Reportazen Santina Lucia da Costa
Sekarik Prezidente da Republika foti desizaun ba eleisaun antesipa, PUDD pronto? 24 oras pronto atu atende, tanba PUDD kaer hela prinsipiu ida katak Prezidente da Republika nia desizaun mak ami nia opsaun.
Prezidente da Republika, Dr. Francisco Guterres Lu Olo, hasoru malu ho Partiu Unidade Desemvolvimentu Demokrasia [PUDD] hodi rona hanoin bai ha situasaun politika ne’ebe akontese dadauk.
Hafoin remata enkonru, Prezidente PUDD Antonio Benevides ba jornalista hateten relasiona ho situasan politika ne’e, dialogu ne’e hanesan Pao nosso de cada dia, ne’ebe lor-loron temi Parlamentu Nasional.
Antonio Benevides hateten liu hosi enkontru ho Prezidente da Republika katak dalan diak liu mak dialogu.
“Dialogu ne’e laos ida ne’e de’it no laos dala ida de’it, Prezidente presija rona dala rua to’o tolu husi partidu sira, depois maka Prezidente foti desijaun, “ami hatete ba Prezidente Republika katak, kualker desijaun saida mak prezidente foti ida ne’e mak ami nia opsaun, ami husu hakarak kontinua dialogu”, hateten Antonio Benevides.
Tuir PUDD nia hanoin katak desizaun saida deit ne’ebe Prezidente da Republika foti, PUDD refere liu ba dialogu, bainhira iha dialogu bebeik ne’ebe intensive ho fuan, sei bele hetan ninian solusaun diak.
“Kualker desijaun ne’ebé prezidente foti, ami refere ba dialogu, kuandu iha dialogu beibeik deialogu ne’ebé intensivu mai ho fuan, sei bele hetan ninia solusaun di’ak, prezidente mós sempre hateten iha kadiadu iha nia xave, iha problema iha solusaun”, tenik Antonio.
Sekarik Prezidente da Republika nia desizaun ba eleisaun antesipada, PUDD pronto? Hatan ba Neon Metin, Prezidente PUDD hateten, 24 oras pronto atu atende, tanba PUDD kaer hela prinsipiu ida katak, “Prezidente da Republika nia desizaun mak ami nia opsaun”.
