Reportanjen Juvinal Cabral
Frente Revolucionaria do Timor-Leste Indepedente Fretilin sita tenke kontinua Amu Papa Francisco nia luta ba Igualdade.
“Ho tristeza boot mak Frente Revolusionaria Timor-Leste Independente (FRETILIN) simu notisia hosi Vatikanu kona-ba Sua Santidade Papa Francisco nia mate,” haktuir komunikandu, 22/04/2025.
Notisia ida ne’e kontra FRETILIN no povu Timor-Leste nia espetativa tanba Amu Papa Francisco nia aparisaun públika iha loron Sábadu Santu no Domingu Paskoa hametin ema nia fiar katak maske neneik maibé Amu Papa Francisco sei hahu asumi fila fali ninia kna’ar nu’udar Líder Igreija Katólika nian no mós kontinua fanu mundo tomak atu labele haluha ema kiik no kiak sira.
“FRETILIN sente Amu Papa Francisco nia mate reprezenta lakon boot ida ba Timor-Leste no umanidade tomak,” Sekretariu Jerál FRETILIN Mari Alkatiri hateten.
“Tinan kotuk durante nia vizita mai Timor-Leste, Amu Papa husu atu líder sira Nasaun nian fo prioridade ba povu tomak nia moris diak no la’os ba grupo kiik ida deit nia diak; labele hases no hanehan Timor oan sira ne’ebé kiak no kiik atu hamosu duni justisa sosiál iha rai ida ne’e,” Mari Alkatiri kontinua.
Durante vizita iha Timor-Leste, Amu Papa Francisco husu povu Timor-Leste no líder sira promove moris diak ba ema hotu, justisa sosiál, unidade, páz no rekonsiliasaun, no tau matan ba meiu ambiente atu jerasaun sira tuir mai mós bele goja.
“Amu Papa Francisco nia vizita mai Timor-Leste la’os deit hametin liu tan sarani Katólika Timor-Leste nia fé, maibé mós fo hanoin atu Timor-Leste sai duni fatin iha ne’ebé ema hotu- hotu bele sente Ukun Rasik An, moris ho dignidade no hirak ne’ebé povu hili atu kaer ukun serbisu duni ba hasai povu hosi kiak, beik no mukit tuir valor sira ne’ebé FRETILIN hatúr iha 1974,” Prezidente FRETILIN, Francisco Guterres Lú-Olo hateten.
“Amu Papa husik ita tomak iha kedas momentu ida ne’ebé mundu hasoru dezafiu boot ba garante ema tomak nia moris diak. Maibé ha’u fiar katak Amu Papa Francisco nia partida sei unifika no haforsa liu tan povu Timor-Leste tomak atu kontinua ninia luta sira ne’ebé halo Timor-Leste sai buras liu no mundu ida ne’ebé diak liu,” Lú-Olo konklui.
Iha tinan-2020, atuál Prezidente FRETILIN ne’ebé momentu ne’ebá hala’o kna’ar nu’udar Prezidente da Repúblika konvida Amu Papa Francisco mai vizita Timor-Leste, ne’ebé hetan resposta pozitivu. Maibé, tanba pandemia COVID-19, Amu Papa nia vizita adia mai tinan- 2024, no ida ne’e nu’udar primeiru vizita hosi Papa ida hafoin Timor-Leste restaura nia independensia. Papa Francisco nia vizita akontese iha loron-9 to’o loron-11 fulan-Setembru tinan-2024, koinside ho selebrasaun tinan 50 ezistensia FRETILIN nian.