Reportajen Silvino Freitas
Traballadór Cleaner (hamoos-nain) sira ne’ebé halao servisu iha ospital referral Maubisse nafatin preokupa ho salariu kada fulan $115, tanba sira tinan barak ona sira halo servisu limpeza iha areador sira ospital maibe kompana ne’ebé governu kontratu la hasa’e sira nia saláriu, nune’e mós iha sira nia servisu fatin susar ba sira atu hetan lalais fasilidade limpeza nian no sira mos sempre hetan koa ba sira nia salariu inklui sira preokupa ho osan COVID-19 ne’ebé sira simu deit dala ida maski funsionáriu seluk simu dala rua.
Reprezentante traballador Cleaner iha Ospital Referral Maubisse Diamentina Castro de Fatima dehan, sira nia servisu cleaner iha ospital nee kleur ona no sira sempre infrenta dezafiu oioin iha sira nia servisu fatin ne’ebé sira sempre hatoo ba lideransa ospital nian maibe la tau interese ba sira nia problema, dalaruma sira infrenta dezafiu iha sira nia servisu fatin sira konsege hatoo ba ospital maibe sira duun ba malu entre kompana ho ospital, nunee mos sira nia salariu ne’ebé mantein ho $115 maibe salariu sira nee lori sira tenke kumpri hotu orientasaun sira maka labele falta, lisensa, tuir enkontru no seluk tan.
“kona-ba osan ami $115 depois ami falta koa $5, lisensa koa $5 atestadu mediku koa $5 karik enkontru ruma maka ami la hatene informasaun mos koa $5, ami servisu besik ba ospital karik material laiha mos ami sempre hakilar, ami husu mak sira foin lori mai, hanesan ami husu sasan privadu atu fase ami nia ropa foer sira ne’e” dehan Reprezentante traballador Cleaner iha Ospital Referral Maubisse Diamentina Castro de Fatima, (11/08).
Nia dehan tan, sira husu ba governu atu tau matan ba sira nuudar cleaner liuliu ba sira nia salariu ho $115 nee atu pelumenus hasae, nunee mos iha tempu pandemia COVID-19 sira maka iha lina frente atu halo servisu maibe too dadaun nee sira la hetan direitu ba osan COVID-19 nian, maski iha funsionariu sira seluk inklui seguransa sira hetan hotu direitu ba dalarua maibe sira ne’ebé servisu cleaner la hetan direitu maibe simu deit dala ida, maski sira hatama hotu dokumentu nesesariu sira atu hetan pagamentu ba osan COVID-19 nian.
“ami primeiru nee husi ospital sira maka rekruta mais kompana tama mai entrega ami ba kompana sira, mai liuhusi sira entaun sira konese maibe fallansu ruma entaun sira dehan kompana mai asina kontratu ho imi ka ho ami, maibe ami halo servisu bazeia ba kontratu laos naran servisu” dehan Diamentina.
Reprezentate Cleaner nee dehan tan, kompana ne’ebé mai primeiru nee mak Asmatete maibe kompana nee lori fila sira nia osan no sira ejiji mak kompana foin selu, no dadaun nee iha tan kompana seluk atu mai maibe sira seidauk hatene maski kompana nee asina kontratu ho ospital maibe cleaner sira husu fali material husi parte ospital la tau atensaun ba sira.
Antes nee Visi-Primeiru Ministru no Ministru Koordenador Asuntu Sosial Mariano ‘Asanami’ Sabino dehan, salariu ba traballador nee akontese iha fatin rua mak ida husi seitor publiku no ida seluk husi seitor privadu , nunee husi seitor privadu la dun iha impaktu maibe husi seitor publiku sei fo impaktu ba salariu ba veteranu sira nian, nunee IX governu enkamina ona ba iha parte kompetente atu bele estuda hela.
“iha prosesu finansa nian sei tetu no koalia ho seitor pribadu tanba salariu minumu iha rua ida mak iha liur no ida mak governu nian, parte governu nian sei fo impaktu mos ba osan veteranu nian maibe iha liur nee lae, sira husi parte kompetente mak estuda hela iha konsellu ministru ami orienta hela depois ita sei haree” dehan Asanami.
