Home EduTek Estudante Agrikultura 12 hosi UNTL, UNITAL no UNPAZ prontu ba estajiu...

Estudante Agrikultura 12 hosi UNTL, UNITAL no UNPAZ prontu ba estajiu iha komunidade

349
0
Estudante UNTL, UNITAL no UNPAZ iha Treinamentu Antes ba Estajiu (foto: Tito 'La-liu' Assis)

Reporter: Tito ‘La-liu’ Assis

Avansa Agriculture Project (USAID) fo treinamentu ba estudante na’in 12 husi universidade UNTL, UNITAL no UNPAZ atu tuir estájiu durante fulan 3 to’o 6 iha Munisipiu Ermera, Aileu, Bobonaro no Same. Treinamentu ne’e espera bele hasa’e kapasidade abilidade, esperiénsia ba estudante estajiáriu sira hodi bele hatene knar nudár estajiáriu.

Jacinta Mendonça, staff husi Avansa Agriculture Project (USAID) espera estudante sira bele preparadu liutan atu servisu ho grupo komunidade sira iha kampu.

“Avansa Agriculture Project halo programa ba estájiu fo ba estudante agrikultura sira tanba estudante sira sei menus koñesimentu, falta abilidade no la preparadu atu servisu pratika iha kampu ho komunidade. Nia salienta tan ba estudante estajiáriu katak hau espera husi treinamentu ida ne’e membru estajiáriu sira ne’ebé pasa ona iha selesaun dokumentu depois entrevista mós pasa hotu ona hau hanoin husi treinamentu ne’e bele preparadu, oinsá mak bele servisu hamutuk ho ekipa iha komunidade agrikultór sira iha kampu, oinsá mak bele atende ema ne’ebé difisil atu servisu hamutuk, oinsá bele fo solusaun ba problema liu-liu kona ba horticulture, no aumenta sira nia koñesimentu oinsá mak bele halo planu rasik durante fulan 3-6 depois hato’o relatóriu ba ami, “ hateten Jacinta iha fatin treinamentu Knua Joventude Fila Liman, 29/08.

Iha fatin hanesan estudante UNTL, Departamentu Agronomia, Saturnino hateten ba jornalista katak husi treinamentu ida ne’e hanesan informasaun ida ba hau atu tuir estájiu antes tun ba kampu, ho matéria treinamentu ne’ebé mak diferente atu ami bele koñese uitoan oinsá atu servisu hamutuk iha ekipa ida ho komunidade, oinsá mak bele komunika ho ema ne’ebé mak ninia karakterístika diferente ho ita, nune’e bele konvense ema nia hanoin atu bele tuir ita nia objetivu. Saturnino hateten tan katak nia sente kontente tanba bele hetan relasionadu iha periodu dauluk estájiu nian iha avansa agriculture project ne’ebé servisu hamutuk ho parseiru ONG no instituisaun governu ne’ebé iha planu atu rekruta estudante agrikultura iha universitariu ne’ebé mak estuda kona-ba horticultura.

Estudante UNPAZ, Madalena Sarmento, mak tuir treinamentu ne’e, nia mos senti kontente tanba ho treinamentu ida ne’e bele komprende servisu nudár estajiáriu iha kampu ne’e atu halo saida, tanba iha eskola ne’e ami hetan deit mak teoria maibé ho treinamentu ne’e bele hatene servisu saida deit mak bele halo ho komunidade agrikultur sira iha area rural. Nia espera katak ho treinamentu ida ne’e bele servisu hamutuk ho komunidade agrikultór sira hodi bele hadia kualidade produtu no hasae kuantidade produsaun hortikultura nian, nune’e agrikultór bele hetan rendimentu no hadia sira nia moris liu husi merkadu hortikultura.

Treinamentu ne’e hetan partisipasaun husi estudante graduadu ne’ebé mak hasai Lisensiatura Agrikultura no finalist husi Fakuldade Agrikultura iha UNTL UNITAL  no UNPAZ. Membru estajiáriu sira ne’e sei koloka ba DILI-MART na’in 8, Fundasaun Malaedoi na’in 2 no organizasaun Fundasaun HADER (Hadi’a Dezenvolvimentu Ekonomia Rural) na’in 2.

Tinan 2020 avansa agriculture project ne’e ninia kontratadu hotu ona ho governu tanba ne’e avansa agriculture project USAID ne’e entrega fali ba Knua Joventude Fila Liman  mak sei kontinua projetu ida ne’e ho estudante universidade.

 

LEAVE A REPLY

Please enter your comment!
Please enter your name here