Reportajen Umbelina, Agustina no Zevonia
Joven Feto husi Liquisa, Celina Sousa Fatima, postu administrativu Liquiça, suku Luculai ho nia diploma sekundáriu, maibé iha motivasaun boot hakarak kontribui ba nia komunidade liu hosi hanorin lian Inglés, ne’ebe nia aprende Science life System (SOLS).
Celina nia mehi hakarak empodera nia feto maluk sira, atu labele izola-an, maibé hola parte iha sosiedade liu-hosi partisipa iha atividade produtivu sira.
Celina hahú nia pre-primária iha eskola Luculai, primária iha eskola São João de Brito Liquiça no pre-sekundária iha ESG 1 no 2 Liquiça. Hafoin remata nia estudu ensinu sekundária iha tinan 2019, no iha tinan 2020 kontinua tuir kursu língua Inglés iha SOLS 24/7, Aipelu Center, iha ne’eba nia aprende língua Inglés durante fulan neen, depois deside ba kontinua kursu iha Becora Center, maibé momentu ne’eba akontese pandemia Covid-19 entaun buat hotu paradu.
Iha tinan 2021, nia hahú hala’o atividade voluntária iha Asosiasaun Centro Juventude Liquiça (ACJL) no aplika nia abilidade hanorin lian Inglés ba estudante Liquiça oan sira.
Celina hanorin hela Inglesh ba joven sira iha Liquisa. [Foto: Umbelina]
“Liu-hosi voluntária iha ACJL ne’e, ha’u haknaar aan hanesan treinadora ba língua Ingleza, hodi bele fahe esperiénsia no étika moral, ne’ebé nia aprende iha SOLS, hodi lori fali esperiénsia mai iha Liquiça, hodi fahe ba joven Liquiça oan sira ne’ebé mak hakarak aprende língua Ingleza.” Tenik Celina ba Neon Metin.
Nia dehan liu-hosi voluntária iha ACJL, bele fó dalan ba nia hetan oportunidade, hodi lidera no hetan tan oportunidade voluntária tan iha Cruz Vermella Timor-Leste (CVTL) filial Liquiça, iha ne’eba nia aprende oinsá bele halo asisténsia umanitária ba maluk sira ne’ebé mak presiza sira nia tulun, hanesan kanaliza bee-moos ba komunidade sira.
Ba Celina hala’o atividade nu’udar voluntária ne’e la fasil, tanba la hetan selu, maibé agradese tanba “ha’u ida uluk ne’e la hanesan ha’u ida agora”, nia dehan, signifika liu-hosi voluntária ne’e nia bele hetan esperiénsia másimu oinsá bele lidera, iha komunikasaun di’ak ho asosiasaun no NGO seluk, liu-liu oinsá bele rezolve konflitu ruma no empoderamentu feto maluk sira.
Celina rasik motiva nia an, hodi aprende halo atividade ho voluntarizmu, ba nia nu’udar joven sekarik izola an deit iha uma, sente sei hasoru risku ida iha oin, nune nia esforsu an hodi aprende, tanba nia hanoin simplis deit, joven mak futuru ba nasaun ne’e.
“Hanesan joven feto ida haknaar an iha voluntária, hodi bele kapasita no gaña koñesimentu konabá feto nia servisu no hasa’e feto nia lian”, dehan Celina.
Maske nune’e Celina hetan dezafiu barak iha nia moris, oinsá sobrevive hodi hetan osan, maibe nia kontinua nafatin halo atividade voluntáriu ho nia abilidade iha lingua Ingles, nune’e bele tulun mos joven sira seluk ne’ebe hakarak hatene koalia Inglés
Dalabara kultura patriakal ne’ebe sempre impede feto sira nia espasu, hodi hakat ba oin, espasu ba sira kiik liu, maibe Celina koko hasoru kultura ne’e, hodi foti deside hodi kontribui, ba nia feto tenke bele hamrik iha oin, iha liña ida , hodi lider no partisipa iha atividade produtivu,
“Ba maluk feto sira ne’ebé sei izola an iha uma, keta baruk atu aprende liu-hosi voluntária tenke esforsu hodi gaña no luta hodi hetan esperiénsia no ambiente foun.” Nia dehan.
Hanorin ne’e la fasil, sempre iha obstaklu wainhira fasilita hanorin Inglés ba joven sira iha Asosiasaun ACJL, tanba Ingles laos lian materna, ho pasiénsia hodi hanorin. Númeru joven sira ne’ebe Celina hanorin hamutuk 40 resin, no sira ne’ebe hatene pratika hodi koalia Ingles husi tinan 2021-2024 kuaze nain 20 ona.
Celina konklui katak presiza hasae lian feto nian iha sosiedade, enkoraza feto maluk sira atu aprende lian internasionál, nune’e bele tulun sira koñese mundu ho klean
