Reportajen Joanina Casamiro
Sosiedade Sivil liuhosi Forum Organizasaun Naun-Governamental Timor-Leste (FONGTIL), Organiza Workshop Nasional, hodi halo aprezentasaun konaba Deskobrimentu no Rekomendasaun Auditoria Sosial ba Seitor Saude, Infrastrutura Baziku, Edukasaun no Inkluzaun Sosial.
Hafoin Workshop, Diretór Ezekutivu FONGTIL, Valentim da Costa Pinto, hateten atividade ohin ne’e fó oportunidade ba membru sira ne’ebé halo ona atividade auditorial ba setór agrikultura, edukasaun, saúde no infraestrutura bázika. Aproveita bele aprezenta rezultadu ne’ebé sira haree, tuir área ne’ebé sira halo, nune membru sira ohin mai halo aprosimasaun ba setór estrutura bázika, oinsá sira bele asesu ba bee no saneamentu baziku sira.
“Iha setor edukasaun liu-liu ba merenda eskolar ne’ebé la’o iha tereinu, no kondisaun sira kona-ba uma naroman ba povu, ne’ebe ita nia governu sesante implementa, nune’e mos haree ba setor saúde, haree ba prestasaun servisu liu-liu fasilita ita nia maluk ho defisiénsia sira nia atendementu ba iha fasilidade públiku nia deskobrimentu”, dehan Direitor FONTIL iha Otel Timor, Sesta 16/02.
Nia informa katak konaba asesu ba bee no Saneamentu báziku, tanba nafatin iha problema, no mos iha mudansa hanesan iha kapital, maibé iha área remotas mak sai hanesan dezafiu ne’ebé tenke esforsu makas, tanba bee ho saneamentu ne’e direitu báziku, ne’ebé sidadaun hotu tenke tuir padraun hodi bele ajuda família uma laran, atu bele tuir pratika jeniku. Pratika di’ak mak bele halo tuir ida-idak nia kondisaun saneamentu basiku seidauk, foin to’o iha metade 50%. Entaun governu liuhusi agénsia hotu-hotu tenke esforsu hodi halo dezenvolvementu bee ho Saneamentu tenke sai prioridade.
