Reportajen Cresência de Castro
Fundasaun Media Development Centre (FMDC) servisu hamutuk ho UN WOMEN no kolabora Konsellu Imprensa Timor-Leste, lansa media award no kompetisaun, atu sensibiliza asuntu kobertura jéneru ba jornalista sira iha Timor-Leste.
Liuhusi serimónia lansamentu ne’e, Diretór FMDC, Francisco da Silva Gari hateten objetivu husi lansamentu ne’e atu enkoraja jornalista sira, hodi bele prodúz notísia ne’ebé di’ak konaba igualdade jéneru ka halo reportajen sensivel ba jéneru.
Nune’e Prezidente Konsellu Imprensa, Otelio Ote hateten presiza tan atividade ka kompetisaun sira hanesan, atu hare ba jornalista sira nia kapasidade to ona iha ne’ebé, no mos bele partisipa atu influensia sira nia-an rasik no sira nia kolega.
entretantu reprezentante UN Women, Alita Verdial hateten media kaer papél importante tebes atu kontribui ba iha igualdade jéneru, hapara violénsia kontra feto no labarik feto, inklui ema ho defisiénsia atu investe ba feto no aselera progresu.
Nia hatutan katak loron feto tuir lolos investe ba feto, nia tema “reflesaun ne ba investe iha osan estadu nian, ba aselera igualdade jéneru iha nasaun, investe ba iha asaun sosiál, saúde ba feto, saúde reprodutiva ba hapara violénsia kontra feto no edukasaun ba feto”.
“Espera Manual no formasaun sira ne’ebe mak sira halo ona, bele ajuda jornalista sira atu halo kobertura, labele halo tan vítima sira, hodi sai vítima ba dalarua, oinsa atu halo vitima sai sentru ona ka lae, tenke uza oklu jéneru nian, hodi hare katak kazu sira ezemplu soe bebe ne mos iha konsekuénsia husi asaun seluk karik, nia vítima husi violénsia doméstika, violénsia sexual, insestu tanba ita hare ema barak, sai santu iha media sosiál,” hateten Alita
Nia hakotu katak liu husi media award ne’e, sira koko atu hare oinsá hasae koñesimentu jornalista nian, oinsá halo kobertura ba promove igualdade jéneru, ho empodera feto inklui mos hapara violénsia kontra feto , labarik feto no ema ho defisiénsia.
Kompetisaun reportajen sensivel Jéneru, sei hala’o durante fulan rua no sei publika rezultadu ikus iha fulan Maio, iha loron liberdade imprensa no iha ekipa juri na’in lima mak sei halo monitorizasaun ba notísia ne’ebé mak media sira publika iha sira nia pájina, no media ne’ebé mak indikadu hodi hola parte ba kompetisaun ida ne’e mak Timor Post, Tatoli, Neon Metin, STL, Jornál Independente no Hatutan.
