Home Justisa PN La Aprova Orsamentu Ba Eis-Organizasaun Resistensia Sira

PN La Aprova Orsamentu Ba Eis-Organizasaun Resistensia Sira

1296
0
Parlementu Nasional (foto: East Timor Law and Justice Bulletin)

Proposta ba husu Orsamentu Geral Estadu (OGE) hodi apoio eis-organizasaun resistensia sira hetan vota kontra iha Parlementu Nasional. OJECTIL, OPJLATIL, Sagrada Familia, FITUN, RENETIL, no organizasaun resistensira sira seluk seidauk bele hetan apoio Orsamentu Geral Estadu.

Deputadu Partido Demokratiku (PD), Antonio Conceição, hato’o proposta orsamentu ida iha Parlementu Nasional, 29/08, hodi husu governo tau iha OGE hodi fo apoio ba organizasaun rezistensia sira. Iha proposta ne’e Deputadu Antonio hatete katak nia hato’o proposta ne’e ho obejtivo  atu Governo apoio organizasaun resistensia sira, para depois sira bele kontinua halo sira nia misaun no sai parseiru ba dezenvolvimentu ba estadu.

Hosi Bankada Partido Libertasaun Popular (PLP), Deputadu Abel Pires, bainhira Neon Metin kontaktu liu hosi messenger hatete katak,”osan ne’e fasil atu hatama maibe depois kuandu la iha enkuadramentu legal ne’e implementa oinsa? Tan ne’e mak barak desidi atu tunda ba 2019 hodi aproveita tempu dezenvolve lai politika ne’e didiak.” Deputadu Abel mos reforsa katak nia rasik hato’o argumentu lubuk ida hodi afavor proposta ne’e, maibe Governo iha razaun duni.

Votus Afavor ba proposta apoio OGE ba organizasaun resistensia ne’e hamutuk 28, vota kontra 32, no abstain 2.

Maski Deputadu AMP balun konsidera proposta ne’e importante maibe sira vota kontra nafatin. Deputadu balun ne’ebe vota kontra mak membru RENETIL mos. Resolusan  iha Kongresu RENETIL VII atu advokasia ba Governo atu konsidera misaun kontinua hosi organizasaun resistensia sira nian.

RENETIL nia Kongresu VII, 17 Marsu 2018, halo iha CCD halo resolusaun ida hodi husu apoio orsamentu estadu ba organizasaun resistensia sira mak sei kontinua halo sira nia misaun libertasaun povo. Kongresista sira konsidera katak misaun organizasaun resistensia nian sira seidauk hotu. Importante ba organizasaun sira ne’e atu kontinua halao sira nia servisu hodi halo edukasaun sidadania, haburas sintidu nasionalizmu no patriotizmu.

Bainhira Parlementu la aprova proposta kona ba apoio OGE ba eis-organizasaun resistensia sira, ne’e husik hela perguntas importante lubuk ida. Misaun Organizasaun Resistensia hotu ona ka seidauk? Sira luta ba libertasaun patria deit ka sira luta mos libertasaun povo? Tanba sa mak ih OGE ba organizasaun sosiedade civil maibe la iha orsamentu ba ex-organizasaun resistensia sira mak hakarak kontinua halao sira nia misaun libertasaun povo?

LEAVE A REPLY

Please enter your comment!
Please enter your name here