Reportajen Silvino Freitas
Assosiasaun Transporte Contentores de Porto Timor Leste (ATCPTL) realiza kongresu ba dahuluk hodi harii sira nia asosiasaun ba transporte ne’ebé tula kontentores husi portu, durante nee transporte ne’ebé tula kontentór hasoru dezafiu balun, maibé laiha lideránsa ne’ebé ko’alia kona-ba sira nia problema, nune’e kompaña sira ne’ebé na’in ba transporte hirak ne’e halibur malu hodi harii rasik sira nia asosiasaun atu bele levanta direta sira kauza ba governu.
Paul Sarmento Prezidente Asembleia ba kongresu ATCPTL esplika, transporte sira ne’ebé tula kontentór sira iha timor leste durante nee laiha lei ka regulamentu ruma atu regula sira nune’e sira konsidera ne’e parte kauza ba sira nia atividade, nune’e durante ne’e sira hala’o atividade tula kontentór sira hasoru dezafiu barak maibé labele espresa tanba laiha lei ba sira.
“Durante ne’e ami hasoru ona difikuldade barak maibé laiha lideransa no la rona malu, entaun husi lamentasaun sira ne’e mak ami harii rasik ami nia asosiasaun, nunee problema no dazafiu sira ne’ebé ami infrenta ami nia lideránsa asosiasaun mak sei ba levanta iha governu” dehan prezidente asembleia ba kongresu ATCPTL ba jornalista sira iha City 8, (25/03).
Paul dehan tan, membru ba asosiasaun nee mai husi kompaña 26 ho karreta kamioneta ne’ebé tula kontentór hamutuk 165 mak durante ne’e halo movimentu hodi tula kontentor sira husi portu ba Dili no Munisipiu, nunee asosiasaun refere foin harii ho objetivu atu bele levanta kauza ne’ebé sira infrenta, nunee mós ba futuru aosiasaun nee hakarak sai parseiru ba dezenvolvimentu ekonomia ne’ebé diak liu, iha kongressu nee sira sei diskute sira nia estatutu hodi hili sira nia prezidente asosiasaun.
Diretor Jerál Ministeriu Transporte Telekomunikasaun (MTK) Constantino Fereira dehan, durante ne’e sira haree transporte hirak nee la’o dezorganizadu nunee ho evolusaun tranporte ne’ebé la’o dadaun nee mak obriga sira hodi koko atu organiza malu, durante ne’e MTK mos konsege ona hasoru sira atu bele haree ba sira nia interese, nunee sira hahu ona sira nia kongresu ba dahuluk nian ba asosiasaun nee hodi bele estabele estrutura ne’ebé diak ba futuru, atu laos haree deit ba transporte kontentore sira maibe koko ho vizaun ida hodi diversifika sira nia atividade sira seluk.
“agora ita haree uluk ba sira nia formasaun estrutura asosiasaun nian, nunee ba oin mak ita koko haree ba atu regulariza sira nia atividade tula kontentor husi portu tibar ba fatin seluk” promete DJ Constantino.