Reportajen Joselina dos Santos
Moris ho kondisaun defisiénsia ain no matan, lasai bareira ba Tomas Gusmão Pereira ho nia fen Maria Gusmão Pereira, hodi kontinua luta ba sira-nia moris no sai hanesan vida agrikutór hodi tulun malu iha situasaun ne’ebé de’it iha Aldeia One-Bu’u, Suco Sagadate, Postu-Administrativo Laga, Município Baucau.
“Ha’u sofre moras defisiensia ain komesa husi iha okupasaun Indonézia nia tempu, ha’u la senti kolen bainhira hala’o atividade agrikultór tanba moris mak hanesan ne’e ona, laiha ema ida mak ajuda ami nia atividade tanba ami na’in-rua hela mesak. Ha’u iha forsa hakarak halo servisu maibe impaktu mak ain ladún di’ak hodi lao distansia dook, uluk bee laiha ha’u rasik ho kondisaun difisiensia ain nafatin forsa hodi ba kuru bee, tanba ha’u nia fen defisiensia matan, entaun nia labele lao tanba la haree rai no la hatene dalan”, dehan, Tomas iha Aldeia One-Bu’u, Suco Sagadate, Postu-Administrativo Laga, Município Baucau, 10/10.
Nia dehan, maske ho kondisaun defisiensia ain maibé nafatin halo atividade hanesan ema sira seluk, sente todan hodi tau matan ba nia fen ne’ebé ho kondisaun defisiensia matan, nu’udar laen iha responsabilidade atu ajuda no hala’o servisu uma laran hanesan tein, fase bikan, kuru bee halo to’os no natar.
“Servisu todan ne’ebé ha’u hasoru loron-loron mak kuru bee, tanba ho distansia dook tebes dalaruma kuru bee loron ida dala ida, maibé tenke deskansa dala rua ka tolu mak foin to’o uma. Ami iha oan feto rua maibé forma ona familia no hela dok husi ami, entaun tempu mak sira mai vizita ami, senti triste no terus tebes maibé ami nafatin forsa hodi hasoru situasaun moruk no midar hamutuk nunka fahe malu”,
Hanesan Laen tenke forsa hodi halo serbisu tanba laiha ema ida maka ajuda sira-nia serbisu kada loron tein kuru bee no fase bikan, bainhira sente kolen entaun sira selu ema mak ba kuru bee ho presu fó osan 1 dolar maka sira foin kuru bee lori mai hodi sira uza. Osan ne’e sira hetan husi faan tua nomos simu Terceira idade nian mak hola hahan masin mina no nesidade basika no balun rai.
Iha sorin seluk xefe aldeia One-Bu’u Suku Sagadate Lorenco Gusmão Pereira rekonese katan defisiensia entre fen laen ne’e merese estadu tau matan, nune’e nu’udar autoridade aldeia hatene sira-nia kondisaun maske moris difisiensia maibé sira mós hetan osan veteranu no hetan osan terseira idade nian.
“sente triste mos ba problema ne’ebé sira-nain rua infrenta mak kru be ho distansia dook, ne’e duni ami sei esforsu no informa ona ba PNDS postu laga hodi fasilita torneira ba sira hodi asesu mos bee. Tanba haree ba realidade sira-nia moris ne’e todan no terus tebes tanba ho kondisaun ne’ebé defisiensia matan no ain, durante ne’e sira na’in-rua hela mesak lao labele tanba ho kondisaun ne’ebé defisil tebes” dehan, Xefe aldeia One-Bu’u.
