Home Uncategorized Observasaun ba Lei OJE 2018: Problema no Nia Implikasaun Sira ba Timor-Leste

Observasaun ba Lei OJE 2018: Problema no Nia Implikasaun Sira ba Timor-Leste

724
0

Hosi: Juvinal Dias*

Hanesan palavra introdusaun nian, artigu ida ne’e mai hosi analiza no observasaun hakerek na’in nian ba asuntu balu de’it iha proposta Lei orsamentu 2018 ne’ebé iha relasaun ho projetu infrastrutura sira no alokasaun hosi Fundu Petrolíferu nian. Observasaun sira ne’e mak hanesan tuir mai:

OJE 2018: sei sai “karimbu” ba pratika orsamentál ida ne’ebé la transparente

Daudauk ne’e, Parlamentu Nasional diskute namanas hela ba proposta Orsamentu Jerál Estadu (OJE) 2018, Iha OJE ne’e, Governu propoin atu aloka osan biliaun $1.279.60 ne’ebé kompostu hosi millaun $883.90 atu ba finansia despeza rekorente sira no millaun $395.6 ba despeza kapitál. Maske planu orsamentál ida ne’e menus 8.4 kompara ho Orsamentu Jerál Estadu 2017, maibé kontinua iha kreximentu orsamentál iha kategoria sira hanesan kapitál (aumenta 11%) no bens e servisu (6.1%).

Hosi millaun $395.6 ne’ebé aloka ba iha despeza kapitál ne’e, millaun $324.407 aloka ba iha projetu infrastrutura sira ne’ebé Timor-Leste finansia rasik, millaun $61.6 ba projetu sira ne’ebé finansia ho osan empréstimu no millaun $3.6 de’it mak aloka ba iha kapitál minor. Hosi despeza ba projetu infrastrutura ne’e, iha projetu rua deit mak domina tiha, hanesan millaun $100.533 aloka ba projetu Tasi Mane no millaun $128.836 aloka ba projetu estrada sira. Hosi total despeza ba estrada nian,millaun $46.570aloka ba projetu sira ne’ebé laiha kontratu, emerjénsia no mós ba projetu ajudikadu sira ne’ebé la orsamentá antes iha OJE 2017 hosi CAFI (Konsellu Administrasaun Fundu Infrastrutura nian).

Iha tinan 2017 bainhira VII Governu Konstitusional aprezenta proposta Orsamentu Rektifikativu 2017, Governantes no deputadu balu mensiona projetu 143 ne’ebé mak ajudika ho la transparente iha Juñu no Jullu molok Eleisaun Jerál Estadu 2017. Maske iha duvida ho nia prosesu aprovizionamentu, maibé Oitavu Governu hatama tiha projetu sira ne’e iha proposta OJE 2018. Ha’u hare, desizaun ida ne’e atu obriga hodi legaliza projetu “naun-orsamental” sira iha 2017 ne’e iha livru 3-A anexu 12 ho valor millaun $331.741.277 no Anexu 13 ho valor millaun $3.596 atu hetan pagamentu hosi estadu.

Buat interesante iha mak, Governu la selu hotu projetu sira ne’e iha tinan ida ne’e, maibé planeia atu aloka de’it millaun $13.7, no sei aloka millaun $278.3 iha OJE 2019 no millaun lubuk tan iha OJE 2020. Ne’e atu hateten de’it katak kuandu hetan ona aprovasaun no promulgasaun, OJE 2018 mak sei sai karimbuhodi kesi tiha estadu Timor-Leste hodi hahú pagamentu ba projetu ne’ebé ajudika ho “la transparente” ne’e. Buat polítika orsamentál ida ne’ebé viola prinsipiu transparénsia no boa governasaun ba dinheiro publico.

