Reportajen Umbelina dos Reis
Centro Nasional Chega!I.P (CNC), servisu hamutuk ho Asosiasaun Venu sei organiza Festival Kultura Rezisténsia Populár (FKRP) ba dala-V, durante loron haat hahú hosi loron 7 to’o 10 dezembru 2023, ho tema “Funu, Memória no Trauma ba Esperansa.” Objetivu prinsipal hosi festival Kultura rezisténsia ne’e atu kontribui ba prosesu harii dame no rekonsiliasaun atu atinje meta hosi CNC nian katak sosiedade la repete fila-fali violénsia pasadu nian.
Diretor Ezekutivu Centro Nasional Chega, Hugo Maria Fernandes hateten, tinan ida ne’e realiza fila-fali festival kultura rezisténsia popular, eventu anual desde 2019.
“Aban loron 7 de dezembru loron invasaun Indonézia mai Timor no 10 dezembru loron direitus umanus Internasional, inisiu hosi festival ne’e introduz ba publíku konaba partisipasaun arte kompozitor múzika, kantor, poeta no pintura sira ne’ebe mak durante tinan 24 iha períodu okupasaun konflitu sira uza instrumentu arte sira ne’e hodi expresa sira nia rezisténsia no luta ba injustisa.” Dehan Diretor Ezekutivu CNC, Hugo Maria Fernandes, liu hosi Konferénsia Imprensa iha Salaun Konferénsia CNC Balide, kuarta-feira, 06/12.
Nia dehan, parte relevante tenki partisipasaun masimu tanba eventu ne’e importante hosi arte mundu nian ba luta ukun rasik aan. Nia hatutan, Centro Nasional Chega loron 08 dezembru sei halo ofisial lansamentu ba gravasaun múzika rezisténsia nian, publikasaun ba poezia, teatru, pintura no envolve artista Timor-oan sira.
Iha parte sorin, Diretor Asosiasaun Venu, Ananias Carlos informa, atividade prinsipal ne’ebé hala’o iha festival hodi hamosu efeitu kura kanek kompleta ho palku prinsipal tolu (3), primeiru palku Memória, segundu palku Fitar, terseiru palku Esperansa, inklui palku popular signifika livre, sé mak hakarak toka bele tau naran, atividade arte playground ba labarik sira.
“Atividade festival kultura rezisténsia ne’e hodi kontinua espiritu arte ema sira ne’ebé uluk luta ba libertasaun ne’e, entaun nu’udar artista Timor-oan kontinua hatutan sira nia espíritu liu hosi dalan arte nune’e kontribui ba dezenvolvimentu nasaun nian”, Diretor Asosiasaun Venu, Ananias Carlos, hatutan liu hosi Konferénsia Imprensa, iha Salaun CNC.
Atividade ne’e durante loron haat no sei hotu iha 10 dezembru. Lansamentu primeiru iha fatin jardin 5 de maiu, Portu Díli no restaurante Dilicious nian. Iha loron memória sei ba kari ai-funan iha Ponte-Kais.