Reportajen David da Costa
Relasiona ho Tribunal Judisial Primeira Instansia Dili fó prazu loron-10 ba arguidu Eis-Ministru Edukasaun (ME) Bendito Freitas, atu hato’o depoimentu ba tribunal, relasiona ho produsaun kaderneta eskolar iha tempu Governu Konstitusionál da-lima.
Atuál Ministru Negósiu Estranjeiru no Kooperasaun (MNEK), Bendito Freitas, Hatete, Produsaun kaderneta ba eskola Ensinu Tékniku Vokasionál ne’e produs husi kompañia Taliti, ho montante osan $20 mill dolares no kazu ne’e hanoin administrativu tebes.
“Kona-ba kazu kaderneta ne’e ha’u hanoin ida ne’e, kazu ida administrativu tebe-tebes, iha ne’eba produsaun kaderneta eskolár Ensinu Tékniku Vokasionál valór ida $20 mill dolares, ne’ebé kompañia ida naran Taliti mak ba halo produsaun,” Dehan Ministru Negósiu Estranjeiru no Kooperasaun (MNEK), Bendito Freitas, Iha Palásiu Prezidensiál Bairu-Pite, Tersa 22/07.
Nia haktuir, Iha kaderneta kotuk ne’e pájina pur emisaun nian, dala ruma hasai tiha pájina haat ka ne’e la tama, ne’e kestaun tékniku ne’ebé lójistiku sira haree kona-ba ida ne’e, laiha buat ida.
Tanba Ministru nian iha kompeténsia tomak atu asina, nune’e estudante iha direitu simu sira nia kaderneta eskolár ida ne’e prinsipiu.
“Mais kestaun administrativa ida ne’e sai fali to’o ida ne’e, ha’u sente ida ne’e ita hakarak justisa ida ne’ebé justu,” Nia informa.
Antes ne’e Tribunal Judisial Primeira Instansia Dili fó prazu loron-10 ba arguidu Eis-Ministru Edukasaun (ME) no Atual Ministru Negosiu Estranjeiru no Kooperasaun (MNEK) Bendito Freitas, atu hato’o depoimentu ba tribunal, relasiona ho produsaun kaderneta eskolar iha tempu Governu Konstitusionál da-lima.
Audensia julgamentu ne’ebe prezide husi juiza, Julmiati Freitas, solisita ba defeza arguidu, advogadu privadu Pedro Camões, halo komunikasaun ho nia kliente atu bele marka prezensa iha prosesu julgamentu ba kazu ne’e.
Kazu ida ne’e, tribunal rona ona deklarasaaun husi arguidu na’in-10 no tama ona ba faze alegasaun, maibé to’o prosesu ne’e arguidu Bendito Freitas seidauk marka prezensa dala- ida iha sala julgamentu hodi prosede ba julgamentu, hodi hato’o nia depoimentu ba tribunal koletivu relasiona ho kazu ne’e.
Tuir faktu ne’ebe aprezenta hosi ministeriu publiku katak kazu ne’e envolve hosi arguidu na’in-11. Husi nain-11 ne’e inklui atual ministru MNEK Bendito Freitas. Arguidu nain-10 mak AP, FMG, DC, ASP, JMGP, RHA, AFXR, LMR, MM, SS. Sira ne’e mak ekipa servisu ba atividade produsaun kaderneta eskolar.
Produsaun kaderta ne’ebe tuir loloos pajina 40 maibe rezultadu ikus mak empreza produs pajina 36, no parte governu liuhusi ministeriu edukasaun kontinua halo pagamentu ba kompañia. Husi efeitu ne’e, eskola teknika Vokasionál munisípiu Bobonaru la utiliza tanba la tuir akordu kuantidade pajina nian.
Husi agamentu ne’e, ministeriu públiku konsidera hamosu prejuizu ba Estadu hodi kondena arguidu Bendito Freitas ho AP FMG no DG ho krime abuzu poder ne’ebe previstu iha artigu 297 kódigu penal no krime partisipasaun ekonomia no negosiu iha artigu 299.
Enkuantu atribuisaun krime administrasaun danoza iha artigu 274 imputa ba arguidu ASP JMGP, RHA, AFXR, LMR, MM no SS. Atribui mos artigu 85 husi kodigu penal ba atual MNEK Bendito Freitas, AP, FMG, DC, proibe atu ezerse funsaun públika durante tinan-lima.