Preambulu Lei Fundu Petrolíferu hatuur hela prinsipiu fundamental ida katak, presiza iha planeamentu ne’ebé efisiente no presiza ezekusaun orsamentu estadu ida ne’ebé loloos nudár parte ida hosi boa governasaun ba riku soin petrolíferu. Nune’e, antes estadu selu projetu sira ne’e, loloos tenke iha inkéritu Parlamentár no auditoria hosi Tribunal das Contas ba Concelho de Administracao do Fundo das Infraestruturas (CAFI) no mós Comissao Nacional de Aprovizionamentu (CNA) no Ministériu Obras Publicas ba prosesu ajudikasun hirak ne’e iha 2017.

Analiza ida ne’e hakarak esplika katak avaliasaun ida ne’ebé kle’an ba projetu sira ne’e, sei asegura kualidade despeza sira, espesialmente iha tinan oin mai kuandu Governu prepara hela atu aloka tan maizumenus millaun $278.3 hodi ba selu projetu “naun orsamentál” sira ne’e, ne’ebé sei halo Orsamentu 2019 iha sae ba iha nivel biliaun $1.772.9 ka mós posivel hodi bele liu tan.

Projetu emerjénsia barak mak loloos bele preve antes

Hanesan deskreve antes, proposta orsamentu ne’e mós aloka osan lubuk atu selu projetu emerjénsia sira ne’ebé Governu ajudika ba kompañia sira iha tinan sira balu liu ba. Projetu emerjénsia sira ne’e nia valor loloos mak millaun $87.229.633 no iha proposta OJE 2018 ne’e aloka millaun $19.079 no millaun balu tan atu gasta iha tinan sira oin mai, maske nune’e, iha millaun balu mak gasta ona iha tinan sira pasadu.

Infelizmente, projetu sira ne’ebé kategoriza nudár emerjénsia ne’e loloos bele preve hela antes, ka loloos labele konsidera nudár kategoria “necessidades urgentes e imprevistas”hanesan deskreve iha Artigu 37 hosi Lei Orsamentu no Jestaun Finanseiru. Bainhira Governu labele kontrola ona nia despeza sira ne’e tuir regra loloos ba kategoria sira ne’ebé iha, Timor-Leste sei lakon valor osan barak tan, tanba gasta osan sem iha avaliasaun sira ne’ebé transparente no kontavel.

Dalan ida ne’ebé prudente liu ba Parlamentu atu halo molok aprova osan ba selu projetu sira ne’e mak, tenke halo verifikasaun ba projetu sira ne’e hodi hatene merese ka lae projetu ne’ebé implementa ona ne’e tama kategoria necessidades urgentes e imprevistaska lae, hodi nune’e ita bele salva osan povu nian ka uza osan povu nian atu fó benefísiu duni ba povu sira duke benefisia ema elite ka kompañia na’in sira de’it, inklui ajuda tiha ema riku sira hodi hasees tiha sira nia kontabilidade no responsabilidade ba kumpre regra no lei aprovizionamentu sira ne’ebé prevaleze iha Timor-Leste.

Proposta Lei OJE 2018 la halo “diskriminasaun reseita” tuir Konstituisaun RDTL

Proposta Lei OJE ho biliaun $1.279.6 ne’e, konsidera deit miliaun 984.8 mak sei transfere hosi Fundu Petroliferu ne’ebe miliaun $550.4 mak sei mai hosi nivel Rendimentu Sustentavel Estimadu (RSE) no ida ne’ebe mak excede RSE mak miliaun $434.4 ne’ebe sei fo ameasa ba hamenus saldo Fundu Petroliferu ho lalais no mos hamenus RSE iha tinan sira oin mai.

Mezmu nune’e, loloos transferensia hosi Fundu Petroliferu iha tinan 2018 hamutuk biliaun $1.054.8bainhira inklui tiha miliaun $70 ne’ebe Setimo Governu Konstitusional transfere hodi finansia despeza estadu nian iha fulan Maiu no Junu 2018 nian. Proposta Lei Orsamentu Jeral Estadu ida ne’e konsidera deit despeza real miliaun $44.4 hosi miliaun $70 nudar utilizasaun hosi Saldo da Conta do Tesouro, no la’os transferensia hosi Fundu Petroliferu ba Orsamentu Jeral Estadu 2018.

