) no Onshot
Grupu ECC eziste besik tinan 10, ECC halao kursu ingles ba jovem sira ho gratuita, alende kursu ingles, ECC mos halao atividade komunitariu, limpeza no debate.