Reportajen Silvino Freitas
Governu liuhusi Ministériu Transporte Telekomunikasaun (MTK) sei bandu movimentasaun bus ne’ebé halo viajen iha tempu kalan hodi sirkula de’it iha tempu loron hahú husi tuku 6 dader too tuku 6 kalan, tanba akontesimentu ne’ebé pasajeiru sira reklama ba governu liga ho viajen bus nian, enkuantu governu mós sei suspende importasaun transporte tum-tum tanba la priense kritériu kódigu estrada no kódigu viatura nian.
Diretór MTK Constantino Fereira dehan, governu hala’o ona sosializasaun ba bus ho nain ba bus sira ne’ebé halo movimentu husi Dili ba munisipiu no husi munisipiu mai Dili iha ona konesimentu ba sira nia movimentu nunee iha tempu badak sei implementa planu refere, nomos sei halo avaliasaun ba atividade movimentasaun bus sira nian, bus sira durante nee halao movimentu iha tampu kalan maibe husi polisia tranzitu, diresaun nasional transporte terestre inklui ministeriu rasik simu reklamasaun barak liga ho akontesimentu viajen bus sira nian.
“bus sira hotu komesa husi lospalos too bobonaro no suai ne’ebé viajen mai Dili, sira sei muda nia orariu operasoens, sira nia movimentu nee hahu husi dadersan tuku 6 no too Dili tuku 6 kalan, ami seidauk halo konkluzaun ba medida maibe sei halo avaliasaun servisu hamutuk ho tranzitu nasional no munisipiu sira ho DNTT ami sei halo avalisaun ba ami nia planu ida nee” informa DJ Constantino ba jornalista sira iha City 8, (25/03).
Enkuantu, diretor jeral nee mos informa kona-ba movimentasaun transporte tum-tum ne’ebé iha ona lamentasaun barak, tanba iha Likisa, Lospalos, Manatuto no seluk tan ne’ebé domina husi tum-tum, tanba tuir kódigu estrada no kódigu importasaun viaturas mai timor leste nee nia velosidade maka minimu 40 KMH, maibe tum-tum la priense kreteriu sira ne’ebé estabelese iha kódigu estrada no viatura sira nee, tanba nee governu desidi atu suspende atividade inportasaun tum-tum mai timor leste.
“sira ne’ebé iha ona governu kontinua mantein, maibe importa foun governu bandu” dehan Constantino.
Diretor nee konklui katak, dadaun nee governu seidauk iha dadus kompletu maibe kuaze iha munisipiu balun tum-tum sirkula tiha ona, nunee mos transporte tum-tum nee halao mos rejistrasaun iha Diresaun Nasional Transporte Terestre (DNTT) sira iha sapa matrikula, enkuantu iha sidade Dili governu bandu tum-tum atu halo sirkulasaun tanba la priense kriteria kona-ba kódigu estrada no kódigu viaturas importasaun.