Artigu 5.3 hosi proposta Lei Orsamentu Jeral Estadu 2018 ne’e hases tiha nia responsabilidade Oitavu Governu nian ba transferénsia osan miliaun $70 ne’e. Provizaun iha proposta Lei ida ne’e viola tiha prinsipiu Konstituisaun Artigu 145.2 katak “Lei Orsamentu nian tenke prevé, ho baze iha efisiénsia no efikásia, diskriminasaun reseitano despeza nian, no mós, sees husi dotasaun no fundu sekretu sira.” Nune’e mos viola Artigu 7.1 Lei Fundu Petroliferu nian katak osan sira ne’ebe autorizado atu transfere nee so “….para crédito de uma conta única do Orçamento do Estado”.

Foti liu RSE 3% nudár parte violasaun prinsipiu “igualitária” entre jerasaun sira

Dezde tinan sanulu liu ba, reseita Petrolíferu domina tebes ekonomia no kuaze finansia tomak atividade estadu Timor-Leste nian. Dezde 2003 to iha 2017, Timor-Leste rekolla ona liu biliaun $21 hosi esportasaun petróleu no gas, no biliaun $4.8 husi retornu investimentu Fundu Petrolíferu.

Dezde Kitan maran iha 2015 no rezerva Bayu Undan hahú menus ona, retornu investimentu Fundu Petrolíferu mak fó influensia maka’as ba dezempeñu Fundu Petrolíferu. Maske nune’e, retornu investimentu Fundu nian ne’e volatile tuir merkadu asoens nia situasaun no laiha ema ida mak bele kontrola. Ezemplu mak, iha fim de 2017, Fundu Petrolíferu hetan retornu investimentu ho valor biliaun $1.612, retornu investimentu ida ne’ebé as liu dezde Timor-Leste estabelese nia Fundu Petrolíferu. Maske nune’e, dezempeñu merkadu nian durante iha trimester rua ikus iha 2018 la’o kontráriu fali katak retornu investimentu sei negativu ka lakon hela millaun $53.9.

Retornu negativu ne’e akontese tanba Fundu Petrolíferu lakon maizumenus millaun $91.2 iha Primeira Trimester no hetan retornu millaun $37.3 iha Segunda Trimester. Maske iha Segunda Trimester Fundu hetan retornu pozitivu 0.26%, maibé persentajen ne’ebé hetan ne’e kontinua menus hosi benchmark 0.28% ne’ebé ekspeta atu atinje.

Maske Trimestre rua ikus ne’e Timor-Leste nia Fundu Petrolíferu enfrenta hela retornu ne’ebé negativu, maibé Governu hakarak kontinua foti liu Rendimentu Sustentável Estimadu (RSE). RSE ne’e iha nia objetivu atu Stabiliza rendimentu Governu nian bainhira mina folin la estavel, kria depois de petróleu maran, iha tinan 2023 (Karik la dezenvolve Sunrise) no mós redús tentasaun atu gasta-liu bainhira rendimentu aumenta temporariamente. Kuandu Governu beibeik foti Fundu Petrolíferu liu RSE tinan-tinan, Fundu sei hotu lalais liu iha jerasaun ida ne’e nia liman, maske Preambulu Lei Fundu Petrolíferu no Konstituisaun RDTL Artigu 139 husu hela atu konsidera direitu jerasaun sira futuru nian hanesan “….estabelecer um fundo de rendimentos a partir da exploração dos recursos petrolíferos não renováveis para a satisfação das necessidades da geração actual e das gerações vindouras.”.

Ba tinan hat oin mai, Governu propoin hela atu kada tinan sei halo levantamentu liu biliaun ida, maske iha serteza katak ita sei laiha tan kampu Bayu Undan iha tinan lima oin mai. Karik kampu gas Greater Sunrise seidauk bele dezenvolve lalais no reseita doméstika kontinua la hakat liu maizumenus miliaun $200 durante tinan hat oin mai, Fundu iha hela perigu boot.

