Reportajen Adroaldo “Saretukau”
Resistência Nacional dos Estudantes de Timor-Leste (RENETIL) liu hosi Primeiru Vise RENETIL, Francisco J. M. F. Belo “Lires” entrega livru RENETIL iha luta ba libertasaun Timor Lorosa’e nian ho títulu “antes sem título do que pátria” ne’ebé hakerek hosi fundador RENETIL, Carlos da Silva L. F. R Saky ba Prezidente autoridade Região Administrativo Especial Oe-cusse Ambeno (RAEOA), Arsenio Paixão Bano nomos ba Sentru Juventude Rejiaun Oe-cusse.
Serimónia de entrega ne’e iha ámbitu programa média RENETIL no Neon Metin, iha formasaun jornalizmu sidadania no seguransa dijital báziku iha sentru juventude RAEOA, Sesta, 10 Juñu.
“Ida ne’e momentu ida oportunu tebes mai Renetil atu entrega hela istória ita nian rasik ne’ebé hakerek hosi ita nia kompañeiru Saky, fundador RENETIL no mos hanesan hamutuk ho kompañeiru Bano na’in 29 ne’ebé haksoit lutu iha simeira APEC iha Jakarta,” Primeiru Vise RENETIL, “Lires” hato’o hodi entrega livru ba Prezidente RAEOA nu’udar mos membru RENETIL.
Nune’e Prezidente Arsenio simu ho ksolok livru refere, no dehan livru ne’e nia belun Carlos Sacky mak hakerek iha ne’ebé uluk sira luta iha tempu rezisténsia no hela hamutuk iha kuartu ida.
“Nia hakerek iha ne’e antes sem título do que sem pátria, nia livru ne’e bele rai iha ne’e, kuandu hakarak lee, bele lee,” dehan membru RENETIL ne’e hafoin nia no reprezentante sentru juventude RAEOA simu livru refere no dehan atu tau livru refere iha biblioteka nune’e bele lee istória luta uluk nian.
