Reportajen Umbelina dos Reis
Governu Xina ho UNICEF kolabora hamutuk hodi suporta komunidade sira ne’ebé hetan impaktu hosi inundasaun iha tinan 2021 ho orsamentu millaun US$1.5 ital inklui aloka ba programa tolu hanesan kombate malnutrisaun, bee saneamentu no setor edukasaun.
Embaixadora Xina ba Timor-Leste, Wang Wenli hateten, ohin loron 19 fevereiru governu Xina ho Fundu Nasoens Unidas ba Labarik (sigla Inglés UNICEF) lansa ona projetu ida ho valor millaun US$1.5 hodi kompleta apoiu governu Timor-Leste nian ba komunidade sira ne’ebé hetan impaktu hosi inundasaun.
“Asisténsia emerjénsia ba labarik sira hodi hatan ba inundasaun no COVID-19 iha Timor-Leste hamutuk ema na’in 146,000, fulan abril 2021, ne’ebé akontese hasoru pandemia COVID-19 no akontese inundasaun iha teritóriu Timor-Leste, ema hamutuk na’in 40 lakon sira-nia vida, uma-kain 30,367 liu mak hetan estragus.” Dehan embaizadora Xina Wang Wenli, liu hosi nia diskursu iha salaun Koffi Anan Caicoli, segunda-feira, 19/02.
Embaixadora ne’e informa, Governu Xina kontinua fó apoiu ba dezenvolvimentu nasaun Timor-Leste ne’ebé halo kooperasaun iha área infraestrutura, saúde, agrikultura no edukasaun. Projetu apoiu emerjénsia ne’e, implementa tanba servisu hamutuk ho UNICEF iha Timor-Leste. Projetu ne’e hein katak sei hetan benefísiu mais ou menus hosi labarik no feto sira na’in 150,000.