Dalan ne’ebé Timor-Leste bele hili agora mak, tenke hahú hamenus despeza, ka la presiza gasta osan ba projetu sira ne’ebé laiha avaliasaun previa kona-ba nia valor ekonómiku sira, ita mós presiza evita an hosi inventa hodi dezeña projetu sira ba interese grupu elite ka polítiku balu iha Timor-Leste. Aleinde ne’e, estadu Timor-Leste bele fó atensaun ba dezenvolvimentu ekonomia naun petrolíferu nudár polítika diversifikasaun ekonómiku no prepara vijilánsia ba situasaun sira iha futuru bainhira Fundu Petrolíferu hotu ona ka labele fó ona retornu ida ne’ebé pozitivu.

Daudauk ne’e, produsaun ekonomia hosi setór alternativu sira seluk hanesan agrikultura, indústria ki’ik, turizmu no seluk tan seidauk fornese reseita ne’ebé signifikante. Tuir Orsamentu Jerál Estadu 2017, katak entre 2002-2017 total reseita kobrada hosi naun petrolíferu hamutuk biliaun $1.610, no maioria hosi reseita ida ne’e kobrada entre tinan 2012 to iha 2017. Montante anual ida ne’ebé la sufisiente atu selu de’it saláriu no vensimentu kada tinan. Timor-Leste loloos iha hela perigu ekonómiku ida ne’ebé “iha hela kanotak hela” maibé sei mosu iha tempu badak, no dala ruma susar ba ita atu bele rezolve. Infelizmente, setór sira importante ne’ebé foin mensiona ne’e la hetan atensaun no prioridade hosi ita nia proposta orsamentu estadu 2018.

Taxa re-embolsu KITAN la presiza orsamentá, maibé presiza informa

Iha proposta OJE 2018 ne’e, Governu aloka $64.5 milloens ba Todu Governu atu reembolsa fali reseitas fiskais ne’ebé selu liu tiha iha relasaun ho ekstrasaun hosi kampu mina Kitan iha tinan hurak liu ba. Ha’u hanoin katak prosesu re-reembolsa ida ne’e tenke tuir provizaun Artigu 10 Lei Fundu Petrolíferu ne’ebé hateten katak ” Transferências para Reembolso de Imposto” ne’e “representa uma redução das receitas do Fundo Petrolífero, e não será considerado parte da dotação aprovada ao abrigo do n.º 2 do artigo 7.º”(transferénsia ba Orsamentu Jerál Estado).

Dalan ida ne’ebé Parlamentu bele halo mak, husu relatóriu avaliasaun ba taxa excedente ne’e, inklui loke inkéritu Parlamentár ba Governu hodi mai esplika razaun no fundamentu sira hosi planu ida nee. Kuandu Parlamentu konvensidu ho esplikasaun hosi Governu, Timor-Leste bele reembolsa taxa exedente sira ne’e tuir mekanizmu legal ida ne’ebé haruka hosi Artigu 10 Lei Fundu Petrolíferu.

Bainhira Governu reembolsa taxa excedente ida ne’e tuir Artigu 10 Lei Fundu Petrolíferu, maske uitoan maibé automatikamente sei fó influensia ba númeru ba RSE ne’ebé kalkula ba iha tinan 2018, inklui ajuda atu kalkula montante loloos reseita Fundu Petrolíferu nian ne’ebé Timor-Leste hetan.

 *Hakerek na’in nudár Ativista RENETIL, Analista Orsamentál ba Core Group Transparency (CGT-TL), Membru Concelho Consultativo do Fundo Petrolifero (CCFP) no mós Host ba programa Televizaun Timor-Leste Diskute (TLD) iha TVE.

LEAVE A REPLY

Please enter your comment!
Please enter your name here